¿Llapa allin runakunachu hanaq pachaman rinqaku?

WAÑUPUNANPAQ pisillaña kashaqtinmi Jesusqa apostolninkunata nirqan: “Yayaypa wasinpiqa askha wasikunan kashan, mana chay hina kaqtinqa niykichismanñan karqan. Chhaynaqa, risaqmi qankunapaq wasita wakichimuq”, nispa (Juan 14:2). Chay nisqanwanmi apostolninkunaman prometesharqan hanaq pachaman rinankupaq. Ichaqa, ¿ima ruwanankupaqmi rinanku karqan?

Huk hatun llank’anata hunt’anankupaqmi. Chaymi khaynata nirqan: “Qankunaqa wateqasqa kasqaykunapin ñoqallawanpuni kasharqankichis. Chaymi ñoqapas kamachikuqta churaykichis, imaynan Yayaypas ñoqata churawarqan hinata”, nispa (Lucas 22:28, 29). Ñawpaqtañan Diosqa Jesusta prometesqa Rey kananpaq. Rey kaspanmi payqa allin runakunaq llakikuyninta tukuchinqa, millay runakunatataq wañuchinqa. Jesusqa “teqsimuyu k’uchukaman” hanaq pachamanta kamachimunqa (Salmo 72:4, 8; Daniel 7:13, 14).

Payqa apostolninkunawan kuskan kamachimunqa. Paykunan ñawpaqkaq akllasqakuna kanku ‘kay pachata kamachimunankupaq’ (Apocalipsis 5:10).

¿Hayk’a runataq hanaq pachaman rinqaku? Yupasqallan. Imaynan kay pacha gobiernokunapipas pisilla kamachimunku chhaynallataqmi Diospa Gobiernonpipas pisi t’aqalla kamachimunqaku askha runakunata. Chay t’aqamanta kaqkunatan Jesús nirqan: “Qankunaqa pisi t’aqa oveja hinallaña kashaspapas, ama manchakuychischu, Yayaykichismi qhapaqsuyunta [gobiernonta] qosunkichis”, nispa (Lucas 12:32). Chay t’aqaqa 144.000 runakunallan kanku, paykunallan hanaq pachata rinqaku; kay pachapin ichaqa mana yupay atiy Dios sonqo runakuna wiñaypaq kawsanqaku (Apocalipsis 14:1; 21:4).

Chhaynaqa manan llapa allin runakunachu hanaq pachaman rinqaku. Rey Davidpas allin runa kashaspapas “manan hanaq pachamanqa” rirqanchu (Hechos 2:34). Juan Bautizaqpas Dios sonqo runaña karqan chaypas, manan hanaq pachamanqa rirqanchu, chayraykun Jesusqa nirqan: “Bautizaq Juan hinaqa manan pipas karqanchu, chaywanpas Hanaq pacha qhapaqsuyupiqa aswan huch’uykaqmi Juanmantaqa aswan kurak”, nispa (Mateo 11:11).

¿Ima premiotan chaskinqaku allin runakuna?

Bibliaq nisqan hina, yaqa llapan Dios sonqo runakunan kay pachapi wiñaypaq kawsanqaku. ¿Imatan ruwananchis chay premiota chaskinapaq? Jesuspin iñinanchis. Paymi nirqan: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). Chaypi nisqan hina, Jehová Diosqa anchatan munakuwanchis, chaymi llapanchispaq wiñay kawsay suyakuyta qowanchis.

Allin iñiyniyoq kanapaqqa allintan yachananchis Bibliamanta (Juan 17:3). Chay hinaqa Diospa munayninmantan yachashanallanchis, chayman hinataq kawsananchis. Chayta ruwaspan wiñay kawsayman aypasunchis.

 [15 paginapi recuadro]

Bibliaq yachachisqan

Runakunan ninku:

“Runa wañuqtinqa almanqa kawsashallanmi”, nispa.

Biblian ichaqa nin:

‘Wañupuqkunaqa manan imatapas yachankuchu’, nispa (ECLESIASTÉS 9:5).

Runakunan ninku:

“Wañusqakunaqa manan kawsarimpunqakuñachu”, nispa.

Biblian ichaqa nin:

“Aya p’ampanakunapi lliw kaqkunaq [...] [Jesuspa] kunkanta uyarinanku tiempon chayamunqa. Hinan [...] kawsarimpunqaku”, nispa (JUAN 5:28, 29).

Runakunan ninku:

“Llapan allin runakunan hanaq pachata ripunku”, nispa.

Biblian ichaqa nin:

“Chanin runakunaqa kay [pacha] hallp’atan hap’ikapunqaku, chaypin wiñaypaq tiyanqaku”, nispa (SALMO 37:29).