Chai guerra civilca casi quimsa huatatami Españapica pararca. Chai guerramandami gentecunaca heridocuna quidarca. Emocionalmentepash nalimi quidarca. Ñuca taitapashmi ninandami afectarirca. Ñuca taitaca siempremi Taita Diospi crin carca. Pero católico sacerdotecuna guerracunapi satirishcata ricushpami, paica nimamanda nalicachishpa llaquilla sintirirca. Chaimandami ñuca huauquita y ñucataca católico iglesiapi bautizangapaca na munarca.

 Año 1950pimi ishcai testigo de Jehovacunaca ñucanchi punguta huactachirca. Ñuca taitaca paicuna imata nijta uyashpami, cada semana Bibliata paicunahuan estudiai callarirca. Chai punllacunapica, ñucaca solo 14 huatagucunatallami charircani. Futbolpillami pensarin carcani. Ñuca taitaca, testigo de Jehovacuna paiman saquishca publicaciongunata ñuca liichunmi munan carca. Pero ñucaca na munanllu carcani. Shuj punllaca, futbolta pugllashpami huasimanga chishi tigrarcani. Tigrashpaca ñucaca mamitataca “mamita, ¿Bibliamandacunaca cutinllu caipi tianajun?” nishpa tapurcani. Chaimi mamitaca “ari, caipimi canba taitahuan comedorpi tianajun” nirca. Shina nijpimi calpashpa cutin calleman tigrarcani.

 Bibliata ñuca na gushtajpipash ñuca taitaca na desanimarishpami estudiashpa catirca. Bibliapi imata yachajushcata ninanda alicachishpami huata 1935pica bautizarishpa testigo de Jehová tucurca. Bautizarijpimi ñucaca ¿imashpashi bautizarirca? yashpa pensarircani. Shuj shuj tapuicunatami rurarcani. Ñucapacha shuj Bibliata charingapaj munashpami shuj Bibliata mañarcani. Ñuca taitaca, Máximo Murcia shuti joven huauquigu ñucaman Bibliata yachachichunmi paihuan parlarca. Ishcai huatacuna jipaca, ña 19 huatacunata charishpami, Madrid llactapi Jarama shuti riopi bautizarishpa testigo de Jehová tucurcani.

 Año 1950cunapica, predicana y tandanajunaca na facilchu carca. Chai punllacunapica, Francisco Francomi Españapica mandajurca. Paica dictadormi carca. España llacta entero católico cachunmi munarca. Chaimandami policiacunaca testigocunataca ashta catirian carca. Chaimi Testigocunaca huasicunapi pacalla tandanajun carcanchi. Vecinocuna ama imatapash sintishpa ama policiacunaman denunciachunmi cuidadota charin carcanchi. Shinallata cuidadohuanmi huasin huasin predican carcanchi. Maijanbash ishcai o quimsa huasicunata agllashpami chaicunapi predican carcanchi. Chai jipaca ñapashmi shuj ladopi predicangapaj rin carcanchi. Ashtaca gentecunaca alimi uyan carca. Pero shujcunaca na gushtanllu carca.

 Shuj pungupi huactachijpica, shuj sacerdote catolicomi llujshirca. Predicanajushcata villajpica, chai sacerdoteca “predicanajuchunga ¿pita cangunamanga permisota curca? Policiaman denunciai ushanataca ¿nachu yachanguichi?” nishpami tapurca. Chaimi ari yachapanchimi nircani. Shinallata nircanimi: “Jesustapash paipa contracuna preso japingapaj munashca cajpica, paipa discipulocunatapashmi preso japingapaj munanga” nircanimi. Shina nijpimi sacerdoteca culirashpa policiata cayangapaj ucuman yaicurca. Chaimi ñucaca ucha calpashpa rircani.

 Chai punllacunapica huaquin publicadorcunallami España llactapica tiarca. Huaquin gentecuna, por ejemplo chai sacerdote na uyangapaj munajpipash, ashtaca gentecunaca yachajungapaj munanmi carca. Febrero de 1956pica, 19 huatacunatallami charircani. Chai punllacunapimi precursor especial a tucurcani. Ashtaca precursor jovengunaca na experienciata charinllu carcanchi. Chaimi pipash animachun, yachachichun minishtinajurcanchi. Pero antsicarin chaipica misionerocunami tiarca. Paicunami ñucanchimanga yachachirca y animotapash curca.

 Ñucataca Alicante shuti llactamanmi shuj joven precursorhuan cachahuarca. Chai llactapica, predicacionga nara tiarcachu. Huaquin quillacunapica, ñami gentecunamanga Bibliata yachachinajurcanchi y ashtaca ashtaca publicaciongunatapashmi gentecunamanga saquishcarcanchi.

 21 huatacunata charijpimi, servicio militarta rurachun, Nador llactapa cuartelman presentarichun cayahuarca. Chai punllacunapica, chai cuartelca España llactata cuidangapami Marruecos llacta jahua ladoman carca. Tenientemanga aliguman pero seguro cashcata ricuchishpami, ni cuartelmanbash na rishachu ni soldadocunapa uniformetapash na churajushachu nircani. Policía militarca, Melilla llactapi Rostrogordo carcelmanmi shuj tribunal juzgachun ñucataca chaiman cacharca.

 Marruecos llactapi comandante militarca, ñucata aliguta pensachingapami munani nircami. 20 minutocuna enterotami casi juizu chingashpa alpaman shitaringacaman, rimanajuhuarca, azialanajuhuarca y jaitaitapash jaitanajuhuarca. Shina macashpapash na contentashpami, capitanga yahuar llujshingacaman paipa soldado botashuan ñucataca umapi saruhuarca. Chai fuerapash, “candaca macasharami. Cada punllami ashtahuan macasha” nishpami caparihuarca. Guardiacunataca ñucata shuj calabozopi vichachunmi mandarca. Chai calabozoca yana yana utujumi carca. Chaimandaca ñana llujshishachu yarcanimi.

 Umapash yahuarsapa alpapi sirijushcataca, ali alimi yarini. Shuj chuya fachagutallami charircani, nimata na cununllu carca. Huaquinbicarin ratacunallami cumbamun carca. Chai ucuca chiri chiri, yana yana ucumi carca. Aguantangapaj fuerzata carahuai nishpami Jehová Diosta mañaitalla mañan carcani. b

 Cayandi punllaca cutinmi macahuarca. Pero chaipica shuj cabomi macahuarca. Capitanga pai munangacaman macachunmi ricujurca. Cunangaringash ñana aguantai ushashachu yashpami pensarijurcani. Chai tutaca calabozopi cashpami Jehová Diostaca ayudahuai nishpa mañarcani.

 Ña quimsa punlla tucujpica, cutinmi capitanba oficinaman cayachun cachahuarca. Cutinmi macai tucugrini yashcami rijurcani. Oficinaman apanajujpica, Jehová Diosta mañashpandimi rijurcani. Chaipica don Estebanmi cashcarca. Paica tribunal militarpa shuj juezmi cashcarca y ñucata juzgangapami shamushcarca.

 Don Esteban ñucapa umata telacunahuan huatashcata ricushpami, ima pasashcata tapuhuarca. Primerollaca, jipamanga macai tucushami yashpami manllaimandaca ima pasashcataca na parlangapaj munarcani. Pero jipamanga villarcanillatami. Macai tucushcata villajpica, “tribunal militar ama juzgachunga na imatapash rurai ushashachu. Pero cutin shinapacha macachunga na saquishachu” nircami.

 Pai nishcashnaca, carcelpi cashca tiempotaca nipipash na cutinga macahuarcachu. Chai juez imamanda chai punlla ñucata ricungapaj shamushcataca na yachanichu. Pero Jehová Dios ñuca oracionda uyashcataca seguromi cani. Jehová Diosmi ninan jatun llaqui horacunapica ayudahuashca. Shinallata ñuca aguantai ushana llaquicunatalla charichunmi saquihuashca (1 Corintios 10:13). Chai jipaca shuj juicio militartami charircani. Pero Jehová Dios ayudanataca seguromi carcani.

 19 huatacunata carcelpi cachunmi sentenciahuarca. Jipamanga na cazunata yachanllu nishpami shuj quimsa huatacunatapash carcelpi cachun sentenciahuarca. Huata yalitami Marruecos carcelpi carcani. Chai jipami chaishuj huatacunata completachunga España, Ocaña llactapi carcelman yalichihuarca. Chai llactaca Madrid llactamanda ladollami carca. Chai carcelman yalichijpica, Jehová Dios bendiciajujtami sintircani. Porque chai carcelta Rostrogordo carcelhuan comparashpa ricujpica, juyailla carcelmi carca. Chaipica camatapash, colchondapash y huaquin jatanacunatapashmi charircani. Huaquin tiempo jipaca chai carcelpi contabilidadta rurachunmi churahuarca. Shinapash huaquinbica solollami sintirin carcani. Congregacionbi huauquipanicunahuan na cashpami llaquilla sintirin carcani.

 Huaquinbi huaquinbica ñuca taitamama visitahuanmi carca. Pero shinapash ashtahuan animotami minishtijurcani. Paicunaca, shuj huauquicunapash na servicio militar rurangapaj munaimanda carcelpi cashcatami villahuarca. Chaimi Jehová Diostaca shuj huauquigutallapash ñuca cashca ucuman cachamuchun mañarcani. Jehová Diosca cutinmi ñuca imata mañashcataca uyarca. Asha tiempo jipallami carcelmanga quimsa huauquicunata cachamurca. Chai huauquicunaca alipacha huauquicunami carca. Paicunaca Alberto Contijoch, Francisco Díaz y Antonio Sánchez shuticunami carca. Ñucaca 4 huatacunatami sololla carcani. Pero por finmi shuj huauquicunahuan Bibliata igual estudiai usharcanchi y predicaitapash predicarcanchi.

 22 añospa sentenciajpipash, solo 6 huata y chaupitallami carcelpi carcani. 1964pica libertad condicionaltami cuhuarca. Cacharishca punllallatami, ashalla ahorrashca culquihuanga, a tiempo yachangapaj taxita japishpa Madrid llactapi reunionman rircani. Ñuca huauquipanicunahuan cutin tandanajushpaca cushijushcapachami carcani. Precursoradota uchashpa japingapapashmi munarcani. Ashtaca gentecunami ayudachun minishtinajurca. Policiacuna catiriashpa na saquinajujpipash, ashtaca gentecunami ali villaicunataca uyanajurca.

 Chai tiempopimi Mercedesta rijsircani. Mercedesca shuj joven precursora especialmi carca. Paica humilde humildemi carca. Tucui gentecunata predicanatami gushtan carca. Shinallata, cushilla, generosami carca. Jipamanga enamorarishpami shuj huata jipaca cazararcanchi. Mercedesca Jehová Dios carashca bendicionmi can.

 Cazarashcamanda huaquin quillacuna jipami congregaciongunata visitachun invitarca. Chaimi cada semana shuj shuj congregacionmanda huauquipanicunahuan tandanajui y predicai usharcanchi. Españapica shuj shuj congregaciongunami tiai callarirca. Huauquipanicunaca ayudachun, animachunmi minishtinajurca. Chai punllacunapica, Barcelona llactapimi testigo de Jehovacunapa sucursalca pacalla funcionajurca. Shuj tiempotaca chai sucursalpipashmi sirvijurcani.

 1967pimi España llactapa gobiernoca, libremente Taita Diosta adorana libertadta curca. Chaimi ñana pacajun carcanchi. Shinallata año 1970picarin, reconocimientota charij religión cangapami testigo de Jehovacunaca reconocimiento legalta charircanchi. Chaimi por fin ñucanchi propio Salón del Reinocunata charircanchi y sucursal pungucunatapash pascarca.

 Año 1971pimi, Mercedesta y ñucataca Barcelona Betelpi sirvichun invitarca. Shuj huatagutallami chaipi carcanchi. Porque shuj huatahuanga ñuca huarmiguca vijsayu quidashpami ñucanchi ushi Abigailta ungurca. Shinaca ñana Betelpi quidaita usharcanchichu. Cunanga ñucanchi ushiguta viñachina asignaciondami charircanchi.

 Abigail ña solteragu tucujujpimi sucursalmandaca, ñachu congregaciongunata cutin visitangapaj munanguichiman nishpa tapurca. Chaimi como siempre Jehová Diosta mañarcanchi y experienciata charij huauquicunahuan parlarcanchi. Shuj anciano huauquica nircami: “Jesús, tigramui ninajujpica, ari ninallami cangui”. Shinami cutin shuj asignacionbi cushilla sirvi callarircanchi. Primerollaca, Abigailta cuidashpa catingapami, ladolla congregaciongunata visitan carcanchi. Pero jipamanga, Abigailca ashtahuan viñashpami ñana ñucanchitaca minishtirca. Chaimi ñucanchicunaca servicio de tiempo completo especialpi Jehová Diostaca sirvi usharcanchi.

 Mercedes y ñucaca 23 huatacunatami congregaciongunata visitanajushcanchi. Chai tucui huatacunapica, ñuca pasashca cosascunata parlashpami jovengunataca animai ushashcani. Shinallata, huaquinbicarin Madrid llacta Betelpi hospedarishpami, ancianocunapa escuelacunapi, siervos de tiempo completopa escuelacunapi instructor cashcani. Cunanbi sucursalca, 1955pi ñuca bautizarishca río Jarama nishcamanda quimsa kilometrocuna carupillami can. Huaquin huatacuna jipa, cai sectormanllata tigramushpa, Jehová Diosta ashtahuan sirvichun ashtaca huauquipanicunata ayudanataca yaitallapash na yarcanichu.

 Año 2013mandami cutin precursor especialcuna cashcanchi. Congregaciongunata visitashpa purinata saquinaca na facilchu cashca. Pero mejormi cashca. Porque ultimamenteca, ñuca saludhuanga shuj shuj problemacunatami charipashcani. Por ejemplo, shungutami operahuarca. Chai operacionga gravellami carca. Chai ratocunapica Jehová Diospa ayudatami mañashcani. Paica chai ratocunapipashmi como siempre ayudahuarca. Ñuca huarmiguhuanbash ñami 56 huatacunata igual Jehová Diosta sirvinajupashcanchi. Paishna ali cumbagutaca nimaipi na taripaimanllu carcani.

 Instructor cashca punllacunataca cutin cutinmi yaripani. Joven estudiantecunaca, imashinami Jehová Diosta cushijushpa sirvi callarircani, shinallatami paicunapash cushijushcacuna ricunajun. Shinlli pruebacunatami aguantana tucushcani. Shinapash alipacha, juyailla experienciacunatami charipashcani. Ninan difícil ratocunapipash shuj alipacha yuyaitami yachajupashcani, ñucapa fuerzacunapillaca na confianachu cashcani. Ñuca causaipi ima jatun llaquicuna ricurijpi o ima pruebacuna ricurijpipash chaicunata aguantangapaj fuerzata carashcamandaca Jehová Diostami agradicipani (Filipenses 4:13).