Jesusca paipa catijcunamanga ali villaicunata villachichunmi yachachirca. Shinapash chai ali villaicunata na tucui gentecuna chasquinataca Jesusca alimi yacharca (Luc. 10:3, 5, 6). Ñucanchicuna villachinajujpica huaquin gentecunaca na uyangapaj munashpami ñucanchitaca nali tratan. Chaimi villachishpa catina, llaquishcata ricuchinaca shinlli can.

Shuj gentecunata llaquimandami paicuna imashina sintirijta, paicuna charishca problemacunamanda llaquirishpa ayudangapaj munapanchi. Shinapash gentecunata na llaquishpaca paicunata ayudaita, Bibliamanda ali yachachitapash na ushashunllu. Cutin shuj gentecunata llaquishpa juyaihuan tratangapaj esforzarishpaca cushillami villachishun. Imashinami nina rupashpa catichunga yamdata catichina capanchi. Shinallatami shuj gentecunata llaquinaca tucui shunguhuan villachishpa catichun ayudan (1 Tes. 5:19, NM ).

Shinlli cajpipash shuj gentecunata llaquishpa juyaihuan tratachunga ¿imata ayudanga? Chaipaca Jehová Diosmanda, Jesusmanda, apóstol Pablomandapashmi yachajupashun.

Ashtaca huatacunatami Jehová Diosmandaca ninan nali llullacunata nishca. Shina cajpipashmi Jehová Diosca ‘pagui ninata na yachajcunatapash, nalita rurashpa causajcunatapash llaquishpa’ catishca (Luc. 6:35). Chaimi nali gentecunataca nara tucuchishca. Chaipa randica “tucuicuna quishpirichunmi” Jehová Diosca munan (1 Tim. 2:3, 4). Jehová Diosca nali ruraicunata na ricunayachishpapash, tucui gentecunapa causai valishcapacha cajpimi ni shujllapash na huañuchun munan (2 Ped. 3:9, NM ).

Shinallata cai alpapi gentecuna Diosmanda ama yachajuchunmi Diabloca ‘paicunapa yuyaita yanayachishca’. Diablo shina rurashcataca Jehová Diosca alimi yachan (2 Cor. 4:3, 4). Ashtaca gentecunamanga uchillamandapachami Taita Diosmanda llullacunatalla yachachishca. Chaimi chai gentecunaca Diosmanda panda yuyaicunata, panda crishcacunata charishpa Bibliapa yachachishcacunataca na fácil cringapaj munan. Gentecuna shina cajpipashmi Jehová Diosca paicunata ayudangapaj munan. ¿Imamandata shina nipanchi?

Nínive llactamanda gentecunahuan ima tucushcata ricupashunchi. Chai gentecuna millai millaicuna cajpipashmi Jehová Diosca Jonasmanga cashna nirca: “Ñucapash Nínive pueblotaca, ¿nachu llaquisha? Chai jatun pueblopica, patsaj ishcai chunga huaranga runacunami causanajun. Paicunaca, maijan ali lado maqui, lluqui lado maqui cajtapash, na yachashpami causanajun” nishpa (Jon. 4:11). Nínive llactamanda gentecunaca Jehovamandaca nimata na yacharcachu. Chaita cuenta japishpami Jehová Diosca chai gentecunata llaquishpa Jonasta cashna villachun cacharca, cangunapa nali ruraicunamanda na arripintirishpaca tucuchi tucunguichimi nishpa.

Jehová Diospaca tucui gentecunapa causaimi valishcapacha can. Shinaca ñucanchicunapapashmi tucui gentecunapa causai valishcapacha can. Huaquingunaca ali villaicunata chasquishpapash paicunapa causaipi na ñapash pactachinllu. Chai gentecunatapashmi llaquishpa juyaihuan ayudana capanchi.

Shinaca gentecuna na uyangapaj munajpica chai gentecuna imamanda na uyangapaj munashcata intindingapami esforzarina capanchi. Huaquingunaca Jesusta catinchi nij tucushca gentecunapa nali ruraicunata ricushpami Bibliamandapash, religionmandapash nimata na yachangapaj munan. Cutin shuj gentecunaca ñucanchimanda llullacunata parlashcata uyashpami Bibliamanda yachajungapaca na munan. Huaquingunacarin paicunapa familiacuna, vecinocuna burlaringa nishpami Bibliamanda yachajungapaca na munan.

Shinallata huaquin gentecunaca ashtaca llaquicunata charishcamandami llaquilla sintirin. Shina sintirimandami villachinajujpica na uyangapaj munan. Kim shuti misionera paniguca ninmi: “Ñucanchicuna villachijuj pushtupica ashtaca gentecunami guerracuna tiaimanda tucui paicunapa charishca cosascunata chingachishca. Chaimi jipa punllacunapi ali causaigu tianataca na crin. Paicunapa munaicunata na pactachi ushashpami llaquilla sintirin. Chai gentecunaca na rijsi gentecunahuan parlangapaca na munanllu. Casi siempremi Bibliamanda na uyangapaj munaj gentecunahuan tuparinchi. Shuj viajeca villachijujpimi ñucatapash macahuarca” nishpa.

Gentecunata juyaimanda villachishpa catichunga ¿imata Kim shuti panigunata ayudarca? Paica ninmi: “Bibliamanda na uyangapaj munaj gentecuna nali tratajpica Proverbios 19:11​pi shimicunatami yarini. Chaipica ninmi: “Aliguta yarishpa causaj runaca” ama ñapash fiñaringapami jarcarin nishpa. Chai gentecuna ima llaquicunatalla charishcata pensarinami paicunata intindichun ayudahuan. Huaquingunaca aliman chasquishpami Bibliamanda yachajungapaj munan” nishpa.

Tapuripashunchi, ñucanchicuna na testigo cashpa testigo de Jehovacunamanda llullacunata uyashca cashpaca villachingapaj shamujpica ¿uyangapaj munanchimanllu? Tal vez na uyangapaj munanchimanllu. Ashtahuangarin llaquishpa juyaihuan tratachunmi munanchiman. Jesusca cashnami nirca: “Shuj gentecuna imatapash aliguta canguna rurachun munashpaca, chashnallatami cangunapash shujcunaman aliguta rurana canguichi” nishpa. Chai mandashcata yarinami shuj gentecunata llaquishpa juyaihuan tratachun ayudanga (Mat. 7:12).

Apóstol Pabloca paita llaquichij gentecunatapashmi juyaihuan tratarca. ¿Imamandata apóstol Pabloca shina tratarca? Paica punda imashina cashcata yarishpami chashna tratarca. Paica nircami: Pundaca “ninanda nalicachishpami, catiriashpa llaquichishpa, nali shimicunata rimashpa causarcani. Ashtahuangarin nara crishpami, na yachaimanda chashna rurajushcani. Ashtahuangarin Diosca llaquishpami, ñucataca chasquihuashca” nishpa (1 Tim. 1:13). Jehová Diospash, Jesuspash ninanda llaquishcataca apóstol Pabloca alimi yacharca. Ashtahuanbash villachijujpi huaquin gentecuna na uyangapaj munajpica Jesusta nara catij cashpa paicunashna rurashcatami apóstol Pabloca yarin cashcanga.

 Apóstol Pablopa punllacunapica ashtaca gentecunami panda yachachishcacunata crishpa causarca. Shina gentecunaman villachingapaca ¿imatata apóstol Pabloca rurarca? Hechos 17:16​pica ninmi: Apóstol Pabloca Atenas llactapi causajcuna “yanga dioscunata ninanda yariajlla causajtami ricujurca. Shina ricushpami, paipaj shungupica ninanda llaquirishpa fiñarirca” nishpa. Chai gentecunapa crishcacunata utilizashpami apóstol Pabloca chai gentecunaman villachirca (Hech. 17:22, 23). Apóstol Pabloca gentecuna imashina causajta ricushpa, paicunapa crishcacunata ricushpami villachin carca. Gentecuna salvarichun munashpami apóstol Pabloca shina rurarca (1 Cor. 9:20-23).

Ñucanchicuna villachinajujpi pipash na uyangapaj munajpi o panda crishcacunata charijpica ¿imatata rurai ushapanchi? Apóstol Pabloshnami gentecunapa crishcacunatallata utilizashpa ‘ali villaicunata’ villachina capanchi (Is. 52:7). Shuj panigu imata rurajta ricupashunchi. Dorothy shuti paniguca ninmi: “Ashtaca gentecunaca Taita Diosmi castigan nishpami crin. Chashna nijpica Taita Diospi crijta ricushpami felicitani. Chai jipaca Jehová Dios juyaj cashcata, shamuj punllacunapi imatalla ruranatapashmi Bibliahuan yachachini” nishpa.

Jessica shuti paniguca caitapashmi nirca: “Villachijujpi ñucanchita pipash nali tratashcata parlajunapa randica gentecuna na uyangapaj munajpipash villachina imamanda ali cashcatami parlani” nishpa. Shinaca huauquipanicunahuan villachinajushpaca paicunata cushichinapimi pensarina capanchi.

Ñucanchicuna villachinajushpa huaquinbi shuj shuj jarcaicuna charishcataca Jehová Diosca alimi yachan. Chaimi shuj gentecunata juyaimanda villachishpa catijta ricushpaca Jehová Diosca ninanda cushijun (Luc. 6:36). Jehová Diosca paipa punllata ima hora apamunataca alimi yachan. Chaimi chai punlla chayamungacamanlla gentecunata llaquishpa ayudanga. Shinapash chai punlla chayamungacamanga villachinaca minishtirishcapachami can (2 Tim. 4:2). Shinaca tucui gentecunata llaquishpa juyaihuan tratashpa, cushilla villachishpa catipashunchi.