Wakin runakunan ninku: “Manan pipas yachanmanchu pikunapunichus Bibliata qelqaran chaytaqa” nispa. Ichaqa Bibliapipunin willashan pikunachus qelqaran chaytaqa. Bibliapi wakin librokunan khaynata qallarin: “Kaytaqa Nehemiasmi willashan”, “Señor Diosqa Amozpa churin Isaiasman Judá suyumanta Jerusalenmantawan kaykunata rikuchiran”, “Kaytan Señor Diosqa Petuelpa churin Joelman rimaykuran”, nispa (Nehemías 1:1, NM; Isaías 1:1; Joel 1:1).

 Bibliata qelqaqkunaqa yaqa llapankun niranku Jehová Diospa sutinpi qelqasqankuta, paymi paykunaman yuyayta qoran qelqanankupaq. Hebreo rimay qelqakunapi (Antiguo Testamento) kinsa pachaj kuti mastan niranku: “Señor Diosmi nin”, nispa (Amós 1:3; Miqueas 2:3; Nahúm 1:12). Wakinmanqa angelkunawanmi Diosqa imatapas willachiran (Zacarías 1:7, 9).

 Bibliataqa 40 runakunan qelqaranku 1600 watakuna ukhupi. Wakinqa askha librokunatan qelqaranku, wakintaq pisillata. Chaymantapas Bibliapiqa 66 librokunan kashan, “hebreo rimay qelqakuna” nisqapin kashan 39 librokuna, chaykunatan nikullantaq “Antiguo Testamento” nispa. “Griego rimay qelqakuna” nisqapitaq kashan 27 librokuna, chaytan nikullantaq “Nuevo Testamento” nispa.