Пало 1920 берш, ме родителија дознајнѓе башо Јехова, адава сине англедер те лен пе. Ме бијандиљум ко почеток таро 1939 берш. Кеда сиум сине тикно амен живинаја сине ки Англија хем џава сине ко состанокија мле родителенцар. Пало несаво време пишинѓум ман ки Теократско школа баши служба. Панда сетинава ман ко мло прво говор. Адалеске со сине ман само шов берш, ваљани сине те укљав ки јекх кутија те шај те дикхав тари бина. Сине ман бут трема кеда дикхава сине ко возрасна мануша со сине ки публика.

Те шај те овел манге полокхо ки служба мо дад ки јекх картичка пишинѓа манге јекх едноставно презентација со шај сине те користинав ла. Сине ман офто берш кеда прво пути коркори гељум те проповединав ко јекх кхер. Бут сиум сине бахтало кеда о станари читинѓа мли картичка хем прифатинѓа о лил „О Девел нека овел чачутно!“ * Одма прастандиљум те вакерав ме дадеске, кова со сведочинела сине ки исто улица. И служба хем о состанокија керена ман сине бахтало хем поможинѓе манге те мангав те служинав е Јеховаске полновремено.

Откеда мо дад платинѓа те шај редовно те добинав о списание Стражарско кула, почминѓум те мангав и Библија са повише. Одма читинава сине секова списание само со ка ресел. Мли доверба ко Јехова бајрола сине са повише хем адава керѓа те дав лафи кај ка служинав леске цело живото.

Ко 1950 берш, сар фамилија сием сине делегатија ко конгрес „Бајрола и теократија“, со икерѓа пе ко Њујорк. Четврток, 3 август, и тема башо адава диве сине: „Диве е мисионеренгоро“. Адава  диве, о пхрал Кери Барбер, кова со пало несаво време служинѓа ко Водечко тело, икерѓа о говор крстибаске. Откеда пучља амен е кандидатен о дуј пучиба ко крајо таро пло говор ме уштиљум хем вакерѓум: „Оја“. Сине ман 11 берш ама халиљум кај анѓум јекх важно одлука. Ама, дарава сине те кхував ко пани адалеске со на џанава сине те пливинав. Мо како ало манцар џи ко базенти хем вакерѓа манге ма те дарав. Хем ко право сине, са завршинѓа добором сигате со ни мле пре на пипинѓе џи теле о базенти. Јекх пхрал крстинѓа ман, а о јавер икалѓа ман таро базенти. Таро адава важно диве о Јехова понадари да испрајнела сине мле друмија.

Кеда завршинѓум и школа мангљум те овав пионери, ама ме наставникија поттикнинѓе ман те џав ко факултети. Шунѓум лен хем керѓум аѓаар, ама сигате халиљум кај нашти те ачховав цврсто ко чачипе хем ко исто време те концентриринав ман ки школа. Адалеске одлучинѓум те на џав више ко факултети. Молинѓум ман е Јеховаске башо адава хем пишинѓум писмо џи ко факултети коте со љубезно објаснинѓум кај ка мукхав и школа ко крајо таро прво берш. Сине ман целосно доверба ко Јехова хем одма почминѓум е пионерско службаја.

Ко јули 1957 берш, почминѓум е полновремено службаја ки диз Велинборо. Пучљум е пхрален ко Бетел ко Лондон те препорачинен манге јекхе искусно пионере касаја со шај те соработинав. Ола препорачинѓе манге е пхрале Берт Вејзи кова со сикавѓа ман бут буќа. Ов ревносно проповединела сине хем поможинѓа манге те овел ман шукар распоред баши служба. Ко собрание сием сине ме, о пхрал Вејзи хем шов попхуре пхења. Адава со спреминава ман сине хем со учествујнава сине ко са о состанокија керѓа те бајрарав мли доверба хем мли вера ко Јехова.

Откеда кратко време сиум сине ко затвор, адалеске со на гељум ки војска, запознајнѓум ман е Барбараја, јекх пхен со служинела сине сар специјално пионери. Венчинѓем амен ко 1959 берш, хем сием сине спремна те служина коте со иси потреба. Прво сием сине доделиме ко Ленкешир ки северозападно Англија. Пало адава ко јануари 1961 берш, сиум сине канимо те присуствујнав ки школа башо именујме пхраља ко Бетел, ко Лондон со трајнѓа јекх масек. Бут изненадинѓум ман кеда ко крајо тари школа сиум сине доделимо ки патувачко служба. Дуј курке добинѓум обука таро јекх искусно покраинско надгледнико ки диз Бирминген хем и Барбара сине заедно манцар. Пало адава, иранѓем амен ки амари доделба ко Ленкешир хем Чешир.

Џикоте сием сине ко одмор, ко август 1962 берш, добинѓем писмо тари подружница. Ки лесте сине о молбе баши Школа Гилеад. Откеда молинѓем амен ме хем и Барбара пхерѓем о молбе хем сигате бичхалѓем лен ки подружница. Пало панџ масек викинѓе амен ко Бруклин (Њујорк) те присуствујна ко 38-то класи тари Школа Гилеад, со трајнела сине деш масек хем колате со проучинела пе и Библија.

 Ки Школа Гилеад сиклилем бут башо е Девлескоро Лафи, лескири организација хем башо амаро пхралипе. Ман сине ман 24 берш, а е Барбара 23 хем бут сиклилем таро јавера со сине ко амаро класи. Сине манге чест секова диве те соработинав е пхралеа Фред Раск, со сине јекх таро амаре инструкторија. Јекх бут важно поука со истакнинѓа ла тани кај секогаш ваљани те дел пе исправно совет кова со темелинела пе ки Библија. Машкар о пхраља со икерена сине говорија ки школа сине искусна пхраља сар о Натан Нор, о Фредерик Франц хем о Карл Клајн. Исто аѓаар, бут сиклилем таро понизно пример е пхралескоро Мекмилан, кова со сикавѓа амен башо адава сар о Јехова поможинѓа пле народо ко пхаро периоди со доживинѓе о пхраља хем и организација.

Ко крајо тари школа о пхрал Нор вакерѓа е Барбараке хем манге кај сием доделиме ко Бурунди, ки Африка. Сигате гелем ки бетелско библиотека те дикха ко Годишнико кобор објавителија сине ко Бурунди. Ама, сием сине изненадиме кеда дознајнѓем кај на сине ни јекх објавители ки адаја пхув! Значи ваљанѓем те џа ко тхан коте со на сине проповедимо, хем ко континенти колеске со џанаја сине бут хари. Бут сием сине секириме, ама и искрено молитва поможинѓа аменге те ова смириме.

Ки амари неви доделба са сине поразлично — и клима, и култура хем и чхиб. Освен адава, ваљани сине те сикљова француски. Исто аѓаар, ваљани сине аменге тхан коте те живина. Дуј диве откеда реслем, јекх пхрал со сине аменцар ки Школа Гилеад, о Хари Арнот, ало те посетинел амен џикоте иранела пе сине ки пли доделба ки Замбија. Ов поможинѓа аменге те аракха јекх стани, кова со уло амаро прво мисионерско кхер. Ама кратко пало адава, о властија почминѓе те противинен пе аменге, адалеске со на џанена сине ништо башо е Јеховаскере сведокија. Само со почминѓем те уживина ки амари доделба, о властија вакерѓе аменге кај нашти те ачхова бизи работно дозвола. Жално сине адава со вакерѓе аменге кај мора те џа аменге хем преселинѓем амен ки јавер држава, ки Уганда.

Сием сине секириме адалеске со гелем ки Уганда бизи виза, ама сине амен доверба ко Јехова. Јекх пхрал тари Канада, кова со служинела сине ки Уганда, објаснинѓа јекхе службеникоске амари ситуација хем о службенико вакерѓа аменге  кај шај те беша некобор масек џикоте на добинаја и дозвола те ачхова ки адаја пхув. Адава сине аменге доказ кај о Јехова поможинела аменге.

И ситуација ки Уганда сине бут поразлично тари адаја ко Бурунди. Ки Уганда више проповединела пе сине иако ки цели пхув сине само 28 објавителија. Ко подрачје аракхлем бутен со керена сине англиски лафи. Ама, сигате халилем кај, те шај те поможина е интересентенге те напредујнен, ваљани сине те сикљова барем јекх таро бут чхибја со керена пе сине лафи ки адаја пхув. Почминѓем те проповедина ки диз Кампала хем околу лате, коте со и чхиб луганда највише керела пе сине лафи. Адалеске одлучинѓем те сикљова адаја чхиб. Ваљанѓе аменге некобор берша те шај те кера шукар лафи, ама адава со џанаја сине и чхиб луганда поможинѓа аменге те овен амен шукар резултатија ки служба. Почминѓем пошукар те хаљова со ваљани сине амаре интересентенге, а ленге сине полокхо те вакерен аменге сар осетинена пе.

Бут сием сине бахтале џикоте поможинаја сине е манушенге те сикљовен башо чачипе, а панда побахтале сием сине кеда замолинѓе амен те служина ки патувачко служба. И подружница тари Кенија денѓа амен упатствија те патујна ки цели пхув, те шај те дикха тхана коте со највише ваљани сине специјална пионерија. Бут пути сикавѓе аменге бари гостопримливост о мануша со никогаш англедер на шунѓе башо е Јеховаскере сведокија. Ола керена сине те осетина амен шукар хем чак спреминена сине аменге хајбаске.

Ки јекх прилика патујнѓем дуј диве возеа тари Кампала џи ки диз Момбаса ки Кенија хем пало адава бродеа џи ко Сејшели, група островија ко Индиско Океани. Пало адава таро 1965 берш џи ко 1972 берш, и Барбара хем ме редовно посетинаја сине о Сејшели. Ко почеток адатхе сине само дуј објавителија, покасно уле група хем пало адава собрание. Јавера тхана коте со посетинѓем е пхрален сине ки Еритреа, Етиопија хем Судан.

И политичко ситуација ки Уганда менинѓа пе откеда јекх воено група леља и власт. О берша пало адава сине бут пхаре, ама адава сикавѓа ман кај најшукар тано те шунав и библиско заповед те овав послушно е властенге (Мар. 12:17). Ки јекх прилика са о странција со живинена сине ки Уганда мора сине те пријавинен пе ко полициска станице со сине најпаше узо ленгере кхера, амен одма керѓем адава. Некобор диве покасно, џикоте ме хем јекх мисионери возинаја сине ки Кампала, але узи аменде некобор џене тари тајно полиција. Бут дарандилем! Ола обвининѓе амен кај сием шпиоња хем ингарѓе амен ки главно полициско станица коте со објаснинѓем кај сием мирна мисионерија, вакерѓем ленге кај амен више пријавинѓем амен ки полиција, ама ола на мангле те шунен амен. И полиција ингарѓа амен ки полициско станица со сине најпаше узо мисионерско кхер. Пело аменге баро бар таро вило кеда о полицајцо колесте со пријавинѓем амен англедер пенџарѓа амен хем вакерѓа ленге те мукхен амен.

Ко адава периоди бут пути сине аменге пхаро кеда накхаја сине таро блокаде со сине поставиме ко друмо, а посебно кеда о војникија сине бут мате. Секова пути молинаја амен сине хем осетинаја сине андруно мир кеда мукхена амен сине безбедно те накха. Жално тано со ко 1973 берш, са е странска мисионеренге сине вакердо те џан песке тари Уганда.

 Палем добинѓем јекх неви доделба акава пути ко Брегот на Слоновата Коска ки западно Африка. Адаја сине панда јекх бари промена аменге. Ваљанѓем те сикљова јекх неви култура, палем те кера француски лафи цело време хем те прилагодина амен те живина мисионеренцар со авена сине таро јавера пхувја. Ама, палем дикхлем е Јеховаскоро водство кеда понизна хем искрена мануша таро подрачје сигате прифатинѓе о шукар хабери. Заедно дикхлем сар амари доверба ко Јехова испрајнѓа амаре друмија.

Пало несаво време и Барбара изненадено насвалили таро рако. Повише пути иранѓем амен ки Европа те шај те лечинел пе, хем ко 1983 берш халилем кај нашти више те ачхова ки амари доделба ки Африка. Бут сием сине разочариме башо адава!

Е Барбаракири состојба ули са полошно џикоте служинаја сине ко Бетел ко Лондон, хем ко крајо ој мули. И бетелско фамилија бут поможинѓа манге. Посебно јекх брачно пари поможинѓа манге те прилагодинав ман хем понадари да те овел ман доверба ко Јехова. Покасно запознајнѓум јекхе пхења која со авела сине ко Бетел те поможинел, а поангле служинела сине сар специјално пионери. Ој мангела сине бут е Јехова хем сине духовно личност. И Ен хем ме венчинѓем амен ко 1989 берш, хем оттегани служинаја ко Бетел, ко Лондон.

Таро 1995 берш џи ко 2018 берш, служинѓум сар претставнико таро главно седиште (поангле пенџардо сар зонско надгледнико) хем посетинѓум скоро 60 различна пхувја. Ки секоја пхув дикхљум сар о Јехова грижинела пе пле народоске бизи разлика со случинела пе леа.

Ко 2017 берш иранѓум ман ки Африка те посетинав јекх пхув. Сиум сине бут бахтало со и Ен али манцар прво пути ко Бурунди. Солдуј сием сине изненадиме кеда дикхлем кобор џене прифатинѓе о чачипе. Ки исто улица коте со проповединѓум таро кхер ко кхер ко 1964 берш, акана иси јекх бут шужо Бетел. Ки адаја пхув акана иси повише таро 15.500 објавителија.

Сиум сине бут бахтало кеда добинѓум о списако е пхувјенцар кола со ваљани сине те посетинав лен ко 2018 берш. Јекх таро пхувја сине Брегот на Слоновата Коска. Кеда реслем ко Абиџан, и главно диз, осетинѓум ман сар те пхене ресљум кхере. Таро телефонско именико ко Бетел, дикхљум кај о пхрал со живинела сине узи гостинско соба коте со сиум сине ме, сине о пхрал Сосу. Сетинѓум ман кај кеда ме сиум сине поангле ко Абиџан аѓаар викинела пе сине о надгледнико е дизјакоро. * Ама, на сиум сине ко право. Акава пхрал на сине ов, него лескоро чхаво.

О Јехова секогаш икерела пе ко адава со ветинела. О пхаре буќа со доживинѓум сикавѓе ман кај, ако иси тут доверба ко Јехова, ов ка испрајнел тле друмија. Мангава понадари да те џав ко друмо кова со нане ле крајо хем кова со ка ингарел ман ко бут шужо нево свето (Изр. 4:18).