¿Yacharqankichu?

¿Familiantinchu karqan Jesús mayqen apostolninwanpas?

▪ Bibliaqa manan sut’itapunichu chayta willan. Ichaqa iskay kinsa textokuna huk qelqakuna iman willan wakin apostolninkunawan familiantin kasqankuta.

Evangelio qelqakunapin willan Jesús k’aspipi warkusqa ñak’arishaqtin qayllanpi sayashaq warmikunaq sutinta. Juan 19:25 texton willan tawa warmikunamanta: ‘Jesuspa maman [Mariamanta], mamanpa ñañanmanta, Cleofaspa warmin Mariamanta, Magdalá llaqtayoq Mariamantawan’. Chaypi nisqanta Mateo, Marcos librokunawan tupachispan yachanchis Jesuspa tiyanqa Salomé kasqanta. Payqa Santiago, Juanpa taytanku Zebedeoq warminmi kanman karqan (Mateo 27:55, 56; Marcos 15:40). Chhayna kaqtinqa iskayninkun Jesuspa primonkuna karqanku. Chay iskay challwaq runakunatan Jesús waqyarqan qatikuqninkuna kanankupaq (Mateo 4:21, 22).

Ñawpa tiempomanta willaq qelqan nin Alfeo Jesuspa uywaqen Joseq wawqen kasqanta. Chhayna kaqtinqa Alfeoq churin Santiagopas Jesuspa primonmi karqan (Mateo 10:3).

¿Imantinmi karqanku Jesuswan Bautizaq Juanwan?

▪ Wakin runakunan ninku Jesuswan Bautizaq Juanwan primontin kasqankuta. ¿Imaraykun chayta ninku? Wakin Bibliakunapi Lucas 1:36 textota mana k’apaktachu t’ikrasqankurayku. Bartina-Roquer Biblia nisqan hina, Juanpa maman Elisabet otaq Isabelwan Jesuspa maman Mariapiwansi primantin karqanku.

Lucas textopi ‘ayllu’ otaq familiantin nisqa simin griego rimaypi askhamanta rimashan. Chay simin rikuchin chay iskay warmikuna familiantin kasqankuta ichaqa manan primantin kasqankumantapunichu nishan. Chay textomantan Joseph A. Fitzmyer nin: “Chay simiqa askhamantan riman, manan sut’itapunichu willan imantin kasqankuta”, nispa (El Evangelio según Lucas). Chhaynaqa, ¿maymantan rikhurimun Jesuswan Juanwan primontin kasqanku? Enciclopedia Católica nin: “Chay rimaykunaqa runakunaq ruwasqan qelqakunamantan horqosqa kashan”, nispa. Arí, Jesuswan Juanwanqa familiantinmi karqanku ichaqa manan sut’itachu yachakun primontin kasqankuqa.