Caipi yuyapai: Juliata paipa taitamamacuna, amigocunapash tsala tsalami cangui nijpipash, Julia espejopi ricurishpaca racu racumi ricurini, “tsalayanami cani” yanmi.

Juliaca cutin cutinmi pensarin, 5 libratallapash bajaringapaca imatapash ruraimanllami nishpa. Chaipaca huaquin punllacunatami na micushpa yalina can. . . .

Quiquinbash Julia shina sintirishpaca ¿imatashi ruranguiman?

Quiquin ali ricurinapi preocuparinaca alimi can. Bibliapipashmi nin Sara, Raquel, José, David, Abigailca juyaillagucunami carca nishpa. Por ejemplo, Abisag shuti huarmiguca “juyaillagumi carca” ninmi (1 Reyes 1:4).

Shinapash ashtaca jovengunaca ali ricurinapillami yapata preocuparin. Shina yapata preocuparinaca tauca llaquicunamanmi apai ushan. Cunanga caipi pensaripai:

• Shuj investigacionbica, 58% joven huarmicunaca racu racumi cani nircami. Shinapash paicunamandaca 17% huarmicunallami racu racucuna carca.

• Estados Unidos llactapi huarmicunaca paicunapa peso ali cashpa o tsalalla cashpapash 45% huarmicunaca racumi canchi ninmi.

• Huaquin jovengunaca tsalayangapaj munashpa imatapash ruraimandami anorexia ungüi japitucushca. Anorexia ungüica huañuimanmi apan. Anorexia ungüita charijcunaca nimata na micungapaj munanllu.

 Anorexiata o shuj ungüita quiquin chari callarijushpaca uchallami ayudata mascana cangui. Taitaman, mamaman o pihuanbash confianzata charishcahuanmi uchalla parlana cangui. Bibliapica ninmi: “Ali cumbaguca paipaj cumbataca, tucui causaipimi juyajun. Llaqui punllacuna japijpipash, quiquin huauquitashnami llaquin” nishpa (Proverbios 17:17).

Shungu ucupi ali, juyailla canami ashtahuanbachaca ali can. Rey Davidpa churimandaca Bibliapica ninmi:

‘Absalón runashna juyaillagu, alicachi tucuj runaca, shujllapash na tiarcachu. Chaquimanda callarishpa, uma pundacaman ima nalipash na tiarcachu’ nishpa (2 Samuel 14:25).

Shinapash Absalonga yapa jariyashca, ancioso, llullashpa umachijmi carca. Chaimandami Bibliapica nin, paica nali manllanaita fiñarishpa huañuchijmi carca nishpa.

Shinallatami Bibliapica ñucanchicunatapash cashna yachachin:

‘Punda causaita ña saquishpa [...], mushuj causaitami callarina’ canguichi nishpa (Colosenses 3:9, 10).

“Ama jahualla aligu ricuringapajlla, umatapash yapata alichirishpa [. . .], cangunapaj shungu ucupimi, juyailla causanata alichirina canguichi” nishpa (1 Pedro 3:3, 4).

Ali ricurina munaica alimi can. Shinapash ali ricurinapa randica, quiquin imashina canami ashtahuan importante can. Gentecunaca ali cualidadcunata charishcatami ashtahuanbachaca ricunga. Quiquin ali ricurishcatallaca na ricungachu. “Phyliciaca ninmi, aligu cajpica shujcunaca ricunmanmi quedanga. Shinapash shungu ucupi imashina cashcata, ima cualidadcunata charishcata ricushpami gentecunaca juyaihuan quiquindaca yaringa” nishpa.

¿Quiquin imashina cashcata gushtanguichu?

¿Ima horapash quiquinba cuerpo ali ricurichun operarinata o imapash dietata rurasha yashcanguichu?

Quiquinba cuerpomandaca ¿imatata cambiangapaj munanguiman? (Señalapai).

• ÑAVITA

• SINGATA

• AJCHATA

• CUERPOTA

• CEJACUNATA

Punda ishcai tapuicunapi “ari” nishpa señalashca cashpa, tapui 3​pi imata ruranamanda ishcaita o ashtahuan señalashca cashpaca, tal vez quiquin nali ricurinichu yajpipash, shujcunaca na shina ricungachu. Huaquinbica yangamandami imashina ricurinapi yapata preocuparijungui (1 Samuel 16:7).