Bibliapiqa juj kutillatan rimashan tatuajekunamanta, Levítico 19:28, Diospa Simin Qelqa textopin nin: “Amallataq cuerpoykichispi ima señaltapas t’urpukunkichischu”, nispa. Diosmi Israel runakunata kamachirqan cuerponkupi tatuajekunata ama ruwachikunankupaq, ¿imarayku? Manan munarqanchu muyuriqninpi kaq llaqtakuna jina kanankuta. Chay runakunaqa diosninkumanta imagenkunatan cuerponkupi ruwachikuqku (Deuteronomio 14:2). Manaña chay kamachiypiñachu kashanchis chaypas, chaypi nisqanta kasukuyqa allinpunin cristianokunapaqqa.

¿Ruwachikunankuchu cristianokuna tatuajekunata?

 Chayta allinta yachanapaq qatimuq textokunapi yuyaymanasun.

•   “Warmikunapas [...] imayna p’achakunata jinallan p’achakunanku, p’enqakuywan, allin yuyaywan ima”, nispa (1 Timoteo 2:9). Chay kamachikuytaqa qharikunapas kasukunanchismi. Cristianokunaqa manan cuerponchista qhawachikunapaq jinachu p’achakunanchis, nitaq jujkunata p’enqachinapaq jinapas p’achakunanchischu.

•   Wakinqa tatuajekunata ruwachikunku imayna runa kasqankuta rikuchikunankupaqmi, otaq chay ruwachikusqankuwan jujkunata nishanku: “Noqaqa ima munasqaytapas ruwaymanmi, cuerpoywanpas ima munasqaytan ruwani”, nispa. Bibliapin ichaqa cristianokunata niwanchis: “Cuerpoykichista Diosman jaywaychis kausashaq sacrificiota jina, sonqonman chayaq ch’uya sacrificiota jina, chhaynapin tukuy yuyayniykichiswan Diosta servinkichis”, nispa (Romanos 12:1). Yuyayninpi kashaq runaqa reparanmi imaraykuchus jujkuna tatuajekunata ruwachikusqankuta. Wakinqa tatuajekunataqa ruwachikunku juj grupomanta kasqankuta reqsichikunankupaq otaq chay tiempopi waynakuna jina kayta munasqankurayku. Chaymi tapukunayki: “¿Imatan ruwayman tatuajeta ruwachikusqaymanta qhepaman pesapakuspay?”, nispa. Chaykunapi piensaymi yanapasunki allinta decidinaykipaq (Proverbios 4:7).

•   “K’uchi runaq yuyaykusqankunaqa allinmankaman tukun, usqhayllata qhapaqyayta munaqtaqmi wajchayapun” (Proverbios 21:5, Diospa Simin Qelqa). Tatuajekunata ruwachikuqkunaqa qonqayllan chayta ruwachikunku. Qhepamanqa yaqapaschá ñakapakunqa chayta ruwachikusqanmanta. Yaqapaschá amigonkunapas paymanta t’aqakapunqa, yaqapaschá llank’anatapas mana tariyta atinqachu. Chaymantapas tatuajekunata pichachikuyqa nishutan valen, ñak’arinkutaqmi chayta ruwachikuspanku. Askha runakunan qhepaman tatuajekunata ruwachikusqankumanta ñakapakurqanku. Chaytan ninku tatuajekuna ruwaypi llank’aq runakuna.