Daiane shuti huarmiguca Brasil llactamanda testigo de Jehovami can. Paica precursorami can. Shuj punllaca telefonopi predicajushpami chairalla cazarashca joven cusahuarmihuan parlarca. Chai joven cusahuarmica cushijushpami Bibliamanda ashtahuan yachajungapaj munarca. Shinapash shuj uchilla pueblogupi causangapami rigrinchi nishpami Daiane panigumanga villarca. Y chai pueblogupica internetpash y luzpash illanmi nishpami panigumanga villashcarca. Chai pushtupica ni shuj testigo de Jehovallapash na causanllu carca. Chaimandami chai joven cusahuarmica Bibliamanda ashtahuan yachajungapaj munashpa, chai pueblopi tiashca cabinapa numerota Daiane panigumanga curca. Shinami paicunaca ima punlla, ima hora Bibliamanda yachajungapaj quidarca.

 Daiane paniguca ima punlla Bibliata yachajungapaj quidashca horas cayajpica, chai joven cusahuarmica contestarcami. Shinami paicunaca ishcai semanacunapilla quimsa viajeta telefonopi parlai usharca.

 Pero chai ishcai semanacuna jipaca ñana contestarcachu. Chai joven cusahuarmi telefonota ñana contestajpipash paniguca semanapi quimsa viajeta cayashpami catirca. Shinami pi telefonota cantestajman paniguca predicanlla carca. Shina rurashpami paniguca huaquin gentecunaman Bibliamanda yachachi callarirca.

 Shuj punllaca Daiane paniguca paipa cusandimi telefonopi chai pueblomanda shuj jovencitoman Bibliamanda yachachinajurca. Shinapimi shuj religionbi ñaupaman pushajca paicuna imata parlanajujta ali ali uyangapaj munashpa chai jovencitoman ashtahuan quimirirca. Chai jarica paipash Bibliamanda yachajungapaj munashpami Daiane paniguhuan y paipa cusahuan parlarca.

 Tiempohuanmi Daiane panigupash y paipa cusapash 6 personacunaman estudiota cui callarirca. Ashtahuangarin shuj religionbi ñaupaman pushaj personamanbashmi Bibliamanda yachachinajun. Cunanbica huaquingunami chai cabinapa telefonotallata utilizashpa tandanajuicunata uyai ushashca. Bibliamanda shuj estudiantecarin, huauquipanicuna Bibliamanda yachachijuj horas tucuicuna aliguta uyangapaj nishpami shuj bancoguta rurashca.

 Daiane panigu y paipa cusapash Jehová Diospa Gobiernomanda caru caru llactacunapi causaj gentegucunaman villachi ushashcamandaca ninanda cushijushcami can. Paniguca cashnami nin: “Jehová Diosca na fácil chayana caru caru pushtucunapipash paipa Gobiernomanda ali villaigucunata gentecuna yachachunmi imagutapash ruran” nircami.