• Биримо таро Девел. „Ме биринѓум мле царе... Ка дав тут народија сар наследство хем ка дав тут цело свето“ (Псалм 2:6, 8).

• Наследнико е царескоро е Давидескоро. „Бијандило аменге чхаво, добинѓем мурш... Лескири власт дур ка бувљол хем о мир ко е Давидескоро престол хем ко лескоро царство нане те овел ле крајо“ (Исаија 9: 6, 7).

• Бијамо ко Витлеем. „Витлеем... тутар ка икљол окова со ка овел владетели... Ов ка владинел ко цело свето“ (Михеј 5:2, 4).

• Отфрлимо хем мудардо таро мануша. „Сине понижимо хем на врединела сине аменге ништо. Сине посавдо башо амаро грево, сине здробимо башо амаре гревија“ (Исаија 53:3, 5).

• Воскреснимо хем прославимо. „Нане те мукхе ман ко гробо. Нане те дозволине тло верно слуга те дикхел и дупка е гробоскири... Ко тло десно вас иси вечно бахталипе“ (Псалм 16:10, 11).

Ки цело манушикани историја, само јекх личност исполнинела о условија те шај те овел совршено владетели, а адава тано о Исус Христос. Уствари, јекх ангели лескере дајаке, е Маријаке, вакерѓа: „О Девел ка дел ле о престол лескере дадескоро е Давидескоро... хем ов вечно ка владинел сар Цари“ (Лука 1:31-33).

О Исус никогаш на владинѓа ки Пхув. Наместо адава, ов ка владинел упро мануша таро небо сар Цари ко е Девлескоро Царство. Соске о Исус ка овел совршено владетели? Размислин со керѓа кеда сине ки Пхув.

•   О Исус грижинела пе сине е манушенге. О Исус поможинѓа муршенге хем џувленге бизи разлика кобор берш сине лен, котар авена сине хем дали сине барвале или чороле (Матеј 9:36; Марко 10:16). Кеда јекх лепрозно молинѓа ле: „Те мангљан, ту шај те сасљаре ман“, о Исус жалинѓа ле хем сасљарѓа ле (Марко 1:40-42).

• О Исус вакерѓа аменге со очекујнела амендар о Девел. Ов вакерѓа: „Нашти те служинен хем е Девлеске хем е барвалипаске“. Исто аѓаар, денѓа амен совет кај ваљани те понашина амен е јаверенцар сар со мангаја ола те понашинен пе аменцар. Адава начело тано пенџардо сар Златно правило. О Исус истакнинѓа кај е Девлеске нане важно само сар понашинаја амен, него исто аѓаар со размислинаја хем со осетинаја. Адалеске, те шај те кера адава со очекујнела амендар о Девел, ваљани те пазина саве чувствија развинаја ко амаро вило (Матеј 5:28; 6:24; 7:12). О Исус истакнинѓа кај те шај те ова чаче бахтале, ваљани те џана кола тане е Девлескере мерилија хем те живина спрема ленде (Лука 11:28).

• О Исус сикавѓа амен те манга е јаверен. Лескере лафија хем постапке сине лен силно влијание упро окола со шунена ле сине. Ки Библија пишинела: „О народо сине воодушевимо таро начин сар сикавела сине, соске сикавела сине сар некој со иси ле авторитети таро Девел“ (Матеј 7:28, 29). О Исус поттикнинѓа е манушен: „Манген тумаре душманен“. Ов молинѓа пе чак околенге со учествујнѓе ко лескоро мударибе: „Мо Дад, простин ленге, соске на џанена со керена!“ (Матеј 5:44; Лука 23:34).

О Исус шај успешно те владинел упро мануша. Кеда ов ка владинел, о мануша ка овен чаче бахтале адалеске со ов мангела лен хем грижинела пе ленге. Ама, кеда ка почминел те владинел?