Spremin tut šukar. Razmislin soske sine pišimo adava so ka čitine. Vežbin te čitine poviše lafija taro jekh puti, a na sekova lafi posebno. Pazin te na čhive, te na ikale ili te na menine nesave lafija. Pazin ko sa o interpunkciska znakija, sar soj i točka, i zapirka, o prašalniko ili o izvičniko.

Vaker sekova lafi ispravno. Ako arakhea lafija kola so na džanea so značinena ili phare tuke te vakere len, čitin len poviše puti ko glaso sa džikote na sikljovea točno te phene len.

Jasno ker lafi. Vaker o lafija jasno agjaar so ka vazde tlo šero hem dovolno ka phrave tlo muj. Trudin tut te vakere jasno sekova delo taro lafi.