¿Imaynapin llaqtaykiq allinninpaq cristianokunaq yachachisqan?

QHAWARIMUSQANCHIS hina cheqaq cristianokunaqa manan politicapi chaqrukunkuchu. Chhaynaqa, ¿imaynatan rikuchinku tiyasqanku cheqaspi yanapakusqankuta? Huk ruwaykunamantapas Jesuspa kamachikuynintawanmi kasukunku: “Chayrayku, rispa llapa suyu runakunata yachachimuychis, yachachisqaykuna kanankupaq, hinaspa Yayaq, Churiq, Santo Espirituq sutinpi paykunata bautizamuychis. Qankunaman lliw kamachisqaykunata paykunaman yachachimuychis kasukunankupaq”, nispa (Mateo 28:19, 20).

Runakunata Diosmanta yachachinapaq kamachikuyqa sumaqtan tupan runakunapaq kachi, k’anchay kaywan (Mateo 5:13, 14). ¿Imaynapin tupan? ¿Imaynatan runakuna qhawarinku Diosmanta yachachikuyta?

Cristoq yachachikuyninqa waqaychanmi k’ancharintaqmi

Kachiqa wakin mikhuykunatan waqaychan chay hinatan cristianokunaq predicasqankupas runakunata yanapan. Jesuspa yachachikuyninta uyarikuspa chayman hina kawsaqkunaqa kay pachaq millay ruwayninkunamantan waqaychasqa kanku. Hinaspapas saludninkutan cuidakunku chaymi mana cigarrota pitankuchu. Chaymantapas runakunawan thakpi kawsanankupaqmi kallpachakunku, pacienciayoq, khuyapayakuq, munakuyniyoq kanankupaqwan (Gálatas 5:22, 23). Chhayna kawsaq runakunaqa ancha  chaniyoqmi kanku tiyasqanku cheqaspi. Chhayna predicasqankuwan, ¿manachu yanapakushanku tiyasqanku cheqaspi?

Ichaqa, ¿imaynapin tupan predicaywan k’anchaywan? Imaynan Killaqa Intiq k’anchayninta k’anchachimun, chay hinatan cristianokunapas Jehová Diospa “k’anchayninta” predicayninkuwan kawsayninkuwanpas k’anchachinku (1 Pedro 2:12).

Jesusqa qatikuqninkunaq kawsaynintan k’anchaywan rikch’anachirqan, chaymi nirqan: “Lamparata hap’ichispaqa manan raki ukhumanchu churanku, aswanpas k’anchana patamanmi, wasipi kaqkunata llapanta k’anchananpaq. Chay hinata k’anchayniykichis runakunaq ñawpaqenpi k’anchachun”, nispa. Cheqaq cristianokunaq kawsasqanku predicasqankupas sut’i reparaymi kanan, imaynan alto patapi churasqa lamparapas llapankupaq k’anchan hinata. Chhaynapin cristianokunaq allin ruwasqankuta rikuspa Jehová Diosta hatunchanqaku (Mateo 5:14-16).

Llapa cristianokunaq ruwaynin

¿Pikunapin Jesús yuyaykusharqan “qankunan [...] k’anchay kankichis” , “k’anchayniykichis [...] k’anchachun” nisqanwan? Llapa qatikuqninkunapin. ¿Imaraykun chayta ninchis? Predicayta kamachisqantaqa manan religionkunamanta pisi runakunallaqa apariyta atinkumanchu karqan. Chaymi Diospi iñiqkunaq “k’anchaynin” sut’i rikuy kanan. Jesuspa kamachisqanta kasukuspan, qanchis millonmantaqa aswan askha cristianokuna iskay pachak kinsa chunka más nacionkunapi huk nisqalla predicayta aparishanku. Paykunaqa allintan yachanku chay ruwayta hunt’ananku kasqanta.

¿Imamantataq predicankuri? Jesusqa manan qatikuqninkunata kamachirqanchu nacionpa kamachikuyninta cambianankupaq, iglesiakuna nacionkunawan hukllachakunankupaq nitaq huk yachachikuytapas. Aswanpas nirqanmi: “Qhapaqsuyumanta [‘Diospa Gobiernonmanta’, NM] allin willakuykunan kay pachantinpi willasqa kanqa, llapa suyukunaq yachananpaq”, nispa (Mateo 24:14). Chaytapunin kunanpas cheqaq cristianokunaqa predicashanku. Diospa Gobiernollan Saqraq kamachikusqanta tukuchinanta, hinaspa mosoq pachata hatarichinanta.

Evangelio qelqakunapin iskay willakuy kashan Jesuspa imayna predicasqanmanta. Qatimuqpi yachasun, imaynatas kay tiempopi cheqaq cristianokuna predicayninkuta aparishanku chaytapas.

[8 paginapi willakuy]

¿Imaynapin cristianokunaq predicasqan kachi hina?

[9 paginapi willakuy]

¿Imaynapin cristianokunaq predicasqan laqhayaqpi k’anchay hina?