O Del kerdžas le Abrahamoskre čhavendar organizimen narodos a diňas len zakoni. Vičinlas len Izrael. Mušinenas te služinel ča le Devleske a te del pozoris pro Devleskro Lav, hoj les o manuša te na zmeňinen aňi te na našaven. (Žalmy 147:19, 20) Prekal o Izrael savore naroden šaj uľahas chasna. Pregenen 1. Mojžišova 22:18.

O Del kidňas avri le Izraelčanen, hoj te en leskre svedki. So sas pisimen pal o Izrael, sikavel, savi chasna hin le manušen olestar, te dživen pal le Devleskre zakoni. (5. Mojžišova 4:6) Prekal izraelsko narodos o manuša šaj sprindžarde džidone Devles. Pregenen Izaiáš 43:10, 12.

Pregeľas varesavo časos a o Izraelčana našade visada te el le Devleske pre dzeka. O Jehovas oda narodos imar na kamelas te podporinel. Pre lengro than thodžas le čačikane kresťanen. (Matúš 21:43; 23:37, 38) On akana služinen le Devleske sar Jehovaskre svedki. Pregenen Skutky 15:14, 17.

O Ježiš sthodžas le kresťanen, hoj te vakeren pal o Del a avrendar te keren učeňiken andal savore narodi. (Matúš 10:7, 11; 24:14; 28:19, 20) O nalačhipen, so hin andro svetos so neksigeder preačhela. Akana čačikane kresťana vakeren buter sar varekana pal o Del a keren učeňiken manušendar andal savore narodi. Le Jehovaske služinen sar jekh bari fameľija milijoni manuša andal savore narodi. Šoha avka na sas, sar akana! (Zjavenie 7:9, 10) Čačikane kresťana hine organizimen, hoj te pomožinen jekh avreske the te den pes zor, te ľikerel avri o pharipena. Andro khera, kaj pes zdžan Jehovaskre svedki, sikhľon ola ista čačipena, všadzi pal calo svetos. Pregenen Hebrejom 10:24, 25.

Ada sas vaj 40 berša angle ada, sar začňindžas peršo svetovo vojna the aver pharipena, pal save pisinel e Biblija, sar pal o posledna dživesa. Cikňi skupina odučharde čačipena andal e Biblija. Sprindžarde, hoj o Ježiš zorganizindžas čačikane kresťanen, hoj te vakeren avrenge pal o Devleskro kraľišagos. Chudle ada te vakerel pal calo svetos. Andro berš 1931 priile nav Jehovaskre svedki. Pregenen Skutky 1:8; 2:1, 4, 11; 5:42.

Andro peršo storočije sas le kresťanen zbori andro but krajini. Pal ala savore zbori pes starinel cikňi skupina čačikane murša, save kamenas le Devles andal calo jilo a džanenas o čačipena andal e Biblija. Džanenas, hoj o zbori hine le Ježišoskre the hoj ov len ľidžal. (Skutky 16:4, 5) Avka, sar akor the akana hin cikňi skupina murša, so pomožinen le zborenge te služinel le Devleske. Kala murša podporinen buči, savi pes kerel pal calo svetos andro khera le Jehovaskre svedkengre, so pes vičinen beteli. Ode pes prethovel e biblicko literatura andro buter sar 600 čhiba, tlačinel pes a bičhavel pes andro zbori. Chasna alestar hin buter sar 100 000 zbori pal calo svetos. Andro dojekh zboros hine murša, so služinen avrenge sar starši čiže duchovna pasťijera a starinen pes jileha pal le Devleskro stados. Pregenen 1. Petra 5:2, 3.

Jehovaskre svedki hine organizimen te vakerel pal o lačho hiros a te kerel učeňiken avre manušendar. Keras ada avka sar o apoštola, phiras kher kherestar. (Skutky 20:20) Sikavas andal e Biblija. Le Jehovaskre svedki nane ča varesavi organizacija. Sam bari fameľija a o Del hino amaro jileskro dad. Sam phrala the pheňa, so rado dikhen jekh avres. (2. Tesaloničanom 1:3) O Jehovas zorganizindžas peskre služobňiken, hoj te keren leskri voľa a te pomožinen avrenge te sprindžaren les. Avka o Del sthodžas nekbachtaleder fameľija pre caľi phuv. Pregenen Žalmy 33:12; Skutky 20:35.