Ñaupa timpuibi, Jesus cai Allpai aushcaibiga pai llaquishca amigo Lazaromi huañura. Jerusalen mayambi Betania nishca ichilla llactaibimi Lazaro causara. Jesus chima pactashcaibiga, Lazaroga chuscu punzhatami ña huañushca ara. Jesusca Martahuan Mariahuan pambashca pistuma rira. Paigunaga Lazarohua paniguna manaura. Jesusta ricushaga ashca runagunami tandarinaura. Paiguna turita Jesus causachishcata ricusha yuyaringuichu María, Martahuas imasa sintirishcata. Juan 11:21-​23, 38-​44, leingui.

Martaga huañushca runagunamanda ali cuintaitaga yacharami. Bibliaibi nishca shinaga, Allpaibi huiñaibac causanauchun nishami Diosca huañushca runagunata causachingaraun. Juan 11:24, leingui.

Runagunaga allpa pulbumanda rashca manchi (1 Corintios 15:47). Ñucanchi aicha ucui mana almata charinchichu. Aichayuc, tulluyuc manchi. Chasna ashcamandami, huañushca huashaga mana aya tucusha causasha catinchi. Can huañucpiga, camba ñuctuibi tiac yuyaigunaga chingarinmi. Chiraicu huañushcagunaga mana imatas sintinaunzhu. Chasna ashcamandami, Lazaroga huañushcamanda causarishaga mana imatas cuintarachu. Eclesiastes 9:​5, 6, 10, leingui.

Huaquingunaga quirinaunmi, huañushca runagunata Diosca ninaibi turmintachin nisha. Chiga mana sirtu chan. Ña  yachashca shinaga, huañushca runagunaga mana ima yuyaitas charinaunzhu. Infiernomanda yachachishcagunaga llulla man. Chi yachachishcagunaga Jehova mana ali acta shinami sintichinaun. Jehova Diosca runagunata rupachina yuyaillatahuas mana charinzhu. Jeremias 7:​31, leingui.

Cai videota ricui: Huañushaga imata tucunchi

Huañushcagunaga rimanatahuas uyanatahuas mana ushanaunzhu (Salmo 115:17). Iridsa supaigunaga huañushca runagunahua shimita rimashami catichinaun (Judas 6). Chiraicumi Jehovaga huañushca runagunahuan ñucanchi cuintanacunataga mana imallahuas munan. Deuteronomio 18:​10, 11, leingui.

Ashca ashca huaranga runagunaga Allpaibi causangahuami cuti causaringauna. Jehovata mana ricsishcamanda mana alita raccunahuas causaringaunami. Hechos 24:15, leingui.

Huañushcamanda cuti causariccunaga Diosmanda yachanata ushangaunami. Chasnallata, cazusha Jesuspi quirishcata ricuchingauna (Apocalipsis 20:11-13). Chita rashami, huiñai causaita Allpaibi charingauna. Juan 5:​28, 29, leingui.

Jehovaga runagunata ashcata llaquishcamandami causachinga. Dios paihua Churita cushcamandami chi gustu cuintaiguna pactaringami nisha chapaunchi. Canga huañushcaguna causaricpiga, pitata ricunata munanguima. Juan 6:40; Romanos 6:​23, leingui.