Wakin casarasqakunaqa manan tiempota jap’inkuchu sumaqta parlarinankupaq. Kuskaña kashanku chaypas manan chayta ruwankuchu. ¿Imaraykun chay pasashanman?

•  Kuskataq kashankuqa t’aqanasqa jinataq kashanku, ¿imaraykun chay pasashanman?

•  ¿Imatan ruwawaqchis?

•  ¿Ima ninkun wakin casarasqakuna?

•  Iskayniykichis t’aqwirinaykichispaq

•   Wakinmi ninku: “Nishu sayk’usqan kashayku”, nispa.

   Chaymanta rimaspan Anna nin: “Mayninqa tiempoqa kanmi kuska sumaqta pasarinaykupaq parlarinaykupaqpas. Ichaqa mayninqa noqan nishu sayk’usqa kashani, maynintaq qosay sayk’usqa kashan. Sayk’usqa kashani chayqa manan piwanpas rimayta munanichu; chaymi mayninqa telellataña qhawayku”, nispa.

•   Wakintaq ninku: “Internetmi celularmi nishuta tiempota qechuwanku”, nispa.

   Chaymanta rimaspan Katherine nin: “Internetpas celularpas nishutan tiempota qechuwanku, jayk’a horapas chayta qhawaspayqa kallaymanmi. Chay ratukunaqa manan qosaytaqa ni juj simitapas rimaykunichu. Mayninqa sapankaykun juj cuartoman pasapuyku”, nispa.

•   Jujkunataq ninku: “Manan kasqan ruwaychu gustawanku”, nispa.

   Chaymanta rimaspan Jane nin: “Qosayqa wasiman chayamuspaqa, imachus payman gustan imakunachus kusirichin chaytan ruwayta qallarin. Noqaqa manan imaninipaschu, payqa llank’antaq chayqa samarinanpunin; ichaqa maytan munayman paywan tiempota pasariyta”, nispa.

•   Jujkunañataq ninku: “Llank’anaykun, chaypin yuyayniykuqa kashan”, nispa.

   Chaymanta rimaspan Mark nin: “Internetpa computadoraq lloqsimusqanwanmi llank’anallamanña masta tiempota qoni. Manan familiaypaq ancha tiempo kanñachu. Mayninqa esposaywan pasarinaytaqa llank’anamanta correokunata mensajekunata iman contestashani”, nispa.

•   Casado kausaypi warmi-qhari tiempo pasariyqa manan yanqa ruwayllachu, chayqa kananpunin.

   Bibliapin nin: “Aswan allin kaqkunatapas allinta reparaychis”, nispa (Filipenses 1:10).

   Kaypi allinta piensariychis: ¿Imaynatan qhawarinkichis casado kausayniykichista? ¿Casado kausayniykichischu llank’anamantapas ima kusirikuymantapas aswan allin? Icha, ¿puchullatañachu tiempoykita qoshanki esposaykimanpas qosaykimanpas?

   ¿Imatan ruwawaqchis? Allinta rimanakuychis ima ratukunas kuska tiempota pasariwaqchis chayta. Manan ninaykichischu: “Tiempo kaqtinchá chaytaqa ruwasaqku”, nispaqa.

   Annan nin: “Qosayqa noqapiqa piensanpunin, mayninqa iskayllayku imatapas ruwanaykupaqmi niwan, chaymi noqataqa mayta kusichiwan. Chaykunata ruwaqtinqa astawanraqmi noqaqa payta munakuni”, nispa.

•   Yachanaykin celulartapas ima aparatotapas “amaraq” niyta.

   Bibliapin nin: “Tukuy imapaqmi tiempo kan”, nispa (Eclesiastés 3:1).

   Kaypi allinta piensariychis: ¿Jayk’a kutitan mensajekunapas ima willakuykunapas jark’arasunki qosaykita otaq esposaykita tukuy yuyaywan uyarinaykita?

   ¿Imatan ruwawaqchis? Kallpachakuychis p’unchaypi juj kutillapas kuska mijunaykichispaq, ichaqa juj cuartomanmi celularniykichistaqa saqenkichis. Chay ratukunaqa allinpunin imachus pasashasunkichis chaymanta rimarinaykichispaq.

•   Atikuqtinqa kuska rantikuqpas riychis, kuska wasipi ima ruwaytapas ruwaychis.

   Bibliapin nin: “Juj runallamantaqa iskaymi aswan allinqa, iskayninkuqa aswan allintan llank’asqankumantapas chaskinqaku”, nispa (Eclesiastés 4:9).

   Kaypi allinta piensariychis: ¿T’aqanasqachus purinkichis rantiqpas papelkuna ima ruwachiqpas?

   ¿Imatan ruwawaqchis? Kuska imatapas ruwaychis, yanapanakuychis. Mayninqa manapaschá iskaymanta ruwanapaqchu imapas kashan, chaywanpas kuska ruwaychis.

   Ninan nin: “Wasipiqa imaymanan ruwana kan, rantiq rina, platokuna maqchina, p’achakuna waqaychana, huertapas cuidanan. Chaykuna fácil ruwaykunaña kanman chaypas, chaykunata casarasqakuna kuska ruwanqaku chayqa astawanmi jujllachanakunqaku”, nispa.

•    Manan mana atina ruwanakunataqa mañanakunaykichischu.

   Bibliapin nin: “Lliu runakuna yachachunku allin yuyaywanpuni imatapas ruwaq kasqaykichista”, nispa (Filipenses 4:5).

   Kaypi allinta piensariychis: Yaqapaschá mayqenniykichispas qosaykichispa otaq esposaykichispa mana ruway atinanta mañakushankichis. ¿Imaynapin chayta reparawaqchis?

   ¿Imatan ruwawaqchis? Parlariychis imatas sapankaykichis necesitashankichis chayta, acuerdoman jaykuspataq tiempoykichista t’aqakuychis sapankaykichis thaj kanaykichispaq jina.

   Danielan nin: “Qosayqa vivotan imatapas ruwan, kallpanpas kashallanmi, noqaqmi ichaqa mana. Chaymi mayninqa nini maytapas lloqsirinanpaq, noqataq wasillapi qhepakuni. Chhaynapin payqa maytapas rillan ejercicio ruwaq jina, noqataq samariq jina qhepakullani; chhaynapin iskayniykupas thajlla kayku”, nispa.

 Ñaupaqtaqa kay jamuq tapuykunata sapankaykichis contestaychis, chaymantataq rimaychis imanirqankichischus chaymanta.

•    ¿Imaniwaqmi? ¿T’aqallankichispunichu tiempota kuska pasarinaykichispaq?

•   Qosayki otaq esposayki, ¿ima ruwasqantan “gracias” niwaq?

•   Qosayki otaq esposayki, ¿imapi cambianantan munawaq?

•   ¿Jayk’aqllapas qosayki otaq esposayki telefonoq kausanpi mana cuentata churarasunkichu? ¿Pasallanpunichu chay, icha maynillanchu?

•   ¿Imaynatan rikuchiwaqchis atinallanta mayqenmantapas imatapas mañakusqaykichista?

•   ¿Imatan ruwawaqchis kay semanapuni ima ratupas kuska tiempota pasarinaykichispaq?