Oui, parské Bondié i vé domoun i ador ali uni ansanm. La Bib i di : « Alon fé in kont ansanm inn é lot pou pous anou fé mont lamour é fé bann bon zaksion ; san larg nout bann rénion » (Ébré 10:24, 25).

 Jézu la fé konpran ké son bann disip noré été in lorganizasion kan li la di azot : « Parsa tout domoun va konèt ké zot lé mon bann disip : si zot néna lamour pou inn é lot » (Jan 13:35). Pou bann krétien, ador Bondié èk sak néna lo mèm kroiyans ké zot, sé inn an parmi bann fason fé mont lamour la. Banna noré organiz bann zasanblé é chak somèn zot noré rotrouv azot pou ador Bondié. (1 Korintien 16:19). Ansanm, zot noré été in famiy su tout la tèr (1 Pièr 2:17).

I fo pa sèlman èt dan in rolijion

 Lé vré, la Bib i di ké nou doi rasanm anou pou ador Bondié mé li di pa ké in moun i kontant Bondié jus parské li lé dan in rolijion. Pou akord èk sak Bondié i vé, son rolijion i doi aoir in léfé su son vi. Dayèr sé sak la Bib i di ladsi : « Ala kosa i lé ladorasion ké lé pur é san salté dapré nout Bondié é Papa : pran soin bann zanfan na pu momon papa èk bann vèv lé dann malizé, é tansion pangar lo monn i sali pa zot » (Jak 1:27, ti not).