Jesús huañushca jipaca, ‘charij charij José runami’, ‘Jesús huañushcata pambagringapaj’ Pilatohuan parlajurca. Chai jipaca ‘limpio fino lino telaguhuanmi Jesuspa cuerpotaca pilluchirca’. Shina rurashca jipami, jatun rumipi utujuchishca mushuj bovedapi Jesuspa cuerpotaca churarca. Shina churashpami, bovedaman yaicunataca shuj jatun rumihuan tapashpa saquirca. Sacerdotecunaca Pilatotaca: ‘Paipa discipulocuna tuta shamushpa paipa cuerpota shuanatami manllanchi. Shina shuashpaca huañushcacunapa chaupimandami causarishca nishpami, tucui gentecunaman llullashpa villanajunga’ nirca. Chaimi Pilatoca: ‘Chai bovedataca, ali ali sellashpa cuidaj soldadocunata churaichi’ nirca.

Quimsa punllacuna jipami, shuj huarmicunaca Jesusta saquishca bovedaman tutamandata ricungapaj rirca. Chaipimi bovedapa jatun rumita suchuchishcata ricurca. Chai bóveda ucumandami shuj angelca paicunataca: Ama manllaichichu. Jesusca causarishcami chaita paipa discipulocunaman villagripaichi. Jesusca Galilea llactapi canga nirca.

María Magdalenaca Pedrota, Juanda mascagrishpami: “Señor Jesustaca picharimi bovedamanda apashpa rishca. Paita maipi churashcataca na yachapanchichu” nirca. Chaimi Pedropash, Juanbash Jesusta churashca bovedaman calpashpa rirca. Chai utujupi pipash illajta ricushpami paicunapa huasiman tigrarca.

Jipamanga Mariaca Jesusta churashca utujumanmi tigrarca. Chaipimi, ‘ishcai angelcunata ricushpa’: Jesustaca ‘maiman aparcacha na yachapanichu’ nirca. Chai jipaca shuj jarita ricushpami huertata cuidaj runa yashpa: “Jesuspa cuerpota quiquin apashca cashpaca, maipi churashcata villahuai” nirca. Shina nijhuanmi chai jarica “María” nirca. Shina nijhuanmi paica Jesús cashcata cuenta japishpa “Yachachij” nishpa ugllarirca. Chaimi Jesusca: Ñucata ricushcata ñuca huauquicunaman uchalla villagripai nirca. Shina nijpimi ‘María huarmiguca Jesusta ricushcataca’ ‘Jesuspa discipulocunaman villangapaj rirca’.

Chai punlla ña chishi cajpimi Jesuspa ishcai catijcunaca Jerusalenmanda Emaús puebloman rinajurca. Chaipimi shuj jari paicunahuan igual rijurca. Chai jarica ¿imatata parlanajunguichi? nishpa tapurca. Paicunaca: ‘¿Narachu imatapash yachangui?’. Importante sacerdotecuna Jesusta huañuchichun mandashcamandaca ñami quimsa punlla yalishca. Huaquin huarmicunapash Jesusca causarishcami can ninajunmi. Chaimi chai jarica: Profetacunaca Cristo huañushpa cutin causarina cashcata villarca. ‘¿Imashpata tucui imata villashcataca na cringapaj munanguichi?’ nirca. Jipamanga chai jarica Diospa  Shimimandami ashtahuan paicunaman intindichijurca. Ña Emaús puebloman chayashpaca, caipi ñucanchihuan quidapai ninajurcami. Micungapaj ña tiarishpaca tandamandami chai jarica Diosta pagui nishpa mañajurca. Chaimi paicunaca Jesús cajta cuenta japirca. Shinapash Jesusca paicunapa ñavimandaca ñapashmi chingarca.

Jesuspa ishcai discipulocunaca Jerusalén llactamanmi apostolcuna tandanajushca huasiman uchashpa rirca. Chaipimi tucui ima pasashcata villanajurca. Chai huasipi cajpimi Jesusca ricurirca. Apostolcunaca Jesús cashcataca na cri ushanajurcachu. Chaimi Jesusca: ‘Ñuca maquita tacarishpa ricuichilla’. Diospa Shimipi nishcashnami: ‘Cristoca quimsa punllahuanmi huañushcacunapa chaupimanda causaringami’ nirca.