Matej 16:1-28
16 Ki leste ale o fariseija hem o sadukeija* te iskušinen le agjaar so rodingje lestar te sikavel lenge znako taro nebo.
2 A ov odgovoringja lenge: „Keda rakjola, vakerena: ’Ka ovel šužo o vreme, soske o nebo tano lolo‘.
3 A sabajle vakerena: ’Avdive nane te ovel šužo o vreme, ka ovel bršimalo, soske o nebo tano lolo ama oblačno‘. Džanena te vakeren savo ka ovel o vreme taro adava so dikhena ko nebo, a na haljovena so značinena o bukja so slučinena pe akana.
4 Akaja lošno generacija so nane verno e Devleske* stalno rodela znako,* ama nane te del pe lake javer znako osven o znako e Jonaskoro“. Palo adava mukhlja len hem gelo peske.
5 Keda o učenikija ale ki okoja strana taro more, bistergje te len pea maro.
6 A o Isus vakergja lenge: „Phraven tumare jakhja hem pazinen tumen taro kvasaco e fariseengoro hem e sadukeengoro“.
7 Adaleske ola počmingje te vakeren jekh jekheske: „Šaj vakerela adava soske na lelem amencar maro“.
8 O Isus džanlja adava hem adaleske vakergja: „Soske vakerena kaj nane tumen maro? Soske isi tumen tikni vera?
9 Panda li na haljovena? Na setinena tumen li ko pandž mare so čaljargje 5.000 muršen hem kobor korpe khedingjen palo adava?
10 Hem ko efta mare so čaljargje 4.000 muršen hem kobor bare korpe khedingjen palo adava?
11 Sar na haljovena kaj na kerava lafi bašo maro? Nego pazinen tumen taro kvasaco e fariseengoro hem e sadukeengoro“.
12 Tegani halile kaj na vakerela lenge te pazinen pe taro e mareskoro kvasaco, nego taro sikljojbe e fariseengoro hem e sadukeengoro.
13 Keda alo ko okolna thana tari e Filipeskiri Cezareja, o Isus pučlja ple učenikon: „So vakerena o manuša, koj tano o manušikano Čhavo?“*
14 Ola odgovoringje leske: „Nesave vakerena kaj sian o Jovan Krstitel, javera o Ilija, a javera o Eremija ili jekh taro prorokija“.
15 Tegani pučlja len: „A so vakerena tumen, koj sium me?“
16 O Simon Petar odgovoringja: „Tu sian o Hristos,* o Čhavo e dživde Devleskoro“.
17 Tegani o Isus vakergja leske: „Srekjno sian Simon, o čhavo e Jonaskoro, soske na doznajngjan adava taro manuš,* nego taro mlo Dad soj ko nebo.
18 A isto agjaar vakerava tuke: tu sian Petar,* hem ki akaja karpa ka gradinav mlo sobranie hem o meribe* nane te pobedinel le.
19 Ka dav tut o klučija taro nebesno Carstvo, hem sa so ka phande tele ki phuv, više ka ovel phanlo upre ko nebo hem sa so ka phrave tele ki phuv, više ka ovel phravdo upre ko nebo“.
20 Tegani zabraningja e učenikonge te vakeren e javerenge kaj ov tano o Hristos.
21 Ottegani, o Isus počmingja te objasninel ple učenikonge kaj mora te džal ko Erusalim hem te cidel but muke taro starešine, taro glavna sveštenikija, taro učitelija e zakoneskere hem te ovel mudardo, a ko trito dive te voskresninel.
22 Tegani o Petar cidingja le ki strana hem počmingja strogo te sovetinel le: „Ov šukar sprema tute Gospodare, adava nikogaš nane te slučinel pe tuke“.
23 A ov irangja plo dumo e Petareske hem vakergja leske: „Naš mandar Satano! Tu sian mange bar sopkibaske, soske tle misle nane e Devleskere, nego manušikane“.
24 Tegani o Isus vakergja ple učenikonge: „Ako nekoj mangela te džal pali mande, neka otkažinel pe pestar, neka lel plo stubo mučibaske* hem neka avel pali mande.
25 Soske koj mangela te spasinel plo životo, ka našavel le, a koj ka našavel plo životo baši mange, ka arakhel le.
26 Čače, savi korist ka ovel e manuše ako dobinela celo sveto, a našavela plo životo? Ili, so šaj o manuš te del bašo plo životo?
27 Soske o manušikano Čhavo* ka avel ple Dadeskere silaja* hem leskere angelencar, hem tegani ka del sekaske sprema leskere postapke.
28 Čače vakerava tumenge kaj nesave taro adala soj tane akate nane te meren sa džikote na dikhena e manušikane Čhave sar avela ko plo Carstvo“.
Footnotes
^ Doslovno: „preljubničko generacija“.
^ Ili: „čudo“.
^ Dikh ko rečniko bašo „Manušikano Čhavo“.
^ Doslovno: „taro telo hem rat“.
^ Ki grčko čhib „Petar“ značinela „delo tari karpa; bar“.
^ Doslovno: „o porte e groboskere“.
^ Dikh ko rečniko bašo „Stubo mučibaske“.
^ Dikh ko rečniko bašo „Manušikano Čhavo“.
^ Doslovno: „ple Dadeskere slavaja“.
