La Bib i di ki fo pa ador bann zimaj. La Nouvelle Encyclopédie catholique (angl.) i fé se remark la su bann loi ke Bondieu la donn le nasion Israèl: « In bonpe zistoir dan la Bib i mont anou bien mèm ke té ansèrv pa bann zimaj dan le vré ladorasion. » Alon gard detroi pasaj la Bib :

•   « Ou doi pa fé pou ou in léstatu tayé èk la min, ni ninport kèl zafèr ki reprézant sak néna la o dann sièl, ou ke lé anba su la tèr, oubien ke lé dann lo sou la tèr. Ou doi pa mèt aou a jenou devan banna ni lès aou antréné pou ador azot, parske moin, Jéova out Bondieu, mi lé in Bondieu ki réklam ke i ador rienk moin touseul » (Égzod 20:4, 5). Kom li ve ke i ador « rienk [ali] touseul », Bondieu i ve pa ke nou donn loneur ou ke nou ador bann zimaj, bann zidol, bann léstatu ou bann sinbol.

•   « Mi va pa donn mon gloir in ot ni mon loneur bann léstatu » (Izai 42:8, Nouvelle Bible Segond). Bondieu i aksèp pa ke nou ansèrv bann zimaj pou ador ali. Kan désèrtin Zisraèlit la rod pou ansèrv in ti beuf pou ador ali, Bondieu la di ke zot lavé komèt in « péché ke lé grav ». (Égzod 32:7-9, Bible en français courant).

•   « Nou doi pa pansé ke Bondieu i resamb in zafèr ke lé an or, an larjan ou an galé, in zafér ke bann zumin la majiné é la fé èk zot min » (Akt 17:29). Dan zot ladorasion, bann payin té ansèrv souvan le bann zimaj « ke bann zumin la majiné é la fé ék zot min ». Mé, dapré la Bib, bann krétien i doi « march ék la foi, é pa ék sak nou voi » (2 Korintien 5:7).

•   « Fé atansion bann zidol » (1 Jan 5:21). Dan le bann komanman ke la donn bann zisraélit ék bann krétien, la Bib i mont toultan, ki fo pa kroir ke Bondieu i aksèp ki ansèrv bann zimaj ék bann sinbol pou ador ali.