LEKCIJA 34
Sar sikavas, hoj amaro jilo čačes marel predal o Jehovas?
Hino tiro jilo pašeder kijo Jehovas akorestar, so chudňal te sikhľol andal e Biblija? Kames te el mek pašeder paš o Jehovas? Ma bister, te o Jehovas dikhela, hoj les kames buter a buter, paľis the ov tut buter a buter kamela a dela tuke, so tuke kampel. Sar sikaveha, hoj tiro jilo čačes marel predal o Jehovas?
1) Sar sikavas, hoj kamas le Jehovas?
Te doľikeras oda, so amenge o Jehovas phenel, sikavas, hoj les kamas. (Pregen 1. Jána 5:3) Aľe o Jehovas pre ňikaste na ispidel. Mukhel, mi peske te kidas avri, či les šunaha abo na. Soske? Kamel, kaj rado te keras, so amenge phenel. (Rimanom 6:17) Na kamel, kaj les te šunas la daratar, bo ov hino baro Del, aľe kamel, kaj les korkore jilestar te šunas. Andre kadi kňižka 3. the 4. kotorestar tut dodžaneha, sar šaj sikaves, hoj rado dikhes le Jehovas. Sikhľoha, kana le Jehovaske kereha radišagos a kana bi les dukhalas o jilo olestar, so keres.
2) Soske hin varekana phares te šunel le Jehovas?
Andre Biblija hin, hoj lačho dženo zadživel but pharipena. (Žalm 34:19) So ajso? Maras pes oleha, save sam. Varekana amen nane love. Zadživas avrendar o nalačhipen abo aver trapišagi. Kada savoro amenge lel but zor a paľis šaj el phares te kerel oda, so amendar kamel o Jehovas. Lokeder pes perel pro nalačho drom, sar sam andro pharipena. Aľe te pes na poddes a furt jilestar šunes le Jehovas, sikaves, hoj tiro verno kamiben kije leste ňič na thovel tele. Vašoda leske ačh furt verno! A o Jehovas ačhela furt verno tuke. Ňigda tut na omukhela! (Pregen Žalm 4:3)
DODŽAN TUT BUTER
Soske ela o Jehovas andre tute barikano, te les šuneha? So tuke pomožinel te ačhel leske furt verno?
3) Phenďa the pre tute
Andre biblicko kňižka Jób genas, hoj o Satan phenďa banges pro Jób the pre savorende, so kamen jilestar te šunel le Jehovas. Pregen Jób 1:1, 6–2:10 a paľis vakeren jekhetane:
-
So phenďa o Satan pal o Jób, hoj soske šunel le Jehovas? (Dikh Jób 1:9–11.)
-
So o Satan phenďa pre savorende the pre tute? (Dikh Jób 2:4.)
Pregen Jób 27:5b a paľis vakeren jekhetane:
-
Sar o Jób sikaďa, hoj leskero jilo marel ča predal o Jehovas?
Le Joboskero jilo marelas ča predal o Jehovas, vašoda leske ačhiľa verno
Te amaro jilo marel ča predal o Jehovas, ačhas leske verna
4) Mi el o Jehovas andre tute barikano
Pregen Príslovia 27:11 a paľis vakeren jekhetane:
-
Sar hin le Jehovaske, te peske kides avri oda, so hin lačho a te les šunes? Soske?
5) The tu šaj ačhes verno le Jehovaske!
Kamas le Jehovas andal calo jilo, vašoda pal leste vakeras the avrenge. Sar sam leske verna, na preačhas pal leste te vakerel, the te aven o pharipena. Mukh o VIDEJO a paľis vakeren jekhetane.
-
Sas predal tute tiš varekana phares te zaačhel vaš o Jehovas?
-
So le phraleske andro videjo diňa pale zor te zaačhel vaš o Jehovas?
Te kameha oda, so kamel o Jehovas a narado dikheha oda, so ov narado dikhel, ela predal tute lokeder te ačhel leske verno. Pregen Žalm 97:10 a paľis vakeren jekhetane:
-
Olestar, so imar sikhľiľal, so o Jehovas rado dikhel? A soha bi leske kerďalas bari dukh?
-
Sar sikhľoha te kamel oda, so hin lačho a narado te dikhel oda, so hin nalačho?
6) Ňič nane feder sar te šunel le Jehovas!
Oda, hoj šunas le Jehovas, hin ča pre amaro lačhipen. Pregen Izaiáš 48:17, 18 a paľis vakeren jekhetane:
-
Paťas le Jehovaske, hoj džanel, so hin predal amende koda nekfeder? Soske?
-
So lačho zadžiďiľal vaš oda, hoj sprindžarďal le Jehovas a hoj študines?
VAREKO ŠAJ PHENEL: „Le Devleske hin jekh, so kerav a sar dživav.“
-
Savo biblicko tekstos bi sikavehas, hoj le Jehovaske nane jekh oda, so keras?
SO SIKHĽIĽAM
Te šunes le Jehovas a sal leske verno the andro pharipena, sikaves, hoj tiro jilo čačes marel predal o Jehovas.
So bi phenehas
-
So sikhľiľal le Jobostar?
-
Sar sikaveha, hoj čačes kames le Jehovas?
-
So tuke pomožinela furt te ačhel verno le Jehovaske?
DIKH TUKE BUTER
Dikh, sar šaj ačhes verno le Jehovaske the leskera organizacijake.
„Voči niekomu verne oddanému si budeš počínať vo vernej oddanosti“ (16:49)
Pregen tuke buter, so o Satan banges phenďa pal o manuša.
„Jób si zachováva rýdzosť“ (Biblia – Aké posolstvo prináša? 6. oddiel)
Dikh tuke, hoj the o čhave šaj ačhen verna le Jehovaske.
Dikh tuke, so le ternenge pomožinel te ačhel verna le Jehovaske, the te len aver cirden pro nalačhipen.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
