Yachakunñan kay pacha kamachikuq pi kasqanta

JESUSMI khaynata nirqan: “Kunanmi kay pachapi kamachikuq qollanapas qarqosqa kanqa”, nispa. Nillarqantaq: “Paypaqa manan ima atiyninpas ñoqapaqqa kanchu”, “huchachasqaña kasqanrayku”, nispa (Juan 12:31; 14:30; 16:11). ¿Pimantan rimasharqan?

Manan Jehová Diosmantachu rimasharqan. Chhaynaqa, ¿pimantan rimasharqan? ¿Imaynapin “qarqosqa kanqa”? ¿Imaynapin “huchachasqaña” karqan?

“Kay pachapi kamachikuq” reqsichikunña

Runa wañuchiqkunaqa millay ruwayninkumantan hatunchakunku, Saqrapas Jesusta pruebaman churaspan hatunchakullarqantaq. ¿Imaynata? ‘Llapallan kay pacha suyukunata payman qhawarichispa’. Chaymantataq Saqraqa nirqan: ‘Qanmanmi qosqayki tukuy kay kamachikuyta kay suyukunaq hatun-atiynintawan. Ñoqan kay atiytaqa chaskirqani, chaymi pi munasqayman qosaq. Qanchus qonqoriykukuspa yupaychaykuwanki chayqa, llapallanmi qanpa kanqa’, nispa (Lucas 4:5-7).

Sichus Saqra mana kanmanchu chayqa, ¿imaynatan chay textota entiendesunman? Bautizakusqan qhepata, ¿pin Jesusta tentasharqan? ¿Millay yuyaykusqanchu? ¿Sonqonpi iskayasqanchu? Manan, payqa mana ‘huchayoqmi karqan’ (1 Juan 3:5). Jesusqa yacharqanmi Saqra atiyniyoq kasqanta. Chaymi nirqan: “Payqa ‘kay pacha kamachikuq’, ‘runa wañuchiq’, llullasapataq”, nispa (Juan 14:30; 8:44).

Apóstol Juanpas, qanchis chunka wata qhepatan nirqan: ‘Yachanchismi [...], lliw kay pacha Saqraq munaychakusqan kashasqanta’, nispa. Nillarqantaqmi: “Paymi kay pachantinta q’otuspa pantachin”, nispa (1 Juan 5:19; Apocalipsis 12:9). Bibliaq nisqan hina, ‘kay pachapi kamachikuqqa’ mana rikukuq espiritun. Chhaynaqa, ¿ancha atiyniyoqchu runakuna makinpi kanankupaq?

Saqra kamachiqmasinkunapiwan

Apóstol Pablo nisqanman hina cristianokunaqa iñiyninkuraykun aswan millay awqakunawan maqanakushanku. Paymi nirqan: “Manan runawanchu maqanakunchis, aswanpas kamachikuqkunawanmi, atiyniyoqkunawanmi, kay laqhayaq pachapi kamachikuqkunawanmi, hanaqkunapi kaq mana allin espiritukunawanmi”, nispa (Efesios 6:12). Chaypi nisqan hina manan “runawanchu” maqanakushanchis, aswanmi millay ‘espiritukunawan’.

Huk Bibliakunapas sut’itan rikuchinku chay millay espiritukunaqa cheqaqtapuni kasqanta, manan millay ruwaykunata rikch’anachinallapaqchu. Chaywanmi yachanchis Saqraqa mana sapallanchu kay pachapi runakuna kamachisqanta. Aswanpas pay hina “hanaq pacha tiyanankuta” saqepuqkunawanmi kamachishan (Judas 6).

Profeta Danielpa qelqasqanpin willakun, imaynatan unay tiempomantaraq rimanakurqanku “kay pacha kamachikuqkuna” chayta. 537 watapi manaraq Jesús naceshaqtinmi, Babilonia llaqtamanta huk t’aqa Judío runakuna kutipurqanku Jerusalenman. Hinaspan profeta Danielqa llakisqa kinsa semanaña llaqtamasinkunapaq mañakusharqan. Chaymi Jehová Dios huk angelta kacharqan sonqonta tiyaykachinanpaq, ichaqa sasatan  Danielman chayarqan. ¿Imarayku? Angelmi Danielman willarqan: “Persia suyu kamachikuqmi ichaqa iskay chunka hukniyoq p’unchaynintin hark’awarqan”, nispa (Daniel 10:2, 13).

¿Pitaq chay Persia suyupi kamachikuqri? ¿Persia suyupi Ciro reychu kanman? Manan, kamachikuq Ciroqa askha kutitañan Danielta llaqtantapas yanaparqan. ¿Ima runataq atiyniyoq angelta kinsa semanata hark’ayta atinman? Manan pipas. Paykunaqa atiyniyoqmi kanku, huk tutallapin huk angel-lla 185.000 kallpasapa soldadokunata wañuchirqan (Isaías 37:36). Persia hatun suyupi kamachikuqqa huk supaymi karqan, Saqraq yanapaqnin. Angelqa willallarqantaqmi: “Kutipuqtiytaq Grecia suyu kamachikuq” supaywanñataq maqanakusaq, nispa (Daniel 10:20).

¿Imatan yachasunman angelpa Danielman nisqanmanta? ‘Kay laqhayaq pachapi kamachikuqkunaqa’ mana rikuy atina supaykunan kanku, paykunaqa kasukunku umalliqnin Satanastan. Chaymi paykunaqa kay pachata rakinakunku kamachinankupaq. ¿Imatan maskhanku chayta ruwaspa?

Imayna kamachikuq kasqanta reqsichikun

Apocalipsis qelqapin apóstol Juan willarqan hatun maqanakuymanta, arcángel Miguelmi otaq Jesucristo Saqrata supayninkunatawan atipaspa hanaq pachamanta wikch’uykamurqan. Chayqa manan allinchu ñoqanchispaqqa, ¿imarayku? Biblian nin: “¡Ay, imaynaraqmi kankichis kay pachapi lamar-qochapi tiyaqkuna! Saqran qankunaman uraykamun, sinchi phiñasqan kashan, tiempoqa pisillaña kananta yachaspa”, nispa (Apocalipsis 12:9, 12).

¿Imaynapin Saqra ancha phiñasqa kasqanta rikuchishan? Payqa runa wañuchiq hinan yuyaykun: “Sichus mana ñoqapaqchu chayqa, manan pipaqpas kanqachu”, nispa. Chaymi supayninkunapiwan manaraq tiemponku tukukushaqtin tukuy imaymanata ruwashanku runatapas kay Pachatapas chinkachinankupaq. Chaymantapas, Saqraqa hatun empresakunatan tanqan imaymanata qhatunankupaq, chhaynapi runakuna ima hinaraq rantinankupaq. Chaypaqqa hallp’aq tukuy qowasqanchistan tukupushanku tukuytataq qhellichashanku, chaywanmi wakchayachipunku hallp’anchista chhaynapi runapas kawsayninta sinchi sasaman churan (Apocalipsis 11:18; 18:11-17).

Runaq paqarisqanmantapachan religionpi politicapi ima rikukun Saqraq munaychakusqanqa. Apocalipsis qelqan hatun nacionkunaq kamachisqanta tupachin wak’a animalkunawan, willantaq Saqra chay kamachiqkunaman ‘hatun atiyta’ qosqanmantapas. Willallantaqmi imaynatan nacionkunapi kamachikuqkuna religionpi umalliqkunawan chaqrukusqankuta, chaytan rikch’anachin Diosta wasanchaywan (Apocalipsis 13:2; 17:1, 2). ¿Imaraykun runakuna wak rikch’ayniyoq kasqankurayku ch’aqwanku, sarunchanakunku, guerrakunata ruwanku, ñak’arichinakunku chhaynapi millonninpi wañuchinakunku? ¿Paykunallamantachu chayta ruwanku icha Saqrachu supayninkunantin chayta ruwanankupaq tanqan?

Bibliaqa sut’itan rikuchin Saqra hatun nacionkunata kamachiqkunatapas munasqanman hina imatapas ruwachisqanta. Diosmanta karunchakuq runakunaqa kamachiqninku hinan kanku, Saqra hinan paykunapas ninku: “Sichus mana ñoqapaqchu chayqa, manan pipaqpas kanqachu”, nispa. Chhaynaqa, ¿hayk’aqkamataq Saqrari ñak’arichiwasun?

Saqraqa wañuchisqan kanqa

Jesucristo kay pachapi kashaspan nirqanña Saqra supayninkunantin wañuchisqa kanankuta. Qatikuqninkuna imaynatas supaykunata runakunamanta qarqosqankuta willaqtinkun  nirqan: “Ñoqan rikurqani Satanasta rayo hina hanaq pachamanta urmaykamushaqta”, nispa (Lucas 10:18). Chaywanmi Jesusqa nisharqan hanaq pachaman kutipuspa arcángel Miguel hina kay pacha kamachiqta hukpaqkama atipananmanta (Apocalipsis 12:7-9). Bibliaq profeciankuna nisqanman hina 1914 watapin Jesucristoqa Saqrata supayninkunatawan atiparqan hanaq pachapi. *

Chay watamantapachan Saqraqa yacharqanña wañunanpaq pisi tiempollaña kasqanta. ‘Yaqa llapa runakuna kay pachapi Saqraq munaychakusqan kashaqtinkupas’, millonninpi runakunan mana makinpiñachu kashanku. Paykunaqa Bibliaq yanapayninwanmi allinta repararqanku Saqra pi kasqanta imakunatachus yuyaykusqantapas (2 Corintios 2:11). Apóstol Pablon iñiqmasinkunaman nirqan: “Thak-kayta qoq Diosmi usqhaylla Satanasta atipaspa chaki sarunaykichisman churanqa”, nispa (Romanos 16:20). *

Pisi tiempollamantan Saqraqa wañuchisqa kanqa. Cristoq sumaq kamachiyninpiqa runakunan kay pachata munay paraisoman tukuchinqaku. Manañan kanqañachu maqanakuy, cheqninakuy, munapayaypas. Bibliaq nisqan hina chaykunaqa “manañan yuyarisqapasñachu kanqa” (Isaías 65:17). ¡May kusikunapaqmi kay pachapi kamachikuqpa makinmanta kacharichisqa kayqa!

[Uranpi willakuy]

[9 paginapi willakuy]

Cristoq sumaq kamachiyninpiqa runakunan kay pachata munay paraisoman tukuchinqaku