Armagedonqa Diospa guerranmi. Chay guerrapin Diosqa kay pacha kamachikuqkunawan maqanakunqa. Kay pachapi kamachikuqkunapas paykunata yanapaqkunapas manapunin Diostaqa kasukuyta munankuchu (Salmos 2:2). Chaymi Diosqa Armagedón guerrapi chay kamachikuqkunata chinkachipunqa (Daniel 2:44).

 Armagedón nisqa simiqa ch’ulla kutillatan Bibliapi rijurin, chaymi kashan “Apocalipsis” libropi, chay librotan nikullantaq “Revelación” nispa. Apocalipsis libropin willashan kay jallp’api llapa reykuna tukuy atiyniyoq Diospa jatun p’unchaynin guerrapi juñusqa kanankumanta. Chay guerran aparikunqa “Armagedón” nisqa partepi (Apocalipsis 16:14, 16).

 ¿Pikunan chay Armagedón guerrapi maqanakunqaku? Chay guerrapiqa janaq pachapi kaq ejercitokunan maqanakunqaku, paykunaqa Señorninchis Jesucristoq umallisqanmi Diospa enemigonkunata atipanqaku (Apocalipsis 19:11-16, 19-21). Arí, chay ejerciton atipanqa Diospa gobiernon contra kaqkunatapas Diosta mana kasukuqkunatapas (Ezequiel 39:7).

 ¿Chay Armagedón guerra juj cheqasllapichu aparikunqa? Manan. Chay guerraqa pachantinpin aparikunqa (Jeremías 25:32-34; Ezequiel 39:17-20).

 Hebreo rimaypi Armagedón simiqa “Meguidó orqo” ninantan nin. Meguidó llaqtaqa Israel runakunaq nacionninkupin kasharqan. Wakin runakunaq nisqanman jinaqa askha guerrakunas chaypi aparikurqan. Bibliapas chay wakin guerrakunamantaqa willanmi (Jueces 5:19, 20; 2 Reyes 9:27; 23:29). Ichaqa Meguidó llaqtapiqa manan ima orqopas “Meguidó” nisqa sutiyoqqa kanchu. Chhaynaqa Armagedonqa manan juj cheqaschu. Chaymantapas chay Meguidó llaqtaqa Jezreel wayq’opin kashan, manan chay wayq’ollapiqa cabenmanchu Dios contra llapa maqanakuqkunaqa. Chaymi Bibliapi “Armagedón” nispaqa mana juj cheqasmantachu rimashan, aswanpas llapa gobiernokuna juj nisqalla Diospa gobiernon contra jatarinankumantan rimashan.

 ¿Iman Armagedón guerrapi pasanqa? Bibliaqa manan willanchu imaynatachus Dios chay Armagedonpi enemigonkunata chinkachinqa chayta. Ichaqa yaqapaschá payqa ñaupa tiempopi jina enemigonkuna contra utilizanqa: chijchita, terremotokunata, lloqllakunata, azufreyoq nina parata, rayota, mast’arikuq onqoykunatawan (Job 38:22, 23; Ezequiel 38:19, 22; Habacuc 3:10, 11; Zacarías 14:12). Chay tiempopiqa Diospa enemigonkunaqa manan imanakuytapas atinqakuchu, chaypaschá wakinninkuqa hasta paykunapuraraq wañuchinakapunqaku. Chaypin Diospa enemigonkunaqa sut’ita yachanqaku kikin Jehová Dioswan maqanakushasqankuta (Ezequiel 38:21, 23; Zacarías 14:13).

 ¿Armagedón guerrapichu kay pacha tukukapunqa? Armagedonpiqa manan kay jallp’a pachachu chinkachisqa kanqa. Kay pachataqa Diosqa kamarqan chaypi runakuna wiñaypaq tiyanankupaqmi (Salmos 37:29; 96:10; Eclesiastés 1:4). Chhaynaqa Armagedonpiqa manan tukuy imachu chinkachisqa kanqa, Diospaq junt’aq sonqo kaq runakunapas manan chay guerrapiqa chinkachisqachu kanqaku. Paykunan kanku “mana piqpa yupay atinan ancha askha runakuna” (Apocalipsis 7:9, 14; Salmos 37:34).

 ¿Manachu Biblia willan “kay pacha” Armagedonpi chinkachisqa kananmanta? Manan. Bibliapi “kay pacha” nispaqa rimashan Diospa contranpi kaq runakunamantawan kay tiyasqanchis jallp’amantawanmi (1 Juan 2:15-17). Chayraykun kay pachaq tukukunanmanta rimaspaqa Diospa contranpi kaq runakuna chinkachisqa kananmanta rimashan (Mateo 24:3).

 ¿Jayk’aqmi qallarinqa chay Armagedón guerra? Jesusmi nirqan Armagedón guerraqa “manchay ñak’ariy” qhepallatan qallarinqa, ichaqa jayk’aqchus chay pasananmantan Jesús nirqan: “Chay p’unchaymanta chay horamantawanmi ichaqa mana pipas yachanchu, ni janaq pachapi angelkunapas ni Churipas, aswanpas Yayallan yachan”, nispa (Mateo 24:21, 36). Bibliaqa sut’itan willan Armagedón guerraqa Jesuspa chayamusqan tiempopi pasananta, chay tiempon qallarirqan 1914 watapi (Mateo 24:37-39).