La Bib i donn lord pa prann le san dutou. Donk nou devré refuz le san mé osi ninport kèl konpozan inportan ke néna dedan, kisoi pou manjé, pou mèt dan le kor oubien pou in not zafèr. Alon regard detroi vèrsé :

•   Jenèz 9:4. Kan le Déluj té fini, Bondieu la donn Noé èk son fami la pèrmision manj la viann. Mé li la di azot manj pa le san : « Zot i doi pa manj la chèr avèk son vi — son san. » Komannman la lé pou tout domoun, parske nout tout nou lé désandan Noé.

•   Lévitik 17:14. « Zot i doi pa manj le san ninport kèl chèr, parske la vi ninport kèl moun ou zanimo lé dan le san. Sak i manj sa va mor. » Bondieu té konsidèr ke la vi lété dan le san é vi la té apartien ali. Mèm si loi la lété rienk pou bann Zisraélit, sa i amont ke manj le san té in nafèr bien grav pou Bondieu.

•   Akt 15:20. Bondieu la donn bann krétien le mèm komannman ke li la donn Noé : « refuz [...] le san ». Bann zévènman dann tan pasé i mont bien ke bann premié krétien té désidé pa manj le san ni boir ali, ni ansèrv sa kom trètman pou soign azot.

Poukosa Bondieu i di anou refuz le san ?

 Pou la santé, kan nou refuz mèt le san, néna bann bon rézulta. Mé si Bondieu i demann anou refuz mèt le san, dabor inn sé parske le san lé sakré pou li (Lévitik 17:11 ; Kolosien 1:20).