Roma nacionpa huch’uy llaqtachanpin nacerqani. Manan mamayta reqsirqanichu, manataqmi allintachu taytaywan kawsarqani. Callepin tiyarqanipas. ¡Kawsayniyqa llakikunapaqmi karqan!

10 watallaypi kashaspan suwakuyta qallarirqani, 12 wataymantataq chinkakuyta qallarirqani. Iskay kinsa kutitan papayqa carcelmanta horqowarqan. Millay genioyoq kasqayraykun sapa kutilla runakunawan hap’inakuq kani. 14 wataypin wasiymanta ripurqani callekunapi tiyanaypaq. Chaypin drogakuq kani, ch’isintataq carrokunata kicharuspa chaypi puñuq kani. Tutayllamantan unu maskhaq puririq kani maqchikunaypaq.

Qhepamanmi astawan suwakuyta yacharqani. Callekunapin suwakuq kani carterakunata, ch’isintataq wasikunata haykuq kani. Allin reqsisqan kapurqani chaymi fino suwakunawan huñunakuyta qallarirqani. Paykunawanqa bancokunatan suwaq kayku, sinchi millay kasqayraykun suwamasiykuna manchakuwarqanku. Mayta rispapas armayta aparikuspan riq kani, chayta sawnakuspan puñuqpas kani. Millay runamanmi tukurqani, drogakuq kani, qhelli kawsaypi purirqani, qhelli simikunallatataqmi rimaq kani. Chaymi guardiakunaqa qhepallaypiña kaqku, sapa kutillataqmi carcelman apawaqku. Unaymi callekunapi carcelkunapipas tiyarqani.

Huk kutinmi carcelmanta lloqsispa tiyayta visitarqani. Chaypin yacharqani tiyay iskay wawankunawan Jehová Diospa testigon kapusqankuta. Paykunan huñunakuyninman invitawarqanku, chaymi rikuq tumpalla rirqani, ichaqa armayta aparikuspa. Huñunakuna wasiman chayaspan  haykunallapi tiyaykurqani pikunachus hamusqanta rikunaypaq.

Huñunakuyman chayaqtiymi llapallanku sumaqta napaykuwarqanku, kusisqan kasharqankupas. Kunankamapas manan qonqanichu sumaq sonqowan qhawariwasqankuta. Chaymi sonqoypi nirqani: “¡May sumaqmá kayqa!”, nispa. Chaymantapachan kawsayniy cambiapurqan.

Chaymantapachan Testigokunawan Bibliata estudiayta qallarirqani. Chaymi pisi-pisimanta reparakurqani tukuy mana allin ruwasqayta saqepunay kasqanta. Proverbios 13:20 texton nin: “Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa”, nispa. Chaypi nisqanmi reparachiwarqan huñunakusqay runakunamanta t’aqakapunay kasqanta. Sasaña karqan chaypas, Diosmi yanapawarqan paykunamanta t’aqakunaypaq.

Hinaspapas cuerpoypi ch’uya kapunaypaqmi cigarro fumayta drogakuytapas saqepurqani, chukchayta rutuchikapurqani, ninriypi areteta horqokapurqani, manañan qhelli simikunatapas rimapurqanichu. Chayraqmi cuerpoy kamachiyta yacharqani.

Ñoqaqa qellakuqmi kani libro leeyta, chayraykun Bibliata estudianaypaq anchata kallpachakuq kani. Chaymi yanapawarqan Jehová Diosta astawan munakunaypaq. Ichaqa qhepamanmi concienciay huchachawayta qallarirqan. Sonqoypin niq kani: “Diosqa manan hayk’aqpas pampachawanqachu mana allinkuna ruwasqayta”, nispa. Ichaqa Bibliapin leeq kani imaynatan Davidta hatun huchakunapi urmasqanmanta Dios pampachasqanta, chay yachaymi yanapawarqan (2 Samuel 11:1-12:13).

Wasin-wasinta predicaypas ñoqapaq sasan karqan (Mateo 28:19, 20). ¡Anchatan manchakuq kani suwasqay runawan tupayta! Ichaqa pisi-pisimanta manchakuyniyta atiparqani, chaymi pampachakuq Diosmanta kusisqa sonqowan runakunawan parlaq kani.

Wakin suwamasiykunaqa wañupunkuñan, wakintaq carcelpi kashanku. Jehová Diosmi ichaqa ñoqata yanapawarqan chaykunamanta lloqsinaypaq. Kunanqa kusisqan kawsashani sumaq kawsayta suyakuspa. Kunanqa yachanin k’umuykukuq kayta kasukuytapas. Manañan k’arak sonqochu kani, chaymi yanapawan hukkunawan sumaqta kawsanaypaq. Carmen sutiyoq sumaq cristianawanmi casarakapuni, kuskataqmi runamasiykuta yanapashayku Bibliamanta yachanankupaq.

¡Ah, qonqashasqani! Bancokunataqa rishaniraqmi, ichaqa manan suwakunaypaqchu aswanpas limpieza ruwaypi llank’anaypaq.