Bibliapiqa willarqanñan kay tiempopi runakunaqa aswan mana allin ruwaykunapi mana allin piensaykunapi kanankumanta (2 Timoteo 3:1-5). a Ichaqa willallarqantaqmi Diospa munasqanman jina kausaq runakunamantapas. Paykunaqa kallpachakunankun karqan Diosta kasukunankupaq munasqanman jina kausanankupaqpas (Isaías 2:2, 3).

Kay qelqapin yachasunchis kay tapuykunamanta:

•  ¿Imatan Biblia willarqanña kay tiempopi runakunamanta?

•  Paykunallapi piensaq runakuna, ¿imaynapin mana allinchu kanku jujkunapaq?

•  ¿Imaraykun kay tiempopi runakuna sinchi mana allin ruwaykunapi kashanku?

•  ¿Imatan ruwananchis tiyasqanchis ladopi runakuna sinchi mana allinta ruwaqtinku?

•  ¿Llapa runakunachu millayman tukupunanku karqan?

•  ¿Wiñaypaqchu chhayna mana allin kausay kanqa?

 Bibliapin willarqanña runakuna pay kikinkuta munakuqkuna kanankumanta; cuerponkutapas manan controlakuyta atinankuchu karqan, Diosta munakunankumantaqa aycha kusichiyllapin purinanku karqan (2 Timoteo 3:2-4).

 Kay tiempomanta willaq profeciaqa llapanmi junt’akushan. Kay tiempopi runakunaqa paykunallapin piensanku, imachá paykunata kusichin imas paykunapaq allin chaykunatan astawan ruwanku. Chhayna clase runakunaqa astawanraqmi yapakushan. Paykunallapi piensasqankuraykun chay runakunaqa mana jujkunata khuyapayankuchu nitaq munakunkupaschu. Familianku otaq pipas paykunapaq allinkunata ruwan chaypas, manan agradecekunkuchu chaykunamanta (2 Timoteo 3:2, 3).

 Bibliapi willasqan jina pay kikinkuta munakuq runakunaqa juj mana allin kaqkunatawanmi ruwanku:

•   Qolqe sonqon kanku. Jujkunawan allinpaq qhawarisqa kayta munaspan paykunaqa qolqeyoq, wasiyoq, carroyoq, imaymanayoq kayta munanku (2 Timoteo 3:2).

•   Jatunchakuqmi kanku. Imaymanayoq kasqankumantan alabakunku “jujkunatan pisichanku, jinaspa umankuta oqarinku” paykunaqa sinchitan imamantapas “jatunchakunku” (2 Timoteo 3:2, 4). Sichus ima ruwaytapas yachanku otaq qolqeyoq kanku chayqa sinchitan jatunchakunku chaykunamantapas.

•   Yanqamanta tumpaqkuna. Chhayna clase runakunaqa jujkunatan k’aminku tumpanku ima (2 Timoteo 3:2, 3). Jinaspapas yanqa qasin llullakuspa Dios contra runamasinku contra ima rimanku.

•   Tercokunan kanku. Chhayna runakunaqa manan ima nisqankuwanpas junt’ayta munankuchu, “mana kasukuqkuna, traicionerokuna” iman kanku (2 Timoteo 3:2-4). Chaytan sut’ita rikuchinku imachus rimasqankuwan mana junt’aspa otaq ima sasachakuypas kaqtin mana allichayta munaspa.

•   Maqakuqmi kanku. Chhayna runakunaqa sinchi k’araq sonqon kanku imamantapas phiñakunkupachan. Chaymi mayninpiqa mana controlakuspa pitapas maqanku, aswan mana allintapas ruwanku (2 Timoteo 3:3).

•   Mana kasukuqkunan kanku. Jesuspa willasqan jina mana allin kausaymi yapakushan. Manan respetankuchu gobiernokunaq churasqanku kamachikuykunata (Mateo 24:12). Chaymantapas “guerrakuna, ch’aqwaykuna” iman kanan karqan (Lucas 21:9).

•   Familiankuta mana munakuqkuna. Manan tayta-mamankuta kasukunkuchu nitaq munakunkuchu. Familia ukhupiqa sinchi sasachakuykunan kan, wakinmi tayta-mamankuta maltratanku otaq wawakunata abusanku (2 Timoteo 3:2, 3).

•   Manan sonqomantachu Diosta adoranku. Diospiqa “creeykun” nispaña ninku chaypas manan Diospa kamachisqanta kasukunkuchu (2 Timoteo 3:5). Diospa munaynita ruwanankumantaqa religionninkupi pastorninkuq otaq umalliqninkuq nisqallantan ruwanku (2 Timoteo 4:3, 4).

 Paykunallapi piensaq runakuna yapakusqanraykun askha runakuna sasachakuykunapi tarikunku astawanqa umankumanta onqoykunawan (Eclesiastés 7:7). Qolqeraykun wakin runakunaqa runamasinkuta engañanku. Mana munakuqtaq kanku chayqa facil-llatan familiankutapas engañanku, chaykunawanmi askha runakuna llaki onqoywan jap’ichikunku jinaspa wañuchikuyta imaraq munanku. Traicionero runakunaqa sinchitan ñak’arichinku runamasinkuta.

 Bibliapin sut’ita willashan kay tiempopi runakuna imarayku sinchi mana allin ruwaykunapi kasqankuta:

•   Sinchita paykunallapi piensasqankuraykun Diostapas runakunatapas mana sonqomantachu munakunku (Mateo 24:12).

•   Saqratapas supaykunatapas, kay jallp’amanmi wijch’uyamurqanku (Apocalipsis 12:9, 12). Chaymantapachan Saqraqa imaymanata ruwashan runakunaqa astawanraq paykunallapi piensanankupaq (1 Juan 5:19).

 Diospa siminpin nishan: “Aman jayk’aqpas chhayna runakunawanqa juñukunkichu”, nispa (2 Timoteo 3:5). Llapa runawanpas sumaq sonqon kananchis, ichaqa mana allinkunata ruwaq runakunawanqa Diosmantapas karunchakuq runakunawanqa manan amigontin kasunmanchu (Santiago 4:4).

 Manan. Bibliapin willarqanña “millay qhelli mana chanin ruwasqakunamanta llakikuspa khuyay kaqkunamanta” otaq llakikuq runakunamanta (Ezequiel 9:4, Diospa simin qelqa). Chay runakunaqa Diospa kamachikuyninkunatan kasukunanku karqan, manataqmi paykunallapichu piensananku karqan. Paykunaqa rimasqankupipas ruwasqankupipas jujniraymi kananku karqan (Malaquías 3:16, 18). Kallpachakunankun karqan jujkunawan sumaqta kausanankupaq, manan guerrapipas ima ch’aqwaypipas participanankuchu karqan (Miqueas 4:3).

 Diosqa manan wiñaypaqchu chhayna millay kausaytaqa qhawanqa, payqa pisi tiempollamantan mana kasukuq runakunata chinkachipunqa (Salmos 37:38). Jinaspapas juj “mosoq pachatan” apamunqa, chay “mosoq pachaqa” Dios sonqo runakunan kanku paykunaqa wiñay-wiñaypaqmi thajpi kausanqaku (2 Pedro 3:13; Salmos 37:11, 29). Chay sumaq kausayqa chayamunqapunin, kay tiempopipas askha runakunatan Biblia yanapashan Diospa kamachisqanman jina kausanankupaq (Efesios 4:23, 24).