JONATHANGA Estados Unidospimi nacirirca. Paipa taitamamaca Corea llactamandami can. Taitamamashnalla cajpimi Jonathan huahuagu cajpica shujcunaca ninanda nalicachishpa ricun carca. Chaimandami Jonathanga doctor tucungapaj estudiashpa, jipamanga Alaska chiri chiri llactapi causangapaj rirca. Chaipi gentecunaca Corea llactamandashnallatami carca. Chaimandami paica, pipash caipica na imatapash nihuangachu yarca.

Shuj punllaca 25 huatacunata charij joven huarmigutami Jonathanga atindijurca. Chai huarmiguca huañushcashnami carca. Shinapash ali tucushpa rijcharishpaca, coreanocunata ninanda na ricunayachishpami chai huarmica Jonathandaca plitushpa saquirca. Chaimandami Jonathanga  yarca, maiman rijpipash gentecunaca ricushcandimi na ricunayachihuan nishpa.

Imashinami ricunchi, ricushcandi na ricunayachij gentecunaca tucui ladocunapimi tian.

Shinapash ashtaca gentecunaca ninmi, ñavita ricushcandi na ricunayachinaca nalichu can nishpa. Huaquingunaca nalichu can nishpapash paicunallatami gentecunataca ñavita ricushcandi na ricunayachin. ¿Ñucanchicunapashchu chai gentecunashna canchi?

Gentecunaca tucuicunallatami yashcanchi, ñucaca na chashnachu cani nishpa. Shinapash Bibliapica ninmi: ‘Runapa shunguca umachinllami’ nishpa (Jeremías 17:9). Ñucanchi shungu pandachijpimi, ñucaca tucuicunatami igual tratani, nali cajpillami nali tratani yanchi.

Cunanga pensaripashunchi. Yana yana, chulunlla ñanda rijujpi ñapash ishcai jatun jaricuna ricurishcanman. Shujca imatapash maquipi charijushna cashcanman.

Chai jaricunata ricushpaca ¿manllaripanguimanllu? Ima horapash llaqui apashcamandaca paicunata ricushcandimi manllarinchiman. Shinapash ¿ciertopachachu paicunataca manllana canchi? Chai ishcai jaricunata ricushpaca ¿maijan lado gentecuna cajtata yanguiman? ¿Imatata ñucanchi shungupica yanchiman?

Aliguta pensarishpaca, tucuicunallatami imagupipash ñavita ricushcandi shujcunataca nalicachishcanchi. Bibliapica ninmi, runacunaca ‘ñavipi ricurishcatallami ricun’ nishpa (1 Samuel 16:7). Imashinami ricunchi, huaquinbica tucuicunallatami manapash ali yachashpata gentecunataca paica cashnami chashnami nishpa rimashcanchi. Chashna pensamientocunataca ¿imashinata ñucanchi shungumanda anchuchita ushanchi? ¿Ima horashi chashna gentecunaca chingaringa?