Bibliapiqa manan niwanchischu santokunaman mañakuymantaqa, aswanpas Diosllamanmi Jesuspa sutinpi mañakunanchis. Chaymi Jesuspas discipulonkunata niran: “Qankunaqa khaynatan mañakunkichis: ‘Yayayku janaq pachapi kaq, sutiyki ch’uyapaq jap’isqa kachun”’, nispa (Mateo 6:9). Jesusqa manan jayk’aqpas niranchu santokunaman, angelkunaman, jujkunamanpas mañakunanchispaqqa, aswanpas Diosllamanta mañakunanchispaqmi niwaranchis.

 Chaymantapas Jesusqa nillarantaqmi: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa”, nispa (Juan 14:6). Chhaynaqa Jesusllawanmi Diosmanqa achhuykuyta atisunman (Hebreos 7:25).

¿Allinchu kanman Diosmantapas santokunamantapas mañakuy?

 Israel runakunaman chunka kamachikuykunata qoshaspanmi Diosqa jujninpi niran: “Noqa Señor Diosniykiqa sienteq Diosmi kani”, nispa (Éxodo 20:5). Chaymantapas Traducción del Nuevo Mundo nisqa Bibliapin chay versiculopi kayta nishan: “Noqan Jehová Diosniykiqa kani, manapunin munanichu juj dioskunata yupaychanaykitaqa”, nispa. Arí, Jehová Diosqa payllata adorananchistan munan, chaymi payllamanta mañakunanchis (Isaías 48:11).

 Sichus juj angelman otaq santomanpas mañakusunman chayqa, Jehová Diostan phiñachisunman. Apocalipsis libropin willashan juj angelta apóstol Juan pampakama k’umuykuspa adoray munasqanta, chaymi angelqa phiñakuspa niran: “¡Imatan ruwashanki! ¡Ama chayta ruwaychu! ¡Diosllatan adoranayki! Noqaqa kamachimasillaykin kani, Jesusmanta willanankupaq churasqa wayqeykikunaq kamachimasillantaqmi kanipas”, nispa (Apocalipsis 19:10).