Е христијаненге ко Солун, о апостол Павле пишинѓа: „Ако некој на шунела адава со вакерѓем ко акава писмо, обележинен ле“ (2. Сол. 3:14). Англедер мислинаја сине кај акала лафија о Павле вакерѓа лен директно е старешиненге. Ко несаве случаија, кеда некој таро собрание упорно на шунела сине о библиска начелија, иако повише пути добинела сине советија, о старешине ка икерен сине јекх предупредувачко говор англо собрание. Пало адава, о објавителија на дружинена пе сине адале со сине обележимо.

Ама акана ваљани те кера јекх промена. Јасно тано кај е Павлескоро совет однесинела пе ко адава кај секова христијани коркори одлучинела сар ка постапинел ко несаве околностија. Адалеске, нане потреба о старешине те икерен јекх говор башо предупредување. Соске кераја акаја промена? Те дикха башо со керѓа лафи о Павле кеда денѓа акава совет.

О Павле приметинѓа кај несаве таро адава собрание „на живинена уредно“. Ола на поштујнена сине е Павлескере советија кола со сине темелиме ко е Девлескоро Лафи. Кеда англедер сине ко ленгоро собрание, о Павле денѓа лен акаја заповед: „Ако некој на мангела те керел бути, тегани ни ма те хал!“ Иако ов вакерѓа адава, несаве палем на мангена сине те керен бути те шај те грижинен пе башо пумаре потребе, иако сине способна башо адава. А сине асавке да со мешинена пе сине ко е јаверенгере буќа. Сар ваљани сине о христијања те понашинен пе адаленцар со на живинена сине уредно? (2. Сол. 3:6, 10-12).

Баши некасте со на живинела сине уредно, о Павле вакерѓа: „Обележинен ле“. Акава израз ки грчко чхиб шај те значинел те приметине кеда некој на живинела уредно хем те ове свесно кај шај те влијајнел лошно упри туте да. О Павле денѓа акава совет цело собраниеске, а на само е старешиненге (2. Сол. 1:1; 3:6). Адалеске, кеда јекх христијани ка приметинел сине кај некој таро собрание нане послушно ко советија таро е Девлескоро Лафи, коркори одлучинела сине повише те на дружинел пе леа.

Дали адава значинела сине кај асавкеа ваљани сине те понашинен пе сар те пхене тано цидимо таро собрание? На, соске о Павле акава да вакерѓа: „Опоменинен ле сар пхрал“. Значи о христијања понадари да ко состанокија хем ки служба ка дружинен пе сине адалеа со сине обележимо, ама на хем ко слободно време. Соске? „Те шај те лаџал“, пишинѓа о Павле. Окова со на живинела сине уредно шај ка лаџал сине хем ка поправинел пе ако тано обележимо (2. Сол. 3:14, 15).

Сар шај те применина акава совет авдиве? Прво, ваљани те ова сигурна кај некој чаче на живинела уредно хем аѓаар понашинела пе, сар со опишинѓа о Павле. О Павле на керѓа лафи башо мануша со керена поразлична буќа амендар, а тане мукхле ки совест или ко лично вкус. А ни на мислинѓа ко окола со шај поврединѓе амен нештолеа. Ов керѓа лафи конкретно башо окола со намерно биринена те на шунен о јасна библиска советија.

Авдиве, ако приметинаја кај несаво пхрал или пхен упорно на мангела те шунел о советија таро е Девлескоро Лафи, a коркори ка одлучина те на дружина амен леа хем те на накхава леа време. Адалеске, со акаја тани лично одлука, на ваљани те кера лафи баши лате е јаверенцар, освен амаре кхерутненцар сој Сведокија. А адале пхралеа или пхењаја понадари да ка дружина амен ко состанокија хем ки служба. Кеда ка дикха кај поправинѓа пе, ка дружина амен леа сар англедер.