Taita Diosca Abrahandaca nircami, canba familiamandami shamuna nishca “miraica” ricuringa, chai miraimandami tucuilla gentecunaca ashtaca bendiciongunata charinga nishpa (Génesis 22:​18, NM). Chai jipaca Abrahanba nieto Jacobmi Egipto llactapi causangapaj rirca. Chai llactapica Jacobpa familiaca ushashcatami mirarca. Paicunatami israelitacuna nishpa rijsirca.

Israelitacunata shuj millai faraón ninanda maltratajujpimi, Moisestaca mar Rojota chaupichun Taita Diosca ayudarca. Chai jipaca israelitacunata cuidangapaj, ayudangapaj munashpami Diez Mandamientos nishcata, shuj leycunatapash curca. Chai leycunapimi Taita Diosca villarca, juchacunata perdonachunga ofrendacunata cunami canguichi nishpa. Shinallata Taita Dios yuyachijpimi Moisesca israelitacunata nirca, Taita Diosca shuj profetatapash cachamungami nishpa. Chai profetami shamuna nishca “mirai” cana carca.¿Imashinata gentecunapash llaquicunapash tiai callarirca?

Casi 400 huatacuna jipaca Taita Diosca rey Davidmanga nircami, shamuna nishca “miraica” unai unaicamami mandanga nishpa. Chai “miraica” Mesiasmi carca. Paimi gentecunata salvashpa, cai Alpatapash shuj juyailla paraisota rurana carca.

Taita Dios villajpimi rey Davidpash shuj profetacunapash villarca, Mesiasca llaquinga, humildemi canga nishpa. Mesías mandashpaca tucui nalicunata, guerracunatami tucuchinga. Pipash na yarjachijungachu, gentepuracunapash animalgucunahuanbash tranquilomi causanga. Tucui ungüicuna, llaquicuna, huañuicunapash chingaringami. Huañushcacunapash causaringami.

Profeta Miqueasmanbash Taita Diosca villarcami, Mesiasca Belén llactapimi naciringa nishpa. Cutin profeta Danielmanga villarcami, Mesiastaca huañuchingami nishpa. Shinapash Mesiasta causachishpami Taita Diosca jahua pachapi mandachun churanga. Profeta Danielca escribircami, Mesiasmi tucui gobiernocunapa cuenda mandanga nishpa. Shinapash ¿ciertochu Mesiasca ricurirca? ¿Profetacunapa nishcaca pactarircachu?

​(Génesis 22- 50; Éxodo, Deuteronomio, 2 Samuel, Salmos, Isaías, Daniel, Miqueas, Zacarías 9:9​mandami can.)