БУТ џене џанена о извештај башо Исус со сине ковимо ко стубо машкар ко дуј криминалција (Мат. 27:35-38). Ама несаве мислинена кај и Библија нане точно кеда керела лафи башо адава кај е Исусескоро тело сине спремимо башо погреб хем пало адава чхивдо ки гробница (Мар. 15:42-46).

Несаве критичарија таро евангелија мислинена кај околенге со сине мударде на сине дозволимо те овен нормално паруме, сар на пример те овен чхивде ки гробница. Наместо адава, ола мислинена сине кај најверојатно ленцар постапинела пе сине ко јавер начин. О новинари о Ариел Сабар, ки новина Smithsonian објаснинела соске несаве мислинена аѓаар: „О мударибе ко крсто сине казна која со дела пе сине само е најлошна манушенге таро општество, хем несаве историчарија вакерена кај сине смешно те мислинел пе кај о римјања ка дозволинен асавке манушенге те овел лен нормално погреб“. О римјања мангена сине те понижинен ко најлошно начин е криминалцон аѓаар со често мукхена сине ленгоро тело те висинел ко стубо те шај о дива животне те хан лен. Адава со ачховела сине таро тело фрдена ле сине ко јекх гробо коте со сине јавера да муле.

Ама о археологија откринѓе нешто појавер, најхари башо адава со ачхило таро некобор Евреија со сине мударде. Ко 1968 берш, откринѓе о кокала јекхе манушескере кова со сине мудардо ко прво веко. Адала кокала аракхле лен ки јекх фамилијарно гробница паше узо Ерусалим. Ола сине ки јекх кутија кокалонге. Машкар ко адала кокала сине исто аѓаар кокало тари пета. Акаја пета сине ковими ки јекх пхал јекхе шајкаја која со сине 11,5 сантимија дугачко. О Сабар вакерела: „И пета која со сине јекхе манушескири со викинела пе сине Јехоканан сине доказ кај о извештај таро евангелие башо Исус кај сине парумо ки гробница тано веројатно точно“. Интересно тано адава со „и пета таро Јехоканан тани јекх пример кај о римјања ко е Исусескоро време дозволинѓе те овел парумо некој со сине ковимо ко крсто“.

Акава кокало тари пета керѓа исто аѓаар те овен различна ставија башо адава ки сави положба сине ковимо о Исус. Ама јасно тано кај несаве криминалцон со сине мударде сине лен нормално погреб а на кај сине фрдиме ко јекх гробо јавере муленцар. Адава со и Библија вакерела кај е Исусескоро тело сине чхивдо ки јекх гробница тано точно. О доказија поддржинена адава со вакерела и Библија.

Ама сој најважно, о Јехова англедер више вакерѓа кај о Исус ка овел парумо ки гробница јекхе барвале манушескири хем никој нашти те чхинавел те исполнинел пе е Девлескоро лафи (Иса. 53:9; 55:11).