Mateo 18:10​pica Jesusca nircami: “[Ñuca catijcunatara] maijandapash na ricunayanllu ninguichiman. Cangunataca, cashnami nini: Paicunata cuidaj angelcunaca, jahua pachapimi tianajun. Chai angelcunami, jahua pachapi tiajuj ñuca Taitapaj ñavitaca ricushpa, causaita causaicaman tianajun” nishpa. Shinaca ¿cada unochu ñucanchita cuidajuj shuj angelta charinchi? Na. Angelcunaca tucuilla paipa catijcunamanda preocuparinmi nishpami, Jesusca Mateo 18:10​pi shimicunata nirca. Bibliapi yachachishca shinaca, gentecuna imata rurajpipash, cada unota cuidajuj shuj angeltaca na charinchichu. Chaimandami Jesusta ali catijcunaca, na ñucanchi causaita peligropi churanchi.

Shinaca ¿angelcuna ñucanchita na ayudajtachu Bibliapica yachachin? Na shinachu can (Salmo 91:11). Imashinami callari temapi ricuparcanchi, Kennethpash shuj gentecunapash, angelcunahuan Taita Dios paicunata ayudajushcatami crin. Testigo de Jehovacunapash villachichun angelcuna ayudajushcataca, tauca viajemi seguro cashca. Shinapash angelcunata ricuitaca na ushanchichu. Chaimandami, Taita Diospa angelcuna imashinapacha ayudanajujta, cuidanajujtaca na seguro caita ushapanchi. Taita Diosmi paipa angelcunahuan ayudarca nishpa Taita Diosta agradicishpaca, na imapash juchata ruranajunchichu (Colosenses 3:15; Santiago 1:17, 18).