Bibliapica tabacota a fumanamandaca na parlanllu shinapash ñucanchi saludta mapayachij cosascunata Taita Dios nalicachijtami yachachin. Shinaca Taita Diospaca tabacota fumanaca shuj jatun juchami can.

•   Causaita respetana. Diosmi ‘samaita, causaita, tucui gentecunaman cun’ (Hechos 17:24, 25). Jehová Dios causaita carashcamandami causaitaca cuidana capanchi. Tabacota fumanaca ashtaca gentecunatami huañuiman apashca.

•  Shujcunata juyana. ‘Canba projimotaca can juyarinshnallatami juyana cangui’ (Mateo 22:39). Shujcunapa ñaupapi tabacota fumashpaca shujcunata juyashcata na ricuchinllu. Tabacota fumajcunata yalimi tabacopa cushnita mutijijcunaca ashtahuan unguicunata charin.

•   Limpio cana. “Chaimandami cangunapa cuerpota y cangunapa causaitaca, Taita Diosman shuj sacrificiota caranshna cuchun rogapani” (Romanos 12:1). “Ñucanchi cuerpota y ñucanchi yuyaicunata mapayachij cosascunamandaca limpiarina capanchi” (2 Corintios 7:1). Tabacota fumana costumbreta charishpaca ñucanchi cuerpoca na limpio caita ushanmanllu. Tabacota fumajcunaca paicunapa cuerpota dañota rurajushcataca alimi yachan.

 Bibliapica marihuana nishcamanda o shuj parecido drogacunamandapash na parlanllu. Shinapash Bibliapica ali sintiringapaj munaimandalla drogarina nalipacha cashcatami yachachin. Shinallata imamanda drogarina nalipacha cashcataca intindingapaca cai yuyaicunatapashmi ricupashun:

•   Ñucanchi yuyaita controlana. “Canba Taita Dios Jehovataca canba tucui yuyaihuanmi juyana cangui” (Mateo 22:37, 38). “Tucuitami aligutapacha pensarishpa rurana capanguichi” (1 Pedro 1:13). Drogarij personacunaca paicunapa yuyaitaca na controlaita ushanllu. shinallata drogarina viciota charimandami importante cosascunapi pensaritaca na ushan (Filipenses 4:8).

•   Autoridadcuna cushca leycunata cazuna. “Gobiernocunata y autoridadcunata cazushca catichi” (Tito 3:1). Ashtaca llactacunapimi autoridadcunaca drogataca prohibin. Jehová Diospa ñaupapi ali ricuringapaj munashpaca autoridadcunatami cazuna capanchi (Romanos 13:1).