Е Господарескири вечера која тани познато сар Тајно вечера или Спомен-свеченост, икераја ла баш сар со пишинела ки Библија (1. Коринќаните 11:20). Спротивно таро адава, ко бут религие ленгере верувања хем обичаија поврзиме акале настанеа, на темелинена пе ки Библија.

Е Господарескири вечера икерела пе те шај те сетина амен ко Исус хем те сикава амари благодарност хем ценење баши жртва со денѓа ла са е манушенге (Матеј 20:28; 1. Коринќаните 11:24). Акава нане несави свето тајна или религиозно обичај коте со е верниконге сикавела пе милост хем простинела пе ленгере гревија. a И Библија вакерела аменге кај амаре гревија шај те овен простиме само ако сикаваја вера ко Исус, а на преку несаво религиозно обичај (Римјаните 3:25; 1. Јованово 2:1, 2).

О Исус вакерѓа пле учениконге те икерен е Господарескири вечера, ама на вакерѓа ленге точно кобор пути те керен адава (Лука 22:19). Несаве мислинена кај адава ваљани те керен ле секова масек, секова курко, секова диве, повише пути ко диве или кобор со јекх мануш мислинела кај тано потребно. b Ама, аке несаве буќа со ваљани те размислина баши ленде.

О Исус воспоставинѓа е Господарескири вечера ко диве кеда икерела пе сине и еврејско Пасха, а ко адава исто диве ов муло (Матеј 26:1, 2). Адава на сине случајност. И Библија спорединела е Исусескири жртва пасхално жртваја (1. Коринќаните 5:7, 8). И Пасха икерела пе сине јекх пути ко берш (2. Мојсеева 12:1-6; 3. Мојсеева 23:5). Исто аѓаар, о христијања таро прво веко, јекх пути ко берш икерена сине и Спомен-свеченост башо е Исусескоро мерибе. c Е Јеховаскере сведокија, исто аѓаар икерена акава јекх пути ко берш, адалеске со аѓаар темелинела пе ки Библија.

Кеда о Исус воспоставинѓа е Господарескири вечера, поможинѓа аменге те одредина на само кобор често те икера ла, него исто аѓаар те одредина о диве хем о време. Ов воспоставинѓа и Спомен-свеченост ко 14 нисан 33 берш а.е., откеда пело о кхам, спрема о библиско лунарно календари (Матеј 26:18-20, 26). Е Јеховаскере сведокија, секова берш ко исто датум икерена и Спомен-свеченост баш сар со керѓе о прва христијања. d

Иако о 14 нисан 33 берш а.е., сине петок, акава датум секова берш перела ко јавер диве таро курко. О диве кеда перела 14 нисан, одрединаја ле ко исто начин сар со керена сине ко е Исусескоро време, а на сар о методе кола со користинена пе сине башо современо еврејско календари. e

Кеда воспоставинѓа е Господарескири вечера, о Исус користинѓа о маро бизо квасацо хем и лоли мол кола со ачхиле тари пасхално вечера (Матеј 26:26-28). Сар со керѓа ов, амен да користинаја маро бизо квасацо или бизо несаве јавера зачинија хем чисто лоли мол, а на соко таро дракха или мол колате сој чхивдо шекери, зачинија или алкохол.

Несаве религие користинена маро квасацоја , иако ки Библија често користинела пе ов сар симболи башо грево хем нешто сој румимо (Лука 12:1; 1. Коринќаните 5:6-8; Галатите 5:7-9). Адалеске, само маро бизо квасацо хем бизо јавера зачинија шај те одговоринел сар симболи башо е Христосескоро тело кова со сине бизо грево (1. Петрово 2:22). И Библија, исто аѓаар на поддржинела те користинел пе соко таро дракха, наместо мол. Несаве цркве адава керена адалеске со забранинена те пиел пе алкохол, ама адаја забрана на темелинела пе ки Библија (1. Тимотеј 5:23).

О маро бизо квасацо хем и мол со користинена пе ки Спомен-свеченост, тане симболија со претставинена е Исусескоро тело хем о рат. Акала симболија на претворинена пе ко несаво чудесно начин ко тело хем ко рат, а ни нане дословно тело хем рат, сар со несаве верујнена. Те дикха со вакерела и Библија башо акава.

• Кеда би о Исус заповединела сине пле учениконге те пиен лескоро рат, тегани ов би вакерела пле учениконге те пхаѓен е Девлескоро закони, кова со забранинела те користинел пе рат (1. Мојсеева 9:4; Дела 15:28, 29). Ама, о Исус никогаш на би чхивела сине е јаверен те пхаѓен е Девлескоро закони баши светост е ратескири (Јован 8:28, 29).

• Кеда би о апостолија дословно пиена сине е Исусескоро рат, ов на би вакерела ленге сине кај адава рат „ка дел пе буте џененге“, со сикавела кај лескири жртва панда на сине денди (Матеј 26:28).

• О Исус жртвујнѓа пло живото „јекх пути засекогаш“ (Евреите 9:25, 26). Ама, кеда би ки е Господарескири вечера о маро хем и мол претворинена пе ко лескоро тело хем рат, адава би овела сине кај секова пути о Исус дела палем пли жртва.

• О Исус вакерѓа: „Керен акава те сетинен тумен манде“. Значи, ов родинѓа таро пле следбеникија те сетинен пе ки лескири жртва, а на те повторинен ла (1. Коринќаните 11:24).

Окола со верујнена ки транссупстанција, или јавере лафенцар ко адава кај о маро хем и мол, овена е Исусескоро дословно тело хем рат, темелинена акава сикајбе ко несаве библиска стихија. На пример, ко бут библиска преводија пишинела кај о Исус баши мол вакерѓа: „Акава тано мло рат“ (Матеј 26:28). Ама, ко јавера преводија пишинела: „Акава претставинела мло рат“. f Сар со керѓа бут пути кеда сикавела сине е манушен, о Исус акате користинѓа јекх метафора (Матеј 13:34, 35).

Кеда е Јеховаскере сведокија икерена е Господарескири вечера, само тикно број лена таро маро хем и мол. Соске адава тано аѓаар?

Е Исусескоро рат овозможинѓа те керел пе јекх „нево сојуз“, кова со заменинѓа о сојуз со сине машкар о Јехова о Девел хем о пурано израелско народо (Евреите 8:10-13). Окола сој тане дело таро акава нево сојуз, лена таро симболија ки Спомен-свеченост. Ко акава сојуз на припадинена са о христијања, него само окола сој тане викиме таро Девел. (Евреите 9:15; Лука 22:20). Ола ка владинен е Исусеа ко небо хем и Библија вакерела кај ола тане само 144.000 мануша (Лука 22:28-30; Откровение 5:9, 10; 14:1, 3).

Различно таро „тикно стадо“ кола со ка владинел е Христосеа, повише џене амендар надинена пе кај ка овен дело таро „баро мноштво“, кова со ка добинел вечно живото ки Пхув (Лука 12:32; Откровение 7:9, 10). Иако на лаја таро симболија ки Спомен-свеченост, ки адаја прилика сикаваја амари благодарност баши жртва е Исусескири со денѓа ла аменге (1. Јованово 2:2).