Roma llacta ladolla pobrella pueblopimi nacirircani. Chaipillatami viñarcani. Ñuca causaica shinllipachami carca. Ñuca mamataca na rijsircanichu. Ñuca taitahuambash na ali llevarinllu carcani. Chaimandami shuj gentecunashnallata ñuca munashcata rurashpa viñarcani.

10 huatacunata charishpami shuanata yachajui callarircani. Cutin 12 huatacunata charishpaca huasimandami llujshishpa rircani. Tauca viajecunatami ñuca taitaca carcelmanda llujchihuarca. Shuj gentecunahuanga macanajushpalla, pliturishpallami yalin carcani. Millai millaimi carcani. 14 huatacunata charishpami huasimandaca llujshishpa ritapacha rircani. Chaimandaca callecunapimi causan carcani. Drogacunatapashmi chupan carcani. Maipi puñunata na charimandami shuj gentecunapa carrocunata pascashpa, chaiman yaicushpa puñun carcani. Chaimandaca armangapami maipi yacu tiaj pushtuta mascan carcani.

Shuanataca alipachami yachajurcani. Callecunapi bolsocunata shuashpapash, tutacunaca departamentocunapi, huasicunapimi shuan carcani. Shuajuimandaca rijsishca rijsishcami tucurcani. Chaimandami pandillerocunaca paicunapa grupopi cachun invitahuarca. Chaimandaca bancocunapipashmi shuai callarircani. Ñuca millai millai cashcamandami shuj pandillerocunapash ñucataca respetahuan carca. Ñucapa pistolataca siempremi apashpa purin carcani. Puñuna horaspash ñuca sauna umapimi churan carcani. Ñucaca shuashpa, drogacunata chupashpa, huainayashpa, nali shimicunata nishpallami causan carcani. Policiacunapash siempremi ñucataca mascashpa purihuan carca. Huaquin viajecunatami preso churai tucurcani. Callecunapi, carcelpipash huaquin huatacunatami yalircani.

Shuj viajeca carcelmanda llujshishca jipami ñucapa tiata visitangapaj rircani. Ñucapa tiapash, ñucapa ishcai primocunapash testigo de Jehovacuna cashcataca na yachashca carcanichu. Paicunaca paicunapa tandajuicunamanmi invitahuarca. Paicunapa tandanajuicuna imashina cashcata yachangapaj munaimandallami rircani. Chaiman chayashpaca picunalla yaicujta o llujshijta ricungapami pungu ladolla tiarisha nircani. Ñucaca ñuca pistolataca apariami rircani.

Chai tandajuiman rinami ñuca causaita cambiahuarca. Chai tandanajuipica tucuicunami cushilla, ali alicuna carca. Chai tandajuipi Testigocuna imashina tratahuashcataca cunangamanmi yarini. Ñucapa causaihuan ricujpica chai tandanajuipica tucuimi shujpacha carca.

Chaimi testigo de Jehovacunahuan Bibliata estudianata dicidircani. Bibliamanda yachajujushpaca ñuca causaipi cambiana cashcatami cuenta japircani. Proverbios 13:20​pica: “Alipacha yachajushca runacunahuan tandanajuj runaca, alipacha yachajushcami canga. Ashtahuangarin shinlli shungu runacunahuan tandanajuj runaca, ninandami llaquichi tucunga” ninmi. Chai shimicunata liishpaca ñucapa nali amigocunamanda caruyana cashcatami cuenta japircani. Amigocunamanda caruyanaca na fácil cahuarcachu. Pero Jehová ayudajpimi paicunamanda caruyarcani.

Ñuca cuerpopipash limpio cangapami drogacunata saquingapa, fumanatapash saquingapa esforzarircani. Ñucapa ajchatapashmi ruturircani. Aretecunata churajunata, nali shimicunahuan parlanatapashmi saquircani. Ñucapa causaipi chai nali ruraicunata saqui ushashcamandami cushilla sintirircani.

Liinata, estudianatapash na gushtarcanichu. Chaimandami Bibliata estudianaca shinlli cahuarca. Shinapash Jehová Diosta juyai callarishpaca ñuca nali cosascunata rurashcamandaca ñucapa concienciapimi nali sintirijurcani. Jehová Diosca nunca na perdonahuangachu yarcanimi. Shinapash rey Davidpa causaimanda liina, rey Davidta Jehová Dios imashina perdonashcata yachajunami tranquilo sintirichun ayudahuarca (2 Samuel 11:1–12:13).

Huasin huasin villachinatapashmi manllan carcani (Mateo 28:19, 20). Villachijushpa pitapash ñuca llaquichishca personahuan tuparinatami manllan carcani. Shinapash asha ashami chai manllaitaca saquircani. Jipamanga Taita Dios ñucanchicunata perdonaj Dios cashcata villachishpami, villachinataca ninanda gushtai callarircani.

Jehová Diosta rijsinami ñuca causaipica ninanda ayudahuashca. Ñucapa punda amigocunamandaca huaquingunaca huañushca o huaquingunaca carcelpimi can. Shinapash Jehová Diosta rijsimandami humilde canata, na ñapash culiranata yachajushcani. Chaimandami cunanbica shujcunahuanbash ali llevarita ushani. Ñucapa huarmigu Carmenhuanga cushillami causapanchi. Cunanga ishcandillatami shujcunapash Bibliamanda yachajuchun ayudanajupanchi.

Imagutapash minishtishpaca cunanga ñana shuanichu. Shuj bancopimi trabajani. Chaipica limpiashpami trabajani.