Chai pasajpi ninanda sufrishca ashtaca gentecunami chashnallata tapurishca. Paicunaca pipash ayudachun, consolachunbash munaimandami shina tapurishca. Cutin shujcunapaca chaita pasana ninandapacha sufrichishcamandami ‘Taita Diosca ¿imashpashi chai pasachunga saquirca?’ nishpa tapurishca.

 Huaquingunaca nishcami: Taita Diosca ¿imamandata Holocausto nishca pasachunga saquirca? nishpa tapurinaca pecadomi can.

 Bibliapica ninmi: Diosta tucui shunguhuan sirvijcunapashmi Taita Diosca ¿imamandata nalicuna tiachun saquishca? nishpa tapurishca. Por ejemplo profeta Habacucca cashna nishpami Taita Diostaca tapurca: “¿Imashpata nalicunatara ricuchishpa, llaquicunata ricuchun saquihuangui?” nircami (Habacuc 1:​3). Habacuc chashna tapuchishcamandaca Taita Diosca na tacurircachu. Chaipa randica tucui ñucanchicuna yachajuchunmi chai shimicunataca Bibliapi escribichirca.

 Huaquingunaca nishcami: Gentecuna sufrinajujta ricunaca Taita Diospaca na importanllu.

 Bibliapica ninmi: Taita Diosca nali ruraicuna, llaquicuna tiachumbash nimamanda na munanllu (Proverbios 6:​16-19). Bibliapica Noepa tiempocunapi nalicuna mirajta ricushpaca Taita Diosca ‘paipaj shungupipash nanachinshnami llaquirirca’ ninmi (Génesis 6:​5, 6). Shinaca Holocausto judio nishcapi ashtaca judío gentecunata huañuchishcamandaca Taita Diosca ninandapachami llaquirishcanga (Malaquías 3:6).

 Huaquingunaca nishcami: Taita Diosca judiocunata castigashpami Holocausto nishca pasachun saquishcanga.

 Bibliapica ninmi: Huata 70​pi romano soldadocuna Jerusalén llactata tucuchichunga Taita Diosca saquircami (Mateo 23:37–24:2). Shinapash chai jipaca maijan llactatapash pipash llaquichichunga na saquishcachu. Shinallata Taita Diosca pitapash castigashpaimanga na llaquichishcachu. Taita Diospaca “judío gentecuna, na judío gentecunapash igualllatami can” (Romanos 10:​12, Dios habla hoy [Versión Popular] ).

 Huaquingunaca nishcami: Ninan poderta charij, juyaj Taita Dios ciertopacha tiashpaca cashnapacha ninan llaqui pasachunga na saquinmanllu carca.

 Bibliapica ninmi: Taita Diosca llaquicunataca na cachamunllu. Shinapash huaquinbica asha tiempota llaquicuna tiachunmi saquin (Santiago 1:13; 5:11).

 Taita Diosca pailla mandana autoridadta charishcata ricuchingapami cai tucui huatacunapica llaquicuna tiachun saquishca. Chaimandallatami Holocausto nishcapash pasachun saquishca. Bibliapica Diablo cai mundota mandajushcatami ricuchin (Lucas 4:​1, 2, 6; Juan 12:31). Imamanda chai pasachun Taita Dios saquishcataca Bibliapi cai ishcai yuyaicunahuanmi intindichin:

1.   Taita Diosca gentecunata rurashpaca paicunallata ima ali cajta, ima nali cajta decidi ushachunmi rurarca. Taita Diosca Adanda, Evata rurashpaca paicunamanga shuj mandashcatami curca. Shinapash chaita pactachichunga na obligarcachu. Adán y Evaca ima ali cajta, ima nali cajtapash paicunallatami dicidirca. Chaimi paicunallata na ali decidimandaca llaqui aparca (Génesis 2:17; 3:6; Romanos 5:12). Chai punllamandami gentecunaca nali decisiongunata japimanda ninanda sufrishca. Declaración de principios del judaísmo conservador nishca publicacionbica caitami nirca: “Gentecunallata nali decisiongunata japishcamandami mundo enteropi cashna llaquicunahuan causanchi” nircami. Gentecunallata imata ruranata dicidichun saquishpapash Taita Diosca gentecuna cambiashpa, alita rurangapaj esforzarichunmi tiempota cushca.

2.   Taita Diosca tucuilla llaquicunata tucuchingapami munan. Llaquicunata tucuchingapapash ushaita charinmi. Taita Diosca tucuilla huañushca gentecunata causachisha ninmi. Holocausto nishcapi huañushca gentecunatapashmi causachinga. Ashtahuambash, shinapacha llaqui pasashcataca gentecunaca ñana yaringachu (Isaías 65:17; Hechos 24:15). Taita Diosca tucui gentecunata ninanda juyaimandami paipa nishcataca pactachinga (Juan 3:16).

 Holocausto nishcapi ninanda sufrishca ashtaca gentecunaca chaita cungaitaca usharcami. Shinapash cungachunga ¿imata ayudarca? Paicunataca llaquicuna imamanda tiashcata intindina, cai llaquicunata Taita Dios ñallapacha tucuchinata yachajunami Taita Diospi crishpa catichun ayudarca.