1, 2. Huaquin gentecunaca ¿imatata Taita Diosmandaca yan?

ASHTACA gentecunaca yanmi, ñucanchi imata rurajpipash, ima pasajpipash Taita Diospaca na importanllu nishpa. Noviembre de 2013​pica, mar ladopi manllanai huairahuan tamia jatarishpami, Filipinas llactapa ashtaca pueblocunata tucuchirca. Chai jatun llaqui jipaca shuj alcaldeca nircami: “Taita Diosca imacunapipash ocupado cashpami na ayudashcanga” nishpa.

² Cutin shuj gentecunaca Taita Dios paicunata na ricujujpishnami causan (Is. 26:10, 11; 3 Juan 11). Shina gentecunamanda parlashpami apóstol Pabloca nirca: Paicunaca ‘Taita Diosta catingapaj na munashpami imatapash cashcatapacha na rurashpa, huainayashpa, jatun nalita rurashpa, charijyashpa, imatapash nalitalla rurashpa causanajun’ nishpa (Rom. 1:28, 29).

3. a) ¿Imatata tapurina capanchi? b) ¿Imatata Diospa maqui nin?

³ Jesusta catijcunaca Taita Dios tucuita ricujushcataca alimi yachanchi. Shinapash, Taita Dios ñucanchita juyajta, ayudajtaca ¿ciertopachachu crinchi? Bibliapica Jehová Diospa podermanda parlangapami, huaquinbica Diospa maqui nin. Jehová Diosca paipa  maquihuanmi paita sirvijcunata ayudan, contracunatapash mishan (Deuteronomio 26:8, liingui). ¿Taita Diosta ricujunshnachu causanchi? Jesusca nircami, huaquingunaca Taita Diosta ricungami nishpa. Ricungami nishpaca, Taita Dios paicunata imashina ayudajushcata cuenta japinatami nijurca (Mat. 5:8). Caita ali intindingapaca huaquin ejemplocunata ricushun.

4. Israelitacunapa contracunaca ¿imamandata Jehová Dios ayudajushcata na cringapaj munarca?

⁴ Israel llacta tiai callarijpica, Jehová Dios paipa llactata imashina cuidajujtaca ashtaca gentecunami ricui usharca. Huaquingunacarin paicunapachami Jehová Dios imashina ayudajujtaca ricurca. Jehová Diosca israelitacunataca esclavo cashcamandami salvarca. Jipamanga, Canaán llactamanda ashtaca reycunatami misharca (Jos. 9:3, 9, 10). Israelitacunata Jehová Dios salvashcata ricushca jahuapash, huaquin reycunaca israelitacunahuan macanajungapami paicunapura parlarirca (Jos. 9:1, 2). Chai reycuna israelitacunahuan macanajushpaca, Jehová Dios israelitacunata ayudashcata ricushcangami. Jehová ayudajpimi “indipash, lunapash shayarishpa quedarca. Israelcunata fiñajcuna llaquichishcashnallata, paicunatapash llaquichingacamanmi, chashna shayarirca” (Jos. 10:13). “Paicunataca, israelcunahuan macanajuchunmi, Mandaj Diosllata shinlli shunguta rurarca” (Jos. 11:20). Contracunaca israelitacunata Jehová Dios cuidajushcata na crimandami mishai tucurca.

5. ¿Imatata rey Acabca na cringapaj munarca?

⁵ Ashtaca huatacuna jipaca, rey Acabpashmi Jehová Diospa poderta ricui usharca. Profeta Eliasca rey Acabtaca nircami: “Cai huatacunapica, na tamiangachu, jamzi paramullapash na urmangachu. Ashtahuangarin ñuca mandajpillami tamianga” nishpa (1 Rey. 17:1). Eliaspa shimicuna pactarijpipash, rey Acabca Jehová Diospa podermanda na tamiashcataca na cringapaj munarcachu. Jipa punllacunamanga, Eliasca jahua cielomanda nina urai shamushpa sacrificiocunata rupachichunmi Jehovata mañarca. Chai milagrotaca rey Acabca ricurcami. Ashtahuanbash Eliasca nircami, Jehová Diosmi paipa poderhuan cutin tamiachinga nishpa. Chai shimicuna pactarijtapashmi Acabca ricurca (1 Rey. 18:22-45). Chai milagrocunata ricushpapash, Jehová Dios paipa poderhuan tucuita pactachijujtaca na cringapaj munarcachu. Cai ejemplocunata ricushpami Jehová Dios ayudajushcata ricungapaca, yaipi cana cashcata intindinchi.

6, 7. ¿Imatata gabaonitacunapash Rahabpash crirca?

⁶ Nali reycuna Jehová Dios ayudajta na crijpipash shuj gentecunaca crircami. Gabaonitacunamanda ricushun. Canaán llactamanda reycuna shina canapa randica, gabaonitacunaca israelitacunahuan ali cangapami parlarirca. ¿Imamandata shina rurarca? Paicunaca Josuemanga cashnami nirca: ‘Canda sirvijcunaca, canda Mandaj Taita Diospa shutita tucui rijsishca cashcata yachashpa, Egiptopi imatalla rurashcata yachashpami shamupanchi’ nishpa (Jos. 9:3, 9, 10). Gabaonitacunaca ali yuyaita charishpami Jehová Dios israelitacunata ayudajushcata intindirca.

⁷ Rahab shuti huarmipash israelitacunata Jehová Dios ayudajujta crircami. Rahabca israelitacunata Egiptomanda llujchishcata ali yachashpami, ishcai israelitacuna paipa huasiman chayajpica cashna nirca: ‘Mandaj Dios cai llactata cangunaman carashcataca yachanimi’ nishpa. Ashtahuanbash, chai ishcai israelitacunata ayudana peligroso cajpipash Rahabca ayudarcami. Shinallata Jehová Dios paita, paipa familiatapash salvanatami crirca (Jos. 2:9-13; 4:23, 24).

8. ¿Imatata huaquin israelitacunaca crirca?

 ⁸ Rey Acabta cutin yarishunchi. Cielomanda nina urai shamujpica, Eliaspa mañashcata Jehová Dios uyashcataca Acabca na cringapaj munarcachu. Shinapash, huaquin israelitacunaca Jehová Dios chai milagrota rurashcata crishpami, cashna nishpa caparinajurca: “Mandaj Diosmari, Taita Diospacha” can nishpa (1 Rey. 18:39).

9. ¿Imashinata Jehová Diospa ayudata ricui ushapanchi?

⁹ Ali ejemplocunata, nali ejemplocunata ricunami, Jehovapa poder o maqui ima cashcata intindichun ayudan. Jehová Dios imashina cashcata ali yachajcunaca, Jehová poderta charishcata, ayudajushcatami tucui shunguhuan crin. Chaimandami, ñucanchicunapash punda tiempopi Jehovata ali sirvijcuna cuenda cangapaj munanchi. Shinapash ¿imashinata cunanbipash Jehová Dios paita sirvijcunata ayudajujta yachai ushanchi?

10. Cunanbipash Jehová Dios ayudashpa catijujtaca ¿imashinata yachapanchi? (Callari dibujota ricupangui.)

¹⁰ Jehová Dios gentecunata ayudajujta cringapaca ashtaca ejemplocunatami charinchi. ¿Nachu Taita Diosta ayudahuai nishpa mañajpi, gentecunata ayudashcataca cutin cutin uyashcanchi? (Sal. 53:2.) Shuj ejemplota ricupashun. Shuj huauquica Filipinas llactapimi huasin huasin villachijurca. Shuj huarmiman villachi callarijpica, chai huarmica huacai callarircami. ¿Imamandata huacai callarirca? Chai huarmica chai punllallatami Testigocuna shamuchun Jehovata mañashcarca. Joven cashpaca chai huarmica Testigocunahuanmi Bibliata yachajushcarca. Shinapash, cazarashpa shuj llactapi causangapaj rishpami, Testigocunahuanga ñana yachajushpa catita usharca. Chaimandami, Jehovata mañajpi uchalla contestashcata ricushpaca, cushijuimanda huacarca. Chai huarmica narapash huata pactajpillatami bautizarirca.

11, 12. a) ¿Imashinata Jehová Diosca gentecunata ayudajun? b) Amy shuti paniguca ¿imashinata Jehovapa ayudata chasquirca?

¹¹ Ashtacacunami paicunapa causaipi Jehová ayudajushcata ricushca. Huaquingunaca tabacota, drogacunata chupanata, pornografiata ricuna viciotami charishca. Paicunaca chai viciocunata saquingapaj munashpapash na usharcachu. Shinapash, Jehová Diosta rijsishpami paicunaca Jehová Dios ayudachun mañarca. Shinami, Jehová Diosca “ninan ushaita” cushpa chai nali viciocunata saquichun paicunataca ayudashca (2 Cor. 4:7; Sal. 37:23, 24).

¹² Jehová Diosca ashtaca huauquipanicunatapash ñaupaman catichunmi ayudashca. Amy shuti panigu ima tucushcata ricupashun. Paica Isla del Pacificopa shuj uchilla llactagupimi testigo de Jehovacunapa Tandanajui Huasita, misionerocuna causana huasita rurashpa ayudangapaj rirca. Chai llactapi cashpaca shuj uchilla hotelpimi parajurca. Ayudangapaca cada punllami chaquilla rina tucurca. Ñangunaca casi siempremi yacu junda yalin carca. Yacupash, michapash rijunllami carian. Chaipi causanaca shinllimi carca. Shuj punllacarin, culira cashpami paihuan trabajajuj cumbataca shinllita caparirca. Amy paniguca ninmi: “Hotelman chai chishi tigrajushpaca nali, nimapapash na sirvij shinami sintirircani. Shina sintirijushca jahuami hotelman chayajpica michapash illashcarca. Cuartopi cashpaca, Jehová Diosman tucui tucuita villashpami ayudahuai nishpa mañarcani” nishpa. Amy paniguca ña micha shamujpica, Galaad escuelapi graduarishcacunamandami La Atalaya revistapi lii callarirca. Chaipica shuj costumbrecunamanda, shujcunahuan ali llevarinamanda, na llaquilla canamandami parlajurca. Chai panigu imacunatalla pasajushcatami chai revistapica parlajurca. Chaimandami Amy paniguca nin: “Jehová Dios chai rato ñucahuan parlajushcatashnami sintircani. Chaimi ñaupaman  catichun ayudahuarca” nishpa (Sal. 44:25, 26; Is. 41:10, 13).

13. Jehovata sirvijcuna villachishpa catichunga ¿imashinata paica ayudajun?

¹³ Jehová Diosca villachinata gentecuna ama jarcachunbashmi paita sirvijcunataca ayudajun (Filip. 1:7, NM). Mundo enteropimi gobiernocunaca Testigocuna ama villachichun jarcangapaj munashca. Shinapash, huata 2000manda cunangamanga 268 juiciocunatami juzgadocunapi ganashcanchi. 24 juiciocunataca Tribunal Europeo de Derechos Humanos nishcapimi ganashcanchi. Imashinami ricunchi, Jehová Dios paipa sirvijcunata ayudachunga nipi na jarcaita ushanllu (Is. 54:17; Isaías 59:1, liingui).

14. Jehová Dios ñucanchicunata ayudajushcataca ¿imacunapita ashtahuan ricui ushapanchi?

¹⁴ Jehová Dios ayudajpillami mundo enteropi ali villaicunataca villachi ushashcanchi (Mat. 24:14; Hech. 1:8). Shinallata, Jehová ayudajpillami tucui llactacunamanda huauquipanicunapash shujlla familia shina caita ushanchi. Shina ali canataca ni pipash na cati ushashcachu. Chaimandami, ashtaca gentecunaca na Testigo cashpapash cashna nishca: “Taita Diosca, cangunahuambachami” can nishpa (1 Cor. 14:25). Tucui caicunata ricushpami, Jehová Dios ñucanchicunata ciertopacha ayudajushcata cuenta japinchi (Isaías 66:14, liingui). Shinaca, cada uno cashna tapurishunchi: “¿Jehová Dios ñucata ayudajujta cuenta japinichu?” nishpa.

15. ¿Imamandata Jehová ayudajujta cungai ushapanchi?

¹⁵ Huaquinbica, ñucanchi llaquicunapi yapata pinarishpami Jehová Dios ñucanchicunata ayudashcata, ayudashpa catijushcataca na cuenta japinchi. Profeta Elías ima pasashcata ricushun. Reina Jezabel huañuchishami nijpica, Eliasca manllaimandami Jehová Dios imashina ayudashcata cungashpa, huañuitapash huañungapaj munarca (1 Rey. 19:1-4). Shinapash ¿imashinata Eliasca manllaita saquishpa ñaupaman catita usharca? Eliasca Jehová ayudajpillami ñaupaman catita usharca (1 Rey. 19:14-18).

16. Llaquicuna japijpi Jehová Dios ayudajujta ricungapaca ¿imatata rurana capanchi?

¹⁶ Job runagupash paipa llaquicunapilla yapata pensarijuimandami, Jehová Dios imashina  ayudajushcata cungarca (Job 42:3-6). Ñucanchicunapashmi llaquicuna japijpica Jehová Dios ayudajujta cungai ushanchi. Shina pasajpica ¿imatata rurana canchi? Bibliata liishpami, liishcapi pensarina canchi. Shinami Jehová Dios tiajta, ñucanchicunata ciertopacha ayudajujta cuenta japishun. Ashtahuanbash, Job shinami cashna nishun: “Ñucaca, parlajtallami canmandaca uyan carcani. Ashtahuangarin cunanga candaca, ñuca ñavihuambachami ricujuni” nishpa.

17, 18. a) ¿Imacunapillata Jehová Dios ayudajushcata ricui ushapanchi? b) Jehová ayudashcamanda shuj experienciata parlapai.

¹⁷ Jehová Dios ñucanchicunata ayudajujta ashtahuan ali ricungapaca ¿imatata rurana canchi? Huaquin ejemplocunata ricushun. Huaquin huauquipanicunaca Jehovallata paita rijsichun ayudashcatami crin. Cutin shujcunaca, tandanajuipi yachachishcata uyashpaca chaitapachami uyangapaj munarcani nishcami. Cutin huaquingunaca, paicunapa mañaita Jehová Dios uyashcatami ricushca. Huaquingunaca, ashtahuan villachingapaj Jehová ayudashcatami cuenta japishca. Cutin shujcunaca tucui tandanajuicunaman ringapaj, villachinaman llujshingapaj trabajota saquina tucujpipash, ima minishtishcata cushpa Jehová ayudashcatami ricushca (Heb. 13:5). Jehová Dioshuan ali cashpaca, ñucanchicunata ashtacata Jehová ayudajujtami cuenta japishun.

¹⁸ Kenia llactamanda Sarah shuti paniguca ninmi: “Shuj huarmimanmi Bibliata yachachijurcani. Shinapash, yachajushcata na alicachijta shinami ricurcani. Chaimandami Jehová Diosta mañarcani, yachachishpa catinachu cani o saquinachu cani nishpa. Shinapash, mañaita tucuchi na tucuchimi telefonoca huacarca. Ñucahuan yachajuj huarmimi, tandanajuiman quiquinhuan rita ushanichu nishpa tapungapaj cayashcarca. Imata nitapash na atinarcanichu” nishpa. Ñucanchicunapash Jehová Dios imashina ayudajujta cuenta japingapami esforzarina canchi. Asia llactapi causajuj Rhonna shuti paniguca ninmi: “Jehová Dios ñucanchicunata ayudajujta ricunata yachajunami minishtirin. Jehová Dios ñucanchicunamanda ninanda preocuparishcata cuenta japishpaca ninandami cushijushun” nishpa.

19. Jehová Dios ayudajujta ricungapaca ¿imatata ashtahuan rurana capanchi?

¹⁹ Jesusca nircami: “Shungupi ima mapapash illajcunaca, ninandami cushijun. Paicunami, Taita Diostaca ricunga” nishpa (Mat. 5:8). ¿Imashinata ‘shungupi ima mapapash illajcuna’ caita ushanchi? Ñucanchi yuyaipi limpio cashpa, nalicunata na rurashpami limpio caita ushanchi (2 Corintios 4:2, liingui). Cai temapica, Jehová Dios ayudajta ricungapaca ñucanchicunapash paihuan ali canatami yachajushcanchi. Shamuj temapica, Jehová Dios ñucanchita ayudajta ashtahuan ali ricungapaca, feta charina minishtirishca cashcatami yachajushun.