¿Imaraykun Jesús mana politicapi chhaqrukurqanchu?

HUK kutinmi 32 wata kashaqtin, tardeyaykuyta hinaña askha runakuna Diospa prometesqan Mesiasta uyarisharqanku, chay tiempopaqqa askha runakunañan Jesusta rikusqaku onqosqakuna hampisqanta wañusqakuna kawsarichisqantapas. Chay p’unchaypipunin rikurqanku milagrokuna ruwasqanta, anchatataqmi admirakurqanku Diosmanta yachachisqanta uyarispa. Chay qhepamanmi runakunata t’aqa-t’aqapi huñurqan Diosmanta mañakuspataq milagrota ruwaspa paykunaman mikhuchirqan. Chay qhepamanmi qatikuqninkunata kamachirqan ama imapas usunanpaq puchuq mikhunata hoqarinankupaq. ¿Imanirqankun chaymanta runakuna? (Juan 6:1-13.)

Milagrokuna ruwasqanta, askha runakuna payman huñukusqanta, runakunapi interesakusqantawan rikuspan rey kananpaq qhawarirqanku (Juan 6:14). Munakusqanku llaqtan millay kamachikuqpa makinpi kasharqan, munasharqankutaqmi huk allin kamachikuq enemigonkuq makinmanta kacharichinanta. Chaymi Jesusta mat’ipayarqanku politicaman haykunanpaq. ¿Imatan pay ruwarqan?

Biblian nin: “Reyta churanankupaq hap’irqonankuta yachakuspa, wakmanta sapallan orqota kutirqan”, nispa (Juan 6:15). Chayta ruwasqanpin rikuchirqan manapuni politicapi chhaqrukuy munasqanta. Manataqmi hayk’aqpas chaymanta iskayarqanchu. Qatikuqninkunamanpas sut’itan yachachirqan pay hina kanankupaq (Juan 17:16). ¿Imaraykun politicapi mana chhaqrukurqanchu?

¿Imaraykun mana chhaqrukurqanchu?

Chayta yachanapaq qhawarisun iskay yachachikuykunata:

‘Runaqa runamasinta mana allinta ruwananpaqmi munaychakun.’ (Eclesiastés 8:9.) Chay texton sut’ita willan política rikhurimusqanmantapacha runakuna imayna kawsasqankuta. Jesuspas yacharqanmi chhaynapuni kasqanta. Payqa manaraq kay Hallp’aman hamushaspan unay tiempota hanaq pachapi kawsarqan espiritual cuerpopi (Juan 17:5). Jesusqa yacharqanmi runakuna mana runamasinta kamachinankupaqchu kamasqa kasqankuta, chaymi paykunaqa allintaña ruwayta munashaspapas manapuni runakunaq necesitasqanta qoyta atinkuchu (Jeremías 10:23). Yacharqantaqmi runakunaq sasachakuyninta manapuni mayqen kamachikuqpas allichay atisqanta.

‘Lliw kay pachan saqraq munaychakusqan kashan.’ (1 Juan 5:19.) Askha politicokunan kallpachakurqanku allin kawsayta apamunankupaq, chaywanpas Jesuspa nisqan hina, allin kamachikuqpas “kay pacha kamachikuq[pa]” makinpin kashan (Juan 12:31; 14:30). Chaymi Jesucristo huk político runata nirqan: “Qhapaqsuyuyqa [Gobiernoyqa] manan kay pachamantachu”, nispa (Juan 18:36). Chay tiempopaqqa ñan akllasqaña karqan Diospa Gobiernonpi kamachikunanpaq. Sichus pay politicapi chhaqrukunman karqan chayqa, Diospa Gobiernon contran kashanman karqan.

Chhaynaqa, ¿manachu cristianokuna kay pachapi kamachikuqkunata respetananku? Manan chaytachu nisharqan. Jesusqa yachachirqanmi kay pachapi kamachikuqkunata kasukunanku kasqanta Diospa kamachikusqantapas kasukunankuta.

Jesusqa respetarqanmi kamachikuqkunata

Huk kutinmi Jesús yupaychana wasipi yachachishaqtin, enemigonkuna urmachiyta  munaspa impuesto pagaymanta tapurqanku. “Manan paganachu” niqtinqa, “kamachikuqpa contranpin hatarishan” ninkumanmi karqan, hinaspapas judiokunan romanokuna contra hatarinkuman karqan, makinkumanta kacharisqa kayta munasqankurayku. “Ari paganan” niqtintaq llapa runakuna ninkuman karqan “kamachikuqpa mana chanin ruwasqantan allinpaq qhawarin” nispa. Jesusmi ichaqa allin yachaywan nirqan: “Cesarpa kaqtaqa Cesarman qopuychis, Diospa kaqtataq Diosman qopuychis”, nispa (Lucas 20:21-25). ¿Imatan chaymanta yachanchis? Cristianokunaqa Diospa kamachikusqantan kasukunanchis “Cesarpa” otaq autoridadkunaq kamachikusqantawan.

¿Imaraykun autoridadkunata kasukunanchis? Paykunaqa llaqtaq allinninpaqmi imaymanata ruwachinku. Kamachikuq kayninkupin munanku llaqtankupi runakuna honrado kanankuta, impuesto paganankuta, kamachikuykunata kasukunankutapas. Jesusmi allin ejemplo karqan chaykunapi, payqa ‘Cesarpa kaqtan Cesarman qopurqan’. Familianpin payqa yacharqan autoridadkuna kasukuna kasqanta, sasaña hunt’anapaq kanman chaypas. Huk kutinmi Romapi kamachikuq runakunata kamachirqan nacesqanku llaqtapi censachikunankupaq, chaymi Mariaqa onqoqña kashaspapas Josewan 150 kilometrota hinaraq viajarqanku Belén llaqtakama (Lucas 2:1-5). Jesuspas kasukurqanmi autoridadkunata chaymi mana paganan impuestotapas pagarqan (Mateo 17:24-27). Chaywanpas Jesusqa manan runakunaq kawsayninpi chapukuqchu (Lucas 12:13, 14). Arí, Jesusqa respetarqanmi autoridadkunata ichaqa manan autoridad kayta munarqanchu. ¿Ichaqa imatan  Jesús nisharqan “Diospa kaqtataq Diosman qopuychis” nisqanwan?

“Diospa kaqtataq Diosman qopuychis”

Huk kutinmi Jesusta tapurqanku mayqen kamachikuy aswan chanin kasqanta. Chaymi pay nirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan. Chaymi aswan chaniyoq ñawpaqkaq kamachikuyqa. Iskaykaq aswan chaniyoqqa kaymi: ‘Runamasiykitan qan kikiykita hina munakunki’”, nispa (Mateo 22:37-39). Chaypi nisqan hina, Diosqa paypa ‘kaqta’ qopunanchistan munan, chaykunaqa paypaq hunt’aq kayninchismi munakuyninchispiwan.

Yachasqanchis hina, manan pipas iskaytaqa munakuyta atinmanchu. Manan Jehová Diosta Gobiernontawan akllakushaspa kay pacha gobiernokunatawan akllakusunmanchu. ¿Imarayku? Jesusmi nirqan: “Manan pipas iskay patrontaqa serviyta atinmanchu, huknintan cheqnikunman, huknintataq munakunman”, nispa (Mateo 6:24). Chaypi qhapaq kaymantaña Jesús rimarqan chaypas, chay rimasqanqa tupallantaqmi política nisqawan. Chhaynatan ñawpa tiempopi qatikuqninkunapas rikurqanku.

Ñawpa tiempomanta qelqakunapas willanmi cristianokuna manapuni politicapi chhaqrukusqankuta. Paykunaqa Jesús hinan Diosllata servirqanku. Chaymi mana hayk’aqpas juramentota ruwarqankuchu Roma llaqtata reytapas servinankupaq, manan soldado kayta munarqankuchu, nitaq politicapi chhaqrukurqankuchu. Chayta rikuspan runakuna cheqnikurqanku. Wakin enemigokunan nirqanku: “Kay cristianokunaqa runakunatan cheqnikunku”, nispa. ¿Cheqaqtachu chayta rimasharqanku?

 Cheqaq cristianokunaqa munakunkun runamasinkuta

Ñawpaqpi yachasqanchis hina, iskaykaq aswan chaniyoq kamachikuyqa kaymi: “Runamasiykitan qan kikiykita hina munakunki”, nisqa. “Cristianon kani” nishaspa runamasinta cheqnikuqqa manan cheqaq cristianoqa kanmanchu. Jesusqa munakurqanmi llapa runakunata, chaymi paykunarayku tukuy tiemponwan tukuy kallpanwan llank’arqan, wakintaqa hukkunapin yanaparqan (Marcos 5:25-34; Juan 2:1-10).

Jesusqa manan onqosqakunata hampisqanpichu, yarqasqakunata mikhuchisqanpichu, nitaq wañusqakunata kawsarichisqanpichu reqsichikurqan, aswanmi paytaqa “Yachachikuq” nirqanku (Juan 1:38; 13:13). Willakusqan hina, payqa Diospa Gobiernonmanta runakunaman yachachinanpaqmi kay Hallp’aman hamurqan (Lucas 4:43).

Cheqaq cristianokunaqa kallpachakunkun Jesús hina Diospa Gobiernonmanta willanankupaq (Mateo 24:14; 28:19, 20). Chay Gobiernoqa hanaq pachamantan kay Hallp’api runakunata munakuywan kamachimunqa. Chinkapunqan ñak’ariypas wañuypas, chhaynapin Diospa munaynin hunt’akunqa (Mateo 6:9, 10; Apocalipsis 21:3, 4). Arí, Jesuspa apamusqan willakuykunaqa ‘allin willakuykunan’ (Lucas 8:1).

Jesús mana hayk’aqpas politicapi chhaqrukusqanta yachaymi yanapawasun pikuna cheqaq cristianokuna kasqankuta yachananchispaq. Arí, cheqaq cristianokunapas manapunin politicapi chhaqrukunkuchu, Jesustan qatikunku, pay hinataqmi Diospa Gobiernonmanta willanku.

Diospa Gobiernonmanta astawan yachanaykipaq Jehová Diospa testigonkunata maskhay otaq Internetpi www.watchtower.org nisqata maskhay.

[16, 17 paginakunapi fotokuna recuadropiwan]

Llapa runakunata yanapanku

Jehová Diospa testigonkunaqa manan politicapi ch’aqrukunkuchu, chaywanpas interesakunkun llapa runakunapi. Tukuy atisqankutan ruwanku huk llaqtayoqkunata wakchakunatapas yanapanankupaq. Qatimuqpi yachasun imayna yanapasqankuta.

▪ Sapa watan qanchis millón más Testigokuna 1.500 millón horata hina askha runakunaman Bibliamanta yachachinku. Askha runakunan Bibliaq kamachikuyninta kasukuspa imayna kawsasqankuta cambianku, viciokunata saqepunku, kusisqataq familiankuwan kawsanku.

▪ Phisqa pachak más rimaykunapin Bibliamanta qelqakunata ruwashanku chaytataq runakunaman rakishanku, chaykunamanta wakin rimaykunapiqa manan ima qelqapas kanchu.

▪ Escuelakunan kan chaypi allin rimayta respetowan rimayta yachachinankupaq.

▪ Pachantinpin escuelakuna kan leeyta qelqayta yachachinankupaq. Chaymi kunanqa waranqanpi runakunaña yachanku leeyta qelqaytapas.

▪ Pachantinpin kan tawa pachak más Comités Regionales de Construcción nisqakuna. Chaypin Testigokunata yachachinku Bibliamanta yachanankupaq wasikunata sayarichinankupaq. Kay chunka wata pasaypin iskay chunka waranqa wasikunataña hatarichinku, chaytan reqsikun Huñunakuna Wasi, nispa.

▪ Sasachakuypi tarikuqkunata yanapanku. Wakin llaqtakunapi lloqllakuna, hatun wayrakuna, terremotokuna kaqtinmi chaypi iñiqmasinkuta wak runakunatawan yanapanku. Estados Unidos nacionpi hatun wayrakuna imaymanata thunichirqan, ichaqa iskay watallapin askha Testigokuna wakmanta hatarichirqanku isqon chunka más Huñunakuna Wasikunata, phisqa waranqa wasikunatawan.

[15 paginapi dibujo]

Politicapi chhaqrukunanpaq Jesusta hap’inankuña kashaqtinmi “sapallan orqota kutirqan”