Huañungapaj na munashpami huaquinbica imatapash ruranchi. Chaita ruranaca normalmi can. Huañuica shuj millai contrashnapachami can (1 Corintios 15:26). Shinapash, huaquingunaca huañuimanda panda yuyaicunata yachajushcamandami, huañunataca ninanda manllan. Huañuita ninanda manllanaca, shuj nali amo ñucanchita maltratashpa charishcashnami can (Hebreos 2:​15). Chashna ama manllangapaca huañuimanda Biblia imata yachachijtami yachajuna canchi (Juan 8:​32).

Bibliapica huañuimandaca cai yuyaicunatami yachachin

•   Huañushcacunaca imatapash na sintinllu (Salmo 146:4). Bibliapica huañuitaca pipash alipacha puñujushcatashnami comparan. Chaimandami huañushca jipa llaquichi tucunata o imapash nanai japinataca na manllana canchi (Salmo 13:3; Juan 11:11-​14).

•   Causajushca horas millai, nalipacha cashpapash huañushpaca pipash na ñucanchicunataca llaquichi ushanllu. Bibliapica huañujpica ‘fiñaipash, imata cashpapash ñucapa cashcanman yashpa munajushcapash ñami tucurirca, [...] imatalla ruranatapash ña na tianllu’ ninmi (Proverbios 21:16; Eclesiastés 9:6).

•   Huañushca jipapash Taita Dios ñucanchita cutin causachina esperanzatami charinchi. Paica ashtaca ashtacacunatami causachinga (Juan 5:​28, 29; Hechos 24:15).

•   Taita Diosca shuj punllaca ‘huañuipash nunca más ñana tiangachu’ nishpami prometirca (Apocalipsis 21:4). Bibliapi nishca shinaca, alita ruraj gentecunaca huañuitapash na manllashpami cai alpapi causanga (Salmo 37:29).