Cai mundopica maipipashmi injusticia tian. Cati ishcai ejemplocunata ricupashun:

•   Enero de 2018 huatapica, Estados Unidosmanda shuj juezaca casi 38 huatacuna carcelpi cashca shuj jaritami libre saquirca. ADN pruebami inocente cashcata ricuchirca.

•   Septiembre de 1994 huatapica, Africamanda shuj llactapica, paicunapa concienciamanda cuartelman na ringapaj munajpimi 3 jovengunataca carcelman aparca. Paicunaca septiembre de 2020 huatapaca, ñami 26 huatacuna carcelpi carca. Paicunataca juiciotallapash na rurarcachu, legalmentepash na culpable carcachu.

 Quiquinbash shuj injusticiata sufrishca cashpaca, Job runagushnachari sintiripangui. Paica nircami: “Ninanda caparijujpipash, ñucamandaca pipash na alita rurangachu” nishpa (Job 19:7). Ciertopacha justicia tiana shuj muscui shina cajpipash, Bibliapica shuj punllaca tucuicunapami justicia tianga ninmi. Chaicamanga, cunan punllacunapi injusticiacuna tiajpipash Bibliapa consejocunami aguantashpa catichun ayudai ushan.

 Taita Diospa mandashcacunata na cazuimandami injusticiacunaca tiai callarin. Bibliapica ciertopacha justiciaca Taita Diosmandami shamun ninmi (Isaías 51:4). Bibliapica ‘ima [alita] rurana’, y ‘aliguta ricushpa mandana’ shimicunaca casi chaitallatami nisha nin (Salmo 33:5). ¿Imamandata shina ninchi? Imatapash alita rurana o Taita Dios mandashcashna cazunaca justicia tiachunmi ayudan. Shinapash shuj pecadota rurana o Taita Diospa mandashcacunata na cazunaca injusticiamanmi apan. Cai ejemplocunapi pensaripai:

•   Ñucanchipilla pensarimanda. Ñucanchipilla pensarina yuyaicunaca pecadomanmi apan (Santiago 1:14, 15). Ashtaca gentecunaca paicuna munashcata charingapaca shujcunamandami aprovecharin, injustamentepashmi tratan. Shinapash Taita Diosca shujcunapa beneficiopira pensarichunmi mandan (1 Corintios 10:24).

•   Na yachaimanda. Huaquin gentecunaca na yachaimandami shujcunataca injustamente tratan. Shinapash Taita Diospaca pecadomi can (Romanos 10:3). Jesustapash na yachaimandami gentecunaca injustamente huañuchirca (Hechos 3:15, 17).

•   Gentecunaca injusticiata tucuchingapaj munashpapash na ushashcachu. Politicocuna, negociocuna, religiongunapash tucui gentecunahuan justo, igual cana cashcata yachachina cashpapash, nalicunata rurashpalla, upachishpalla, agllashpalla, ashtahuan charingapaj munaihuan, culquitapash huaquingunamanlla repartishpa, pitapash na respetashpami gentecunataca llaquichishca. Chaimandami mundo enteropi ashtaca injusticiacuna mirashca. Chai organizaciongunapi alita rurangapaj munaj gentecuna tiajpipash, Taita Diospa mandashcacunata na cazuimandami chai ali munaicunaca fracasan (Eclesiastés 8:9; Jeremías 10:23).

 Taita Diosca injusticiacunataca na alicachinllu. Shinallata nali munaicunata, nali ruraicunatapash na ricunayachinllu (Proverbios 6:16-18). Profeta Isaiasmanga cashnami escribichirca: “Mandaj Dios ñucaca, imatapash aliguta ruranatami juyani. Shuhuashpa ñucaman cushpa tucuillata rupachijcunataca, na ricunayanllu” nishpa (Isaías 61:8). a

 Israelitacunaman Leyta cushpaca Taita Diospaca justo cana importante cashcatami ricuchirca. Chaimandami juezcunataca pipash imatapash pacalla pagangapaj o cungapaj munajpica na chasquinachu canguichi, tucuipimi justo cana canguichi nishpa mandarca (Deuteronomio 16:18-20). Taita Diosca paipa mandashcacunata na cazushpa pobrecunamanda, imagutapash na charijcunamanda aprovecharij israelitacunataca na ricunayachircachu (Isaías 10:1-3).

 Ari tucuchingami. Injusticiacunaca pecadomandami tian. Taita Diosca injusticiacunata tucuchingapaca Jesustami agllashca. Shinami gentecunaca perfectocuna canga, Taita Dios munashcashnapash causai ushanga (Juan 1:29; Romanos 6:23). Shinallata jahua cielopi shuj gobiernotami churashca. Cai gobiernoca tucuicunahuanmi justo canga (Isaías 32:1; 2 Pedro 3:13). Cai gobiernomanda ashtahuan yachangapaca, Taita Diospa Reinoca ¿imata can? videota ricupangui.

 Taita Dios carasha nishca mushuj alpapi justicia ña tiajpica, tucuilla gentecunami tranquilo, seguro causanga (Isaías 32:16-18). Taita Diospaca tucui gentecunami igual can. Chaimandami tucuicunata igual tratanga. Injusticiacunamanda llaqui, desesperación, nanaicunahuan causaica para siempremi tucuringa. Ñucanchita injusticiahuan tratashcamanda nali sintichij yuyaicunapash asha ashami chingaringa (Isaías 65:17; Apocalipsis 21:3, 4). Caimanda ashtahuan yachangapaca, “Taita Diospa Reinoca ¿imatata ruranga?” temata liipangui.

 Ari. ¿Imamanda shina ninchi? Bibliapi parlashca profeciacunaca ciertopachami pactarishca. Shinallata, Bibliapi parlashca fechacunapash, cienciamanda parlashca datocunapash exactomi can, nunca na pandarishcachu. Chaimandami Taita Dios Bibliapi escribichishca promesacunapi confiai ushanchi. Ashtahuan yachangapaca cati enlacecunata ricupai:

•   Biblia cabalta nijushcataca ¿imamandata crita ushanchi? (video)

•   “¿Maijan profeciacunata pactarishca?”

•   “Historial profético intachable”

•   “Razones para confiar en la Biblia”

 Bibliapica injusticiacuna tiajpi ali gentecuna na maqui cruzado quidashcatami parlan. Por ejemplo, apóstol Pablotaca shuj juicio injustotami ruragrijurca.Chai juiciohuanga Pabloca huañuitapashmi huañui ushanman carca. Chai juiciota yangata ricunapa randica, Pabloca chai tiempopi Leycunapimi apoyarirca, Roma llactapa rey juzgachunbash mañarca (Hechos 25:8-12).

 Shinapash, ñucanchicunaca cai mundopi injusticiacunata tucuchingapaj esforzarishpapash nunca na tucuchi ushashunllu (Eclesiastés 1:15). Shina cajpipash, ashtaca gentecunaca Taita Diospa promesacunapi confiana ayudashcatami cuenta urmashca. Shuj punlla injusticiacuna tucurinapi seguro canami ama yapa preocupado, tranquilo sintirichun ayudan.