На, и Пхув нане те овел уништими, тхари јагаја или заменими јавере планетаја. И Библија вакерела кај и Девел створинѓа и Пхув те шај о мануша те живинен ки лате засекогаш.

•   „О праведна мануша ка наслединен и пхув хем ка живинен вечно ки лате“ (Псалм 37:29).

•   „[О Девел] стегинѓа и пхув ко зорале темелија; нане те мрдинел таро пло тхан никогаш, ки цело вечност“ (Псалм 104:5).

•   „И пхув ачхола засекогаш“ (Проповедник 1:4).

•   „Окова со обликујнѓа хем керѓа и пхув, окова со зацврстинѓа ла хем на керѓа ла бизи цел, него керѓа ла те живинел пе ки лате“ (Исаија 45:18).

 О Девел нане те мукхел е манушен целосно те уништинен и Пхув загадибаја, војнаја или ко несаво јавер начин. Наместо адава, ов ка „уништинел околен со уништинена и пхув“ (Откровение 11:18). Сар ка керел адава?

 О Девел ка заменинел е манушикане владен, кола со нашти те заштитинен и Пхув, јекхе совршено владаја — е небесно Царствоја (Даниел 2:44; Матеј 6:9, 10). Ко адава Царство ка владинел е Девлескоро Чхаво, о Исус Христос (Исаија 9:6, 7). Кеда сине ки Пхув, о Исус докажинѓа кај иси ле моќ те контролиринел о природна силе (Марко 4:35-41). Сар Цари ко е Девлескоро Царство, е Исусе ка овел ле целосно контрола упри Пхув хем упро адала природна силе. Ов ка керел о условија живибаске ки Пхув те овен исто сар со сине ки еденско градина (Матеј 19:28; Лука 23:43).

 На, нане те овел. Асавко погрешно мислибе иси буте манушен адалеске со погрешно халиле о лафија таро 2. Петрово 3:7, коте со пишинела: „И авдисутни пхув хем небо тане гаравде јагаке“. Те дикха дуј буќа кола со ка поможинен аменге те хаљова акала лафија.

1.   Ки Библија е лафенцар „небо“, „пхув“ хем „јаг“ мислинела пе ко повише буќа. На пример, ки 1. Мојсеева 11:1 вакерела: „Цели пхув сине ла само јекх чхиб“. Акате е лафеа „пхув“ мислинела пе ко мануша.

2.   О контекст тари 2. Петрово 3:7 поможинела амен те хаљова ко со мислинела пе е лафенцар небо, пхув хем јаг. О 5 хем 6 стихо керена лафи башо Потоп со сине ко Ноескоро време. Тегани сине уништимо адава свето, ама амари планета ачхили, сине уништиме о лошна мануша, јавере лафенцар и „пхув“ (1. Мојсеева 6:11). Исто аѓаар сине уништимо хем „о небо“, јавере лафенцар, о мануша со владинена сине упри Пхув ко адава време. Значи, сине уништиме само о лошна мануша, а на амари Пхув. О Ное хем лескири фамилија преживинѓе о Потоп хем понадари да живинѓе ки Пхув (1. Мојсеева 8:15-18).

 Исто сар о пани таро Потоп со уништинѓа е лошна манушен, аѓаар и „јаг“ со спомнинела пе ко 2. Петрово 3:7 ка уништинел е лошна манушен, а на амари планета. О Девел ветинѓа „нево небо хем неви пхув коте со ка живинел и праведност“ (2. Петрово 3:13). Упри „неви пхув“, јавере лафенцар упро мануша со ка живинен тегани ки лате, ка владинел о „нево небо“ — е Девлескоро Царство. Кеда ка владинел адава Царство, ки Пхув ка овел рај хем ка владинел вечно мир (Откровение 21:1-4).