Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imaraykun Dios yachachirqan israelitakunata ordenpi ruwanankupaq?

Diosqa Abrahampa mirayninmantan huk llaqtata hatarichirqan hinaspa ordenpi ruwanankupaq kamachikuyninkunata qorqan. Chay llaqtatan Israel nispa suticharqan, paykunamanmi yachachirqan cheqaq yupaychayta Simin qelqatapas chaymi ima qhellimantapas pakaykunanku karqan (Salmo 147:19, 20). Chay ruwasqankuqa llapa runakunaq allinninpaqmi karqan. (Leey Génesis 22:18.)

Diosmi israelitakunata akllarqan testigonkuna kanankupaq. Kamachikuyninkunata kasukuspaqa allinmi karqanku (Deuteronomio 4:6). Israelitakunaq imayna kawsasqankumanta estudiaspaqa astawanmi yachasunchis cheqaq Diosmanta. (Leey Isaías 43:10, 12.)

2. ¿Imaraykun Diospa llaqtan ordenpi imatapas ruwan?

Israel llaqta manaña kasukapuqtinkun paykunaq rantinpi Jehová Dios iñiq t’aqa cristianokunata churarqan (Mateo 21:43; 23:37, 38). Ñawpa tiempopiqa israelitakunan Diospa testigon karqanku. Kay tiempopitaq cheqaq cristianokuna. (Leey Hechos 15:14, 17.)

Jesusmi qatikuqninkunata yachachirqan ordenpi Jehová Diosmanta willanankupaq chhaynapi llapa nacionkunamanta Diosta servinankupaq (Mateo 10:7, 11; 24:14; 28:19, 20). Chay ruwayqa tukukapunqañan. Diosmi millonninpi runakunata huk-nisqalla yupaychanankupaq huñushan (Apocalipsis 7:9, 10). Cheqaq cristianokunaqa huk nisqalla llank’aspan kallpachanakunku yanapanakunkupas. Pachantinpin huñunakuyninkupi huk yachachikuyllamanta yachanku. (Leey Hebreos 10:24, 25.)

  3. ¿Imaynatan qallarirqan kay tiempopi Testigokuna?

Chay llaqtaqa qallarirqan 1870 watapin. Estudiantes de la Biblia nisqa sutiyoqmi karqanku pisi runakunallataqmi karqanku, paykunan Bibliata estudiaspa tarirqanku cheqaq willakuykunata, chaykunaqa unay tiempoñan qonqasqa kapusqa. Chaypin entienderqanku predicacionta Jesús qallarichisqanta, chaymi paykunapas teqsimuyuntinpi Diospa Gobiernonmanta predicayta qallarirqanku. 1931 watapitaq Jehová Diospa testigonkuna nisqa sutiwan reqsichikurqanku. (Leey Hechos 1:8; 2:1, 4; 5:42.)

4. ¿Imaynatan Jehová Diospa testigonkuna ordenpi imatapas ruwanku?

Ñawpa tiempopiqa, llapa iñiq t’aqakunaq allinninpaqmi karqan Umalliq T’aqa, paykunan yacharqanku Diospa llaqtanpiqa Jesús umalli kasqanta (Hechos 16:4, 5). Kunanpas chhaynallataqmi, Jehová Diospa testigonkunaqa yachankun Jesús umalliqninku kasqanta (Mateo 23: 9, 10). Hinaspapas Umalliq T’aqawanmi pusarichikunku chayqa allinninkupaqmi, paykunan Bibliawan kallpachanku 100.000 más iñiq t’aqakunata Diospa ñanninpitaq pusarinku. Sapanka iñiq t’aqapitaq umallikuna kan paykunan munakuywan iñiqkunata cuidanku. (Leey 1 Pedro 5:2, 3.)

Jehová Diospa testigonkunaqa manan comuntachu predicayta aparinku. Llapa runakunaman chayanankupaqmi Bibliamanta qelqakunata ruwanku, 500 más rimaykunaman t’ikraspataq chaykunata rakimunku. Apostolkuna hinan wasin-wasinta predicanku (Hechos 20:20). Bibliamantataq yachachinku sonqomanta Diosta munakuqkunaman. Jehová Diospa llaqtanqa payta kusichinankupaqmi kallpachakunku hukkunatapas yanapanku, chaymi kusisqa llaqta kanku. (Leey Salmo 33:12; Hechos 20:35.)

Astawan yachayta munanki chayqa ¿Imatapunin Biblia yachachin? nisqa librota qhaway 19 capitulota, chaytaqa Jehová Diospa testigonkunan ruwan.