Bibliapica nircami, último punllacunapica pandemia nishca ungüicuna, shuj shuj laya ungüicunami, shuj shuj pushtucunapi miranga nishpa (Lucas 21:11). Pandemia nishca ungüicunaca, na Taita Dios cashtigashcamandachu tian. Ashtahuangarin, Taita Diospa Gobiernomi tucui laya ungüicunata, pandemia nishca ungüitapash tucuchinga.

•  Bibliapica ¿pandemia nishca ungüicuna tianata villajurcachu?

•  Taita Diosca ¿imaurapash ungüicunata cachamushpa cashtigashcachu?

•  Taita Diosca ¿pandemia nishca ungüicunata cachamushpachu cashtigan?

•  ¿Imaurapash pandemia nishca ungüicunaca tucuringachu?

•  Ungüicunamanda parlaj textocuna

 Bibliapica COVID-19 nishca pandemia ungüi, sida, gripe española nishca ungüi tianataca, na shutipi parlajunllu. Shinapash “shuj shuj laya” ungüicuna tiashcamanda, ashtaca gentecuna huañunataca villajunmi (Lucas 21:11; Apocalipsis 6:8). Chashna ungüicunami, “tucurimui punllacunapi” cashcata ricuchin (2 Timoteo 3:1; Mateo 24:3).

 Bibliapica ninmi, huaquinbica gentecunata cashtigangapami Taita Diosca ungüicunata cachamurca nishpa. Por ejemplo, Taita Dios cashtigajpimi, huaquin gentecunaca lepra nishca ungüita charirca (Números 12:1-16; 2 Reyes 5:20-27; 2 Crónicas 26:16-21). Pero huaquinbipachallami shina pasan carca. Shinallata, pandemia nishca ungüicunaca alicunata y nalicunatapash huañuchinllami. Pero Taita Diosca, na cazungapaj munan gentecunatallami huaquinbica ungüicunata cachamushpa cashtigan carca.

 Taita Diosca pandemia nishca ungüicunata cachamushpaca na cashtiganllu. Huaquin gentecunaca ninmi, Taita Diosmi pandemia nishca ungüicunata, shuj shuj laya ungüicunatapash cachamushpa cashtigan nishpa. Pero Bibliapica na chaita ninllu. ¿Imashinata yachapanchi?

 Jehová Diosta ali sirvijcunaca, punda tiempocunapipash cunanbipashmi ungushca. 1 Timoteo 5:23​pica, Timoteo nishca runagumandami parlan. Paica Jesuspa ali discipulomi carca. Timoteoca cutin cutinmi irquiyajunlla carca. Pero Bibliapi nishcashnaca, na Taita Dios cashtigashcamandachu paica ungun carca. Cunanbipash shinallatami can. Huaquin gentecunaca, Taita Diosta tucui shunguhuan catinajushpapashmi, shuj shuj ungüicunata charin. Huaquinbica na cana pushtucunapi cashcamandallami, ungüicunahuanga contagiarin (Eclesiastés 9:11).

 Shinallata, Bibliapi nishcashnaca, nali gentecunata Taita Dios cashtigana punllaca nara chayamushcachu. Cunanbica, ‘quishpichina [o salvarina] punllapimi’ causanajupanchi. Shina nishpaca, gentecuna paipaman quimirishpa salvarichun Taita Dios invitajuj tiempopi causajushcatami, Bibliapica shina nin (2 Corintios 6:2). Taita Diosca, paipa Gobiernomanda ‘ali villaicunata’ mundo enteropi villachishpami, gentecunataca paipaman quimirichun, salvarichun invitajun (Mateo 24:14).

 Ari tucuringami. Bibliapica ninmi, shuj punllaca nipipash na ungushca cangachu. Chai punllaca chayamungami nishpa. Taita Diospa Gobierno mandajpica, nima ungüi na tiangachu (Isaías 33:24; 35:5, 6). Nipipash na ashtahuan sufringachu. Nima nanaipash na tiangachu. Huañuipash na tiangachu (Apocalipsis 21:4). Sano causachunmi Taita Diosca huañushcacunata causachinga. Paicunaca cai alpa, shuj juyailla paraíso alpagupi cajpimi causanga (Salmo 37:29; Hechos 24:15).

 Apocalipsis 6:8: ‘Shuj quillu caballotami ricurcani. Chai caballopi tiajujca, Huañuchina shutitami charirca. Shinallata Hades nishcami, paitaca catiria llujshimurca. [Paicunamanga] gentecunata jatun ungüihuan [o epidemia nishca ungüihuan] huañuchina ushaitami curca’.

 ¿Imatata ricuchin? Caballopi tianajuj chuscu jaricunamanda parlashpami Bibliapica, ñucanchi punllacunapi pandemia nishca ungüicuna tianata ricuchin.