Juan 19:31​pi nishca shinaca, Jesustapash Jesuspa ladopi ishcai nali runacunatapash jatun racu caspipi huarcujpimi judiocunaca Pilatopaman rishpa nirca: Paicunapa chaquicunata faquishpa uriajuchipai nishpa.

Moisesman cushca Leypica ninmi carca, nali ‘runapa cuerpotaca caspipi huarcushpa tucui tuta pacarichunga, na saquinachu canguichi’ nishpa (Deuteronomio 21:​22, 23). Judiocunaca romanocuna huañuchishca gentecunatapash shinallatami ruran cashcanga. Jesustapash Jesuspa ladopi huarcui tucushca ishcai runacunatapash chaquicunata faquijpica uchami huañunman carca. Shinami Indi nara yaicujpillata o nara sábado punlla tucujpillata pambanman carca.

Nali gentecunataca jatun racu caspita nara shayachishpallatami maquicunatapash chaquicunatapash caspipi clavan carca. Shinami caspita shayachijpica manllanaita nanachin carca. Clavospi chaquihuan ashata taunarishpallami ashaguta respirai ushan carca. Shinapash chaquicunata faquijpica imapipash na taunari ushashpami ñana respirai ushashpa ucha huañun carca.

Davidca shuj huaracahuan rumita shitashpami Goliat shuti jatun runataca huañuchirca. Davidca llamacunata michijushpami huaracata ali utilizanataca yachajushcanga (1 Samuel 17:​40-50).

Egiptomanda, Asiria llactamanda gentecunapashmi huaracahuan macanajun carca. Huaracataca shuj pezado telahuan o carahuan rurashpami ishcandi ladocunamanga jamzilla caviahuan huatan carca. Huaracahuan rumita shitangapaca chaupipimi 5 centímetros ó 8 centímetros vali, 250 gramosta pezaj llambulla rumita churan carca. Chai jipaca jamzilla caviacunamanda japishpami uma jahuapi ninanda muyuchishpa, shuj lado caviata cacharin carca. Shinami rumica tucui fuerzahuan caruta rin carca.

Oriente Medio nishca llactacunapica punda tiempo huaracacunapi churashca ashtaca rumicunatami tarishca. Huaracata alipacha utilizaj soldadocunaca 160 ó 240 kilometros por horami rumitaca shitanlla cashca nin. Huaracahuan rumita shitajpi, arcohuan flechata shitajpi maijan ashtahuan caruta rijtaca na ali yachanchijchu. Shinapash ishcandihuanllatami macanajushpaca huañuchinlla carca (Jueces 20:16).