На. Нашти са о религие те керен амен те ова паше е Девлеа. Ки Библија тане спомниме бут религие кола со о Девел на прифатинела лен. Ола шај те делинен пе ко дуј категорие.

Прво категорија: Религие со обожавинена ховавне девлен

 И Библија вакерела кај о ховавне девела на врединена ништо, лендар нане нисави корист (Еремија 10:3-5; 16:19, 20). О Јехова a ко пурано време денѓа е Израелцонге јекх заповед: „Ма те овен тут јавера Девела освен мандар“ (2. Мојсеева 20:3, 23; 23:24). Кеда о Израелција обожавинена сине јавере девлен, о Јехова бут хољанела сине (4. Мојсеева 25:3; 3. Мојсеева 20:2; Судиите 2:13, 14).

 Е Девле иси ле панда о исто стави кеда керела пе лафи башо обожавибе е јавере девлен (1. Коринќаните 8:5, 6; Галатите 4:8). Ов заповединѓа околенге со мангена те обожавинен ле, те икљовен хем те одвојнен пе тари ховавни религија (2. Коринќаните 6:14-17). Ако са о религие керена те ова паше е Девлеа, тегани соске денѓа асавки заповед?

Дујто категорија: Религие со обожавинена е чачутне Девле ко начин со нане леске прифатливо

 Понекогаш, о Израелција ко пурано време прифатинена сине о верувања хем о обичаија таро јавера религие. Ама о Јехова на прифатинела сине и чачутни религија те мешинел пе е ховавне религијаја (2. Мојсеева 32:8; 5. Мојсеева 12:2-4). Кеда сине ки пхув, о Исус осудинѓа е верска водачен соске на обожавинена сине е Девле ко исправно начин. Англо о јавера, сикавена пе сине сар мануша со дарана таро Девел, ама сине лицемерна хем мислинѓе кај нане важна „о побаре буќа таро Закони: и правда, и милост хем и верност!“ (Матеј 23:23).

 Авдиве да, само и религија со темелинела пе ко чачипе тари Библија, шај те керел амен те ова паше е Девлеа (Јован 4:24; 17:17; 2. Тимотеј 3:16, 17). О религие со нане ко склад е Библијаја, цидена е манушен таро Девел. Бут верувања, коленге о мануша со мислинена кај темелинена пе ки Библија, сар на пример о тројство, и душа со на мерела хем о вечно мучибе ко пекол, уствари, тане ленде тари ховавни религија. О обожавибе кова со темелинела пе ко асавке сикљојба на врединела ништо, соске наместо те поштујнен е Девлескере заповедија, поштујнена о манушикане традицие (Марко 7:7, 8).

 О Девел мрзинела о лицемерство со иси ко религие (Тит 1:16). Те шај јекх религија те поможинел е манушенге те овен попаше е Девлеа, ој мора те влијајнел ко ленгоро секојдневно живото, а на само кеда керена пе несаве ритуалија или традицие. На пример и Библија вакерела: „Ако некој мислинела кај обожавинела е Девле ама на контролиринела пли чхиб, ов ховавела коркори песте, хем лескоро обожавибе на врединела. И религија која тани чисто хем свето англо амаро Девел хем Дад тано акава: те грижине тут е чхавенге сој бизо родителија хем е удовиценге ко ленгере неволје хем те аракхе тут таро мелалипе акале светоскоро“ (Јаков 1:26, 27, фуснота). Акате користинела пе о израз „религија која тани чисто“ соске керела пе лафи башо обожавибе со нане лицемерно.