¿Tukuy ladopichu Dios kashan?

QALLARIY

¿Ima ninmi Biblia?

Diosqa tukuytan rikun, atiynintapas utilizanmi maypipas ima ruwananpaqpas (Proverbios 15:3; Hebreos 4:13). Ichaqa Bibliaqa manan yachachinchu tukuy ladopi kashananpaq otaq tukuy imapipas kashananpaq. Aswanpas juj espíritu kasqantan yachachin, juj lugarpi tiyasqantapas.

¿Imaynan Dios? Diosqa juj espiritun (Juan 4:24). Chaymi mana pi runapas paytaqa rikuyta atinchu (Juan 1:18). Bibliaq willasqan rijuriykunapiqa juj lugarpin Diosqa kashan. Manan jayk’aqpas tukuy ladopipas kashanman jinataqa willanchu (Isaías 6:1, 2; Apocalipsis 4:2, 3, 8).
¿Maypin tiyan? Diosqa janaq pachapin tiyan, chay lugarqa jujniraymi tukuy kamasqa pachamanta (1 Reyes 8:30). Biblian willashan juj kutinpi angelkuna ‘Señor Diosman qayllaykusqankumanta’, a chaymi rikuchin juj lugarpi tiyasqanta (Job 1:6).

Diosqa manataq tukuy ladopichu kashan chayqa, ¿cuidawanmanchu?

Arí. Diosqa janaq pachapiña tiyan chaypas, anchatan interesakun kay pachapi tiyaqkunapiqa. Rikumushanmi payta kasukunanchispaq tukuy ruwasqanchista, jinaspa yanapawanchis (1 Reyes 8:39; 2 Crónicas 16:9). ¿Imaynatan yanapawanchis?

Mañakuqtinchis: Diosqa uyarimuwanchismi mañakusqanchis ratopi (2 Crónicas 18:31).
Llakiq ñit’isqan tarikuqtinchis: “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin [otaq salvan]” (Salmos 34:18).
Consejota necesitaqtinchis: Palabran Bibliawanmi Diosqa yachayta qowanchis maynin purinanchis ñantapas pusariwanchis (Salmos 32:8).

Diosmanta pantasqa yachachikuykuna

Pantasqa yachachikuy: Diosqa tukuy kamasqankunapin kashan.

Cheqaq kaq: Diosqa manan kay allpa pachapichu nitaq ch’askakunaq kasqanpichu tiyan (1 Reyes 8:27). Bibliaqa ninmi ch’askakuna jinallataq juj kamasqankunapas ‘Diospa qhapaq-atiyninta’ willasqankumanta (Salmos 19:1). Chaywanqa manan nishanchu “Diosqa kamasqanpin tiyan” nispa. Ejemplopaq, cuadrokuna pintaq runaqa manan cuadronkunapichu tiyan. Cuadrokunaqa willawasunmanmi ruwaqnin runa imayna kasqanta. Chay jinallataqmi Diospa “imaynachus kasqanqa imachus kamasqankunapin sut’ita reparakun”, chaykunan kanman atiyniyoq, yachayniyoq, munakuyniyoq ima kasqan (Romanos 1:20).

Pantasqa yachachikuy: Sichus Dios mana tukuy ladopichu kashan chayqa, manan tukuy atiyniyoqchu kanman nitaq llapantachu yachanman.

Cheqaq kaq: Santo espirituqa Diospa kallpanmi, chay atiynintan Dios utilizan ima munasqantapas ruwananpaq. Chay kallpawanmi Diosqa yachan imachus pasashasqanta, jinallataq imatapas maypipas ima ratopas ruwan; chayraykun mana necesitakunchu juj lugarpiraq kananqa (Salmos 139:7).

Pantasqa yachachikuy: Salmos 139:8 texton willan Diosqa tukuy ladopi kashasqanta. Ninmi: “Janaq pachaman wichasaq chaypas, chaypin qanqa kashanki. Wañuy-pachaman uraykusaq chaypas, chayllapitaqmi qanqa kashanki”, nispa.

Cheqaq kaq: Chay textoqa manan Dios tukuy ladopi kashasqanmantachu rimashan, aswanpas poesía simikunapi rimaspan rikuchishan Diosqa maypiña kaqtinchispas yanapawananchista.

a Biblian willan Diospa sutin Jehová kasqanta.