1, 2. a) ¿Picunallata Cantares libromandaca yachajuita ushan? b) ¿Imamandata chai libromanda yachajuna capanchi? (Callari dibujota ricupangui.)

CHAIRALLA cazarashcacunaman discursota cushca huauquica paicuna cushijushpa ricunajujta, maqui japirishca shayanajujtami ricujun. Fiestapi paicuna cushilla bailanajujta ricushpacarin pensarinmi: Tiempo yalijpica ¿ashtahuan juyarishpa pacta causashpa catingacha, o asha ashacha caruyashpa catinga? nishpa. Cusahuarmicuna juyarishpaca aligutami causan. Ima llaquicuna ricurijpipash chai llaquicunata mishashpami ali causan. Shinapash cunanbi ashtaca cusahuarmicunaca ali causaita na ushashpami separarin. Chaimandami ashtacacunaca nin: ¿Ciertopachachu cusahuarmicunaca unaicaman juyarishpa causaita ushan? nishpa.

² Rey Salomonba punllacunapipash ciertopacha juyaj gentecunata tarinaca shinllimi carca. Chaimandami rey Salomonga nirca: ‘Huaranga jaricunamandaca shujtallami alita tarircani. Ashtahuangarin cai tucui huarmicunamandaca alitaca na tarircanichu. Taita Diosca runataca alitapachami rurashca. Paicunallatami jatun nalicunata mascanajurca’ nishpa (Ecl. 7:26-29). Chai punllacunapica Baal yanga diosta adoraj huarmicunami israelitacunapurapi  causanajurca. Paicunami israelitacunataca huaglichinajurca. Chaimandami rey Salomonga pitapash alitaca na tari ushanichu nishpa llaquirijurca. * Shinapash 20 huatacuna pundaman escribishca Cantares libropica jaripash huarmipash ciertopacha juyari ushajtami Salomonga escribirca. Shinaca, solterocuna cashpa cazadocuna cashpapash Cantares libromandaca ali yuyaicunatami yachajui ushapanchi. Cai libropica ciertopacha juyana ima cajtapash, juyashcata imashina ricuchinatapashmi yachajui ushapanchi.

3. ¿Imamandata jaripash huarmipash unaicaman juyarita ushan?

³ (Cantar de los Cantares 8:6, liingui. *) Rey Salomonga ¿imamandata “Jehovapa rupajuj ninamanda” parlarca? Yaripashun. Jehová Diosca paiman rijchatami gentecunataca rurarca. Chaimandami gentecunaca ciertopacha juyaita ushanchi (Gén. 1:26, 27). Adanga Evata ricushcandimi cushijuimandaca shuj juyailla shimicunata nirca. Evapash Adanba costillasmanda llujshishca caimandami Adandaca ninanda juyan carca (Gén. 2:21-23). Shinaca, juyana munaihuan Jehová Diosllata rurajpimi jaripash huarmipash unaicaman juyarishpa causaita ushanchi.

4, 5. Cantares libropica ¿imatata parlan?

⁴ Rey Salomón escribishca Cantares libroca Sunem (Sulem) llactamanda urcu cuitsagu, llamacunata michij huambraguhuan juyarishcatami parlan. Shuj punllaca chai cuitsagu paipa turicunapa uvas pambacunata cuidashpa purijujta ricushpami rey Salomonga chai cuitsaguta apachun cacharca. Chai cuitsaguta munashpa, imacunatapash nijujpipash chai cuitsaguca llamacunata michishpa purij huambraguta saquingapaca nimamanda na munarcachu (Can. 1:4-14). Llamacunata michishpa purij huambragupash cuitsaguta na saquingapaj munashpami rey apashca pushtuman rirca. Chaipimi paipa cuitsaguhuan tuparishpaca randimanda juyailla shimicunata nirirca (Can. 1:15-17).

⁵ Shinapash rey Salomonga cuitsaguta Jerusalenman apashpami rirca. Chaimi llamacunata michij huambraguca huashalla catishpa rirca (Can. 4:1-5, 8, 9). Cuitsaguca rey Salomón imata rurajujpipash, imata nijujpipash llamacunata michij huambragutaca nimamanda na cungarcachu (Can. 6:4-7; 7:1-10). Chaimandami rey Salomonga cuitsagutaca huasiman tigrachirca. Huasiman tigrachun saquijpimi cuitsaguca ñuca juyashca huambragu shuj tarugashna o shuj venadoshna uchalla calpashpa tuparingapaj shamuchun nirca (Can. 8:14).

6. ¿Imamandata rey Salomonga Cantares libropi picuna parlanajujcunapa shuticunataca na escribirca?

⁶ Rey Salomonga juyailla candanagutami Cantares libropica escribirca (Can. 1:1). Shinapash rey Salomonga picuna parlanajujcunapa shutitaca na escribircachu. Ashtaca cosascunata nijunapa randica juyailla shimigucunata, juyailla candanagucunatami Cantares libropica escribirca. Cantares libropi gentecunapa shuticunata na escribijpipash llamacunata michij huambragumanda, Sunem llactamanda cuitsagumanda parlajujtaca alimi intindirin. *

7, 8. Llamacunata michij huambragupash cuitsagupash ¿ima juyailla shimicunatata nirirca?

⁷ Cantares libropica shuj huambraguhuan shuj cuitsaguhuan juyailla shimicunata nirijtami parlan. Huaquin shimicunaca, tres mil huatacuna huashaman escribishca caimandami istalla uyarin. Shinapash llamacunata michij huambragu paipa cuitsaguhuan ninanda juyarishcataca alimi intindinchi. Cuitsaguta ninanda juyaimandami ‘canba ñaviguca palomagushnami ricujun’ nirca (Can. 1:15). Cuitsagupash huambraguta ninanda juyaimandami nirca, canba ‘ñavicunaca lechepi armashca yuraj palomacuna yacu manñapi tianajunshnami’ can nishpa (Cantar de los Cantares 5:12, liingui).

⁸ Paicunaca jahualla ricuipilla imashina cashcata parlashpapash shungu ucupi imashina cashcatapashmi alicachishpa parlarca (Cantar de los Cantares 4:7, 11, liingui). Chaimandami paipa juyashca cuitsagu shuj gentecunahuan cushilla parlajujta ricushpaca nirca: ‘Ñuca juyashca huarmigulla, canba shimimandaca balun mishquishnami llujshijun. Canba jallupica, balun mishquipash, lechepashmi tian’ nishpa. Huambraguca cuitsagupa parlashcacunata ninanda alicachishpami paipa parlashcacunataca mishquishna, lecheshnami can nirca. Ashtahuangarin: ‘Canga chaquimanda umacamanmi juyaillagu cangui. Canbica imapash nalica na tianllu’ nishpaca chai cuitsagu shungu ucupipash juyaillagu cashcatami parlajurca.

9. a) Cusahuarmicunaca ¿imashinata juyarina can? b) ¿Imamandata juyaita ricuchinaca minishtirishcapacha can?

⁹ Cazarashcacunaca na papelta firmaimandallachu igual causana can. Paicunaca randimanda juyarimandami igual causana can. Shinapash ¿imashinata juyarina can? ¿Bibliapi consejota catishpa tucui gentecunatashnachu juyana can? (1 Juan 4:8.) ¿Familiatashna, amigocunatashna, o imashinami jarita, huarmita juyanshnachu juyana can? (Prov. 5:15-20; Juan 11:3.) Cazarashcacunaca shuj gentecunatashna, familiatashna, amigocunatashna o jarita, huarmita juyanshnami randimanda juyarina can. Chaimandami cusahuarmicunaca imata rurashpa, imata nishpapash paicuna juyarishcataca randimanda ricuchina can. Ocupado caimanda o imacunatapash rurajuimanda huarmiman o cusaman juyaita ricuchinataca nimamanda na cunganachu can. Ishcandillata juyaita ricuchishpami cusahuarmicunaca cushilla, shujllashna tucushpa causaita ushan. Huaquin llactacunapica taitamamacuna parlarishpami churicunata, ushicunataca cazarachin. Shina cazarashca cashpapash, tiempohuanga huarmita, cusata aliguta rijsishpa, asha asha juyai callarishpami huarmita, cusata juyashcataca ricuchina can. Shina rurashpami cazarashcacunaca ashtahuan cushilla, ali causanga.

10. ¿Imamandata juyailla shimicunata nina, juyaita ricuchinaca alipacha can?

¹⁰ ¿Imamandata cusahuarmipura juyailla shimicunata nina, juyaita ricuchinaca alipacha can? Rey Salomonga ‘oro zarcillocunata, culqui botongunatami’ cuitsagumanga carangapaj munarca. Ashtahuangarin, ‘juyailla lunashna’ indishna punchapambagumi cangui nishpami cuitsagutaca paipa huambraguta cungachingapaj munarca (Can. 1:9-11; 6:10). Paipa huambragu carupi cajpipash, cuitsaguca rey Salomón imata carangapaj munajujpipash na chasquircachu, imata nijujpipash na uyangapaj munarcachu. ¿Imamandata cuitsaguca rey Salomondaca na ari nirca? (Cantar de los Cantares 1:2, 3.) Cuitsagupaca llamata michij huambragupa  juyailla shimicunami ‘vinotapash yali ashtahuan ali carca’. Juyaihuan parlashca shimicunata yarinami mishquilla ashnajuj aceitetapash yali ali carca (Sal. 23:5; 104:15). Shinaca, cazarashcacunaca huarmita o cusata juyashcataca cutin cutinmi nina can. Cada uno imata nishcata o imata carashcata yarishpami cusahuarmicunaca ashtahuan juyarishpa unaicaman cushilla, ali causai ushanga.

11. Cazarangapaj munajuj solterocunaca ¿imatata Sunem llactamanda cuitsagumandaca yachajuita ushan?

¹¹ Cazarangapaj munaj solterocunapash Cantares libromandaca ali yuyaicunatami yachajui ushan. Sunem llactamanda cuitsaguca rey Salomonda nimamanda na munashpami reypa huasipi huarmicunataca nirca, ñuca ‘juyaitaca na rijchachinachu canguichi’ nishpa (Can. 2:7; 3:5). ¿Imatata chai cuitsagumandaca yachajunchi? Na cazarana cashpaca na pitapash parlachi callarinachu can. Cazarangapaj munashpaca maijanda ciertopacha juyai ushanata taringacamanmi shuyana can.

12. ¿Imamandata Sunem llactamanda cuitsaguca llamata michij huambraguta ninanda juyarca?

¹² ¿Imamandata Sunem llactamanda cuitsaguca llamata michij huambragutaca juyarca? Huambraguca ali ñavimi carca. Chaimandami paitaca chairalla viñajuj venadohuan chimbapurarca. Ashtahuangarin chai huambragu shinlli cajpimi ‘oro surtijascunapi jacinto nishca rumita churashcashnami’ cangui nirca. Paipa changacunatapash ‘mármol nishca pilarcunahuanmi’ chimbapurarca. Sunem llactamanda cuitsaguca llamata michij huambragu ali ñavi, shinlli cajpillaca na juyarcachu. Llamata michij huambragu Jehová Diosta juyajta, ali shungu cajta ricushpami, cuitsaguca ninanda alicachishpa nirca, ‘sacha yura chaupicunapi manzana yuragushnami’ cangui, ‘ñuca juyashcagulla’ nishpa (Can. 2:3, 9; 5:14, 15).

13. Llamata michij huambraguca ¿imamandata Sunem llactamanda cuitsagutaca juyarca?

¹³ Llamacunata michij huambraguca ¿imamandata Sunem llactamanda cuitsagutaca juyarca? Chai cuitsaguca juyailla, ali ñavimi carca. Chaimandami rey Salomonbash ña ‘[60] jatun mandaj huarmicunata, [80] caishuj huarmicunata, jarihuan nara tacarishca cuitsacunata’ charishpapash Sunem llactamanda cuitsaguta ninanda munarca. Sunem llactamanda cuitsaguca Jehová Diostami tucui  shunguhuan juyan carca. Ali alimi carca. Paica humilde caimandami pambapi viñaj yanga rosas sisashna sintirin carca. Shinapash llamata michij huambragupaca ‘casha yura chaupipi lirio sisagushnami’ carca (Can. 2:1, 2; 6:8).

14. Llamata michij huambragumanda Sunem llactamanda cuitsagumandaca ¿imatata yachajupanchi?

¹⁴ Bibliapica yachachinmi, Jesusta catijcunaca ‘Jesuspi crijcunahuanllami’ cazarana can nishpa (1 Cor. 7:39). Shinaca bautizarishca, Jehovata juyaj huarmihuan, jarihuanllami Jesusta catijcunaca puri callarina o cazarana can. Shinapash ¿imamandata Jesusta catijhuanlla cazaranaca minishtirishcapacha can? Cazarashcacunapaca ashtaca llaquicunami ricurin. Chaimandami ishcandi cusahuarmicunaca Jehovapi apoyarishpalla, ali llevarishpalla, cushilla causaita ushanga. Cazarangapaj munajushpaca llamata michij huambragupa, Sunem llactamanda cuitsagupa ejemplota catishpami Jehovata ciertopacha juyaj, ali shungu huarmita o cusata mascana can.

15. Cazarangapaj ña purinajushpaca ¿imashinata Sunem llactamanda cuitsagupa ejemplota cati ushan?

¹⁵ (Cantar de los Cantares 4:12, liingui.) ¿Imamandata llamata michij huambraguca paipa cuitsagutaca vichashca huertagushnami can nirca? Huertataca pipash ama yangata yaicuchunmi gentecunaca vichashpa saquin. Chai cuitsaguca llamata michij huambragutalla juyaimandami vichashca huertagushnalla carca. Paihuan cazaranata yaria caimandami, rey Salomondaca nimamanda na chasquirca. Rey Salomonbaca shuj ‘jatun pircashnami’ carca. Na yangata pascariajuj pungushnachu carca (Can. 8:8-10). Cunanbipash, cazarangapaj ña purinajushpaca huarmi tucunamanlla, cusa tucunamanllami juyailla shimicunataca nina can. Ñana pitapash munashpa ricujunachu can.

16. Cazarangapaj purinajujcunamanga ¿ima consejotata Cantares libropica yachachin?

¹⁶ Shuj punllaca llamacunata michij huambraguca Sunem llactamanda cuitsagutaca jacu purishun nircami. Shinapash cuitsagupa turicunaca na richun saquircachu. Chaipa randica uvas pambacunata cuidachunmi cuitsagutaca cacharca. ¿Imamandata cuitsagupa turicunaca paicunalla puringapaj richunga na saquirca? ¿Paicuna imapash nalita rurangapaj rinajujta sintishpachu na cacharca? Na. Cuitsagupa turicunaca paicunata cuidangapaj munashpa, paicunalla cashpa imapash tentaciongunapi ama urmachunmi na cacharca (Can. 1:6; 2:10-15). Shinaca ¿imatata caipica yachachin? Cazarangapaj purinajushpaca Jehová Diospa ñaupajpi limpio ricuringapami cuidarina can. Tentacionbi ama urmangapaca ishcandilla rishpa chulunlla pushtucunapica na canachu can. Huarmi tucunata o cusa tucunata juyashcata ricuchina na jucha cajpipash, Jehová Diospa ñaupajpi ali ricurinataca yariami cana can.

17, 18. Cantares libromandaca ¿imatata yachajupashcangui?

¹⁷ Jehová Diosca cusahuarmicuna unaicaman igual causachun munashpami cazaranataca churarca. Ninanda cushijushpa, juyarishpa cazarashpapash unaicaman shinalla causangapaca ishcandillata juyarishpa catingapami esforzarina can (Mar. 10:6-9).

¹⁸ Cazarangapaj munajushpaca pita juyai ushanata ricushpami mascana capangui. Ña tarishpaca ashtahuan juyashpa catingapami esforzarina capangui. Imashinami Cantares libropi yachajushcanchi, ciertopacha juyanaca Jehovapa rupajuj ninashna caimandami ciertopacha juyaitaca ushanchi (Can. 8:6).