Testigo de Jehovacunaca Bibliapi yachachishcata intindimandami politicapica na chapurin. Politicata apoyangapaca na imatapash ruranchichu. Maijan gobiernopa o politicopajpash na votoscunata shitanchichu. Politicapi yaicungapajpash imatapash na ruranchichu. Gobiernocunata cambiachunbash na apoyanchichu. Maijan gobiernocunapa lado o contra ama tucuchunmi Bibliapica ali yuyaicunata yachachin:

•   Jesuspa ejemplotami catita ushapanchi, gentecuna Jesusta mandachun churangapaj munajpica paica na ari nircachu (Juan 6:15). Jesusca paipa catijcunaca ‘cai mundopi gentecunashnaca’ na cangachu nircami. Chaimandami maijan politicatapash na apoyana carca (Juan 17:14, 16; 18:36; Marcos 12:13-17).

•   Jesusca “Taita Diospa Gobiernomanda, ali villaicunatapash tucui llactapi gentecuna uyachunmi mundo enteropi predicanajunga” nircami. Jesús nishcashnaca Taita Diospa Gobiernotami ñucanchipash apoyana capanchi (Mateo 24:14). Taita Diospa Gobiernota apoyajuimandami cai alpapi tiashca gobiernocunataca maijandapash na apoyapanchi. Ashtahuangarin Taita Diospa Gobierno cai alpata mandanamandami predicanchi (2 Corintios 5:20; Efesios 6:20).

•   Politicapi na chapurishpaca tucui gentecunahuan Diospa Gobiernomanda parlanaca más facilmi can. Ñucanchi ruraicunahuan, rimaicunahuanmi Taita Diospa Gobiernolla cai alpapi tiashca llaquicunata tucuchinata confianchi (Salmo 56:11).

•   Politicapi chapurishpaca mundo enteropi huauquipanicunahuan shujllashna caitapash na ushanchimanllu (Colosenses 3:14; 1 Pedro 2:17). Politicapi chapuri religiongunaca shican shican cashcatami ricuchin (1 Corintios 1:10).

 Gobiernocunataca respetanchimi. Politicapi na chapurishpapash autoridadta charijcunataca respetanchimi. Autoridadcunata respetashpaca Bibliapi nijushcatami cazunajunchi, Romanos 13:1​pica: “Ñucanchita mandanajuj autoridadcunataca tucui gentecunami cazuna capanchi” ninmi. Gobiernocunaca gentecunapa alipallatami leycunataca churashca chaimi impuestocunatapash paganchi. Gobiernopa contraca nunca na tucunchichu Bibliapi nishcashnaca “reycunamanda tucui gobiernocunamanda mañachun” nishcatami pactachinchi. Ashtahuangarin autoridadcuna imapash decisiongunata japishpa Taita Diosta tranquilo ali sirvita ama jarcachun nishpami mañanchi (1 Timoteo 2:1, 2).

 Gentecuna politicapi chapurijpi o na chapurijpipash cada unopa decisiondami respetanchi. Por ejemplo, maijan gobiernoman votosta shitana cashcataca na ninchichu shinallata maijanbash votosta shitajpica ama shitaitapash na ninchichu.

 ¿Chairachu Testigo de Jehovacunaca politicapi na chapurinchi? Na. Punda tiempopi Jesusta catijcunapash politicapica na chapurinllu carca. Más que buenas intenciones. La visión bíblica de la política nishca libropica cai yuyaimandaca cashnami nin: “Jesusta punda catijcunaca autoridadcunata respetana cajpipash politicapi chapurina ali cashcataca na yuyarcachu”. Taita Diosmanda yachajushca Orígenes Jarica: “Jesusta catijcunaca politicapica na chapuringapaj munanllu” nishpami escribishca.

 ¿Politicapi na chapurimandachu autoridadcunapaca shujpi peligro canchi? Na shinachu can. Ñucanchicunaca tranquilo gentecunami canchi. Por ejemplo, 2021 huatapi testigo de Jehovacuna politicapi na chapurin cashcamanda imata Academia Nacional de Ciencias de Ucrania nijta ricupashun: “Testigo de Jehovacuna politicapi na chapurin cashcataca na tucui gentecunachu alicachishpa ricunga. Chaimandami Testigo de Jehovacunataca comunista nishca grupocuna y shuj grupocunapash llaquichishca”. Shinallata caitapashmi nirca: “Testigo de Jehovacunaca autoridadcuna churashca leycunatapash siempremi cazun carca. Granjacunapi, fabricacunapi trabajashpapash siempremi honradocuna can carca. Shina rurashpami comunista nishca grupopaca na shuj peligro carca”. Cunanbi testigo de Jehovacunaca paicunapa crishcacunahuan ruraicunahuanga “maijan llactapa tranquilo ali causaigutapash na tucuchingapaj munanllu” nishpami chai villajpica nirca.