Јекх пути ко берш, ко цело свето е Јеховаскере сведокија хем милиоња сој тане каниме те авен, кхедена пе те шај те икерен и Спомен-свеченост башо е Исусескоро мерибе. Ола керена адава соске аѓаар о Исус заповединѓа (Лука 22:19). Акава настан поможинела аменге те хаљова кобор тано важно адава со о Исус денѓа пло живото е манушенге. Исто аѓаар, поможинела аменге те хаљова сар шај те користинел аменге лескири жртва — акана хем ки иднина (Јован 3:16).

 Бизи разлика, дали сиан сине присутно акава берш ки Спомен-свеченост или на, сар шај лично туке те користинел е Исусескири жртва? О Исус вакерѓа те кера дуј важна буќа:

1.  1. Те сикљова башо Девел хем башо Исус. Ки јекх прилика, кеда молинѓа пе пле небесно Дадеске, о Исус вакерѓа: „Те шај те овел лен вечно живото ваљани шукар те пенџарен тут, е јекхе чачутне Девле, хем околе со бичхалѓан ле, о Исус Христос“ (Јован 17:3).

2.  2. Те живина спрема адава со сикљоваја. О Исус истакнинѓа кај ваљани те живина спрема адава со ов сикавѓа. На пример, и пенџарди Проповед ки гора завршинѓа ла аѓаар со пофалинѓа секоле со „шунела [лескере] лафија хем постапинела спрема ленде“ (Лука 6:46-48). Ки јавер да прилика вакерѓа нешто слично: „Ако џанена акала буќа, бахтале сиен кеда керена лен“ (Јован 13:17).

 Дали мангеа те дознајне нешто повише башо Девел хем башо Исус? Дали би мангеа те џане несаве практична советија кола со ка поможинен тут те живине спрема адава со ов сикавѓа? Аке со шај те поможинел туке.

 Амаро бесплатно библиско курси поможинѓа буте манушенге пошукар те пенџарен и Библија хем те почминен те живинен спрема лате.

•   Те шај те дознајне нешто повише, џа ки страница Библиско курси.

•   Те шај те дознајне сар изглединела јекх библиско курси е Јеховаскере сведоконцар, дикх о видеоклипи Шукар аљан ко тло библиско курси.

 Е Јеховаскере сведокија икерена состанокија дуј пути ко курко ко пумаре сале. Ко адала состанокија разглединаја теме тари Библија хем сикљоваја сар те применина лакере сикајба ко амаро живото.

 Ко амаре состанокија шај сарине те авен, на ваљани те ове е Јеховаскоро сведоко те шај те присуствујне ки ленде. Са зависинела таро локална околностија дали шај те ове присутно физичко или преку видеоконференција.

•   Дикх о видеоклипи Со керела пе ки е Јеховаскере сведоконгири дворана? те шај те дикхе сар изглединена амаре состанокија.

•   Те шај те дознајне коте најпаше икерена пе состанокија, џа ки страница Состанокија.

 Бут статие хем видеоклипија со иси ки акаја интернет-страница шај те поможинен туке те дознајне нешто повише башо е Исусескере сикљојба хем башо адава кобор тани вредно и жртва со денѓа ла.

 На пример, те шај те дознајне сар шај о мерибе јекхе манушескоро те користинел буте манушенге, читин о статие „Сар спасинела амен о Исус?“ хем „Зошто Исус страдал и умрел?“ или дикх о видеоклипи Соске муло о Исус?