Jehová Diospa testigonkunan orqomunku Mosoq pachaq Biblian, Diospa Palabran nisqa Bibliataqa. Chay Bibliaqa libren kashan pi munaqpas chayta leenanpaq.

Ichaqa manan Testigokunallachu Bibliataqa orqomunku; askha organizacionkunan imaymana simi rimaykunapi orqomushanku Bibliataqa. Chaywanpas askha runakunan mana rimasqanku simipi Bibliata adquiriyta atinkuchu. ¿Imarayku? Wakin partekunapiqa nishu karun valen Bibliakuna. Chaymantapas wakin organizacionkunaqa manan Bibliata qoyta munankuchu juj religionmanta kaqkunaman. Chaymi Testigokunaqa 115 simi rimaypiña orqomushanku Mosoq pachaq Biblian, Diospa Palabran nisqa Bibliata. Paykunaqa llapa munaqmanmi qonku chay Bibliataqa.

Chaypaq kunan yachasun imakunachus pasaran wakin partepi chayta.

• Ruanda nacionmanta Silvestrewan esposan Venantiepiwanmi ninku: “Tawan wawayku, llapaykupiqa soqtan kayku; manan qolqe aypawaqkuchu soqtantiykupaq Bibliata rantikunaykupaq. Mosoq pachaq Biblian, Diospa Palabran, nisqa Biblia kiniaruanda simipi lloqsimusqanmantapachan ichaqa llapayku Bibliayoqkama kayku, sapa p’unchaymi chaytaqa leeyku”, nispa.

  Chay nacionmanta juj pastormi nillantaq: “Kay Bibliaqa fácil entiendeyllamá kasqa. Juj Bibliakunamantapas aswan mejormi kayqa. Jehová Diospa testigonkunaqa cheqaqtapunin runakunaq allinninta munanku”, nispa.

• República Democrática del Congo nacionpin askha runakuna rimanku lingala simita, chay simi rimaypi Bibliataqa wakin iglesiakunallapin vendeqku, Testigokunamanmi ichaqa mana vendeyta munaqkuchu.

  Chaymi chay nacionpi lingala simita rimaq Testigokunaqa mayta kusikuranku lingala simi rimaypi Mosoq pachaq Biblian, Diospa Palabran nisqa Biblia lloqsimusqanmanta. Asambleata cuidaq policiakuna imaraqmi colata ruwakuranku Bibliankuta orqokunankupaq. Chay Bibliawanmi chay nacionpi Testigokunaqa kusata llank’ashanku, lliu munaqmanmi qoshankupas.

• Fiyi nacionpiqa nishutan valen fiyano rimaypi Bibliakuna, chaymi wakin Testigokunaqa inglés rimaypi Mosoq pachaq Biblian, Diospa Palabran nisqa Bibliallata utilizaqku. 2009 watapin ichaqa Mosoq pachaq Biblian, Diospa Palabran nisqa Biblia fiyano rimaypi lloqsimuran.

  Juj wiraqochamanmi anchatapuni gustarusqa chay Biblia, chaymi payqa mañakusqa jujta qonankupaq, ichaqa tukurakapusqañan chay Biblia, chaymi Testigokunaqa nisqaku “iskay kinsa semanamanta jinan chayamunqa, suyayrukuy”, nispa. Paymi ichaqa mana aguantakuyta atispa viajasqa 35 kilometrota jina chay Bibliata consigueq, “chaypin juj hermanoq kashan” nispa niqtinku. Chay wiraqochan niran: “Sinchitan gustawan kay Biblia, fácil entiendeymi, manan ñaupaq leesqay Bibliakuna jinachu”, nispa.

• Malaui nacionpin juj runa Testigokunawan Biblia estudiayta qallariran, paypa sutinmi Davide, chayta yacharuspan Iglesia bautistamanta runakunaqa wasinta rispa qosqanku Bibliata chaskikapuranku.

  Chay nacionpiqa nishutan valen Bibliakuna, chaymi Davideqa llakisqa kasharan; “jayk’aqllapas kunan jujta conseguisaqchu” nispan nisharan. Mosoq pachaq Biblian, Diospa Palabran nisqa Biblia chichewa simipi lloqsimusqanwanmi ichaqa mayta kusikuran, niranmi “¡Kunanqa Bibliay kapuwan; ñaupaq kaqmantapas mejormi kayqa” nispa.

Nueva York llaqtapin ñaupaqtaqa presentakuran Mosoq pachaq Biblian, Diospa Palabran nisqa Bibliaqa, chay kutipiqa inglés rimayllapin lloqsimuran, chaymantapachaqa ñan soqta chunka wataña pasarun. Chay kutipin nikuran: “Chay Bibliata leeychis tapanmanta tapankama, juj runakunamanpas qoychis”, nispa. Chaymi kunanqa 175 millones Bibliakunataña orqokamushan. Kunanqa internetpipas pisqa chunka rimaypiñan kashan.