¿SASACHU qanpaq kasukuy? *... Llapanchispaqmi sasa karqan. Jesuspaqpas sasan karqan, ¿yacharqankichu chayta?...

¿Pikunatan kasukunayki?... Arí, tayta-mamaykitan. Biblian nin: “Wawakuna, tayta-mamaykichista Señorpi iñiqkuna hinapuni kasukuychis”, nispa (Efesios 6:1). Jesusri, ¿kasukunmanchu karqan tayta-mamanta? ¿Pikunan tayta-maman karqanku?... Jesuspapas ñoqanchispapas Jehová Diosmi Taytanchisqa (Mateo 6:9, 10). Ichaqa Josewan Mariawanpas tayta-mamanmi karqanku. ¿Imaynapin tayta-maman karqanku?...

Gabriel sutiyoq angelmi Mariata nirqan: “Huk wawata wiksallikunki”, nispa. ¿Imaynapin wiksallikunman karqan mana qosayoq kashaspa? Jehová Diospa atiyninwanmi wiksallikurqan. Chaymi chay ángel nillarqantaq: “Ancha Hatun Diosmi atiyninwan p’istuykusunki, chaymi naceq wawaqa Diospaq t’aqasqa kanqa, Diospa Churin sutichasqataq kanqa”, nispa (Lucas 1:30-35).

Jehová Diosmi Wawanpa kawsayninta Mariaq wiksanman astamurqan. Chhaynapin Jesusqa huk wawakuna hina mamanpa wiksanpi wiñayta qallarirqan. Hinan Joseqa Mariawan casarakurqan, isqon killamanta hinataq Jesusqa nacerqan. Yaqa llapanmi piensarqanku Joseqa Jesuspa taytan kananpaq, ichaqa Joseqa uywaqnillanmi karqan. Jesusqa iskay taytayoqpas kanman hinan karqan.

Payqa anchatan munakurqan hanaq pacha Taytanta, chayqa sut’intan rikukurqan 12 watanpi kashaqtin. Paypa familianqa sapa watanmi Jerusalén llaqtata riqku Pascua fiestaman. Chaymanta kutimpushaqtinkun Jesusqa chinkakapusqa, Josewan Mariawantaq mana cuentata qokusqakuchu. ¿Imaynapin chinkakapunman karqan?...

Chay tiempopaqqa Jesuspa tayta-mamanqa askha wawayoqñan karqanku (Mateo 13:55, 56). Hinaspapas huk familiankunawanpaschá rirqanku. Yaqapaschá Jacobowan (Santiago) Juanwan, tayta-mamanku Zebedeowan Salomepiwan rirqanku; Salomeqa Mariaq ñañanmi kanman karqan. Tayta-mamanqa “paykunawanchá Jesusqa hamushan”, nispapaschá nirqanku (Mateo 27:56; Marcos 15:40; Juan 19:25).

Jesús mana rikhuriqtintaq Josewan Mariawanqa Jerusalén llaqtaman kutirqanku. Kinsa p’unchayta maskhashaspañan tarirqanku yupaychana wasipi. Hinan Mariaqa Jesusta nirqan: “Wawáy, ¿imaraykun kayta ruwawankiku? Qhawariy, taytaykipiwanmi khuyay llakisqa maskhaykamushaykiku”, nispa. Hinaqtinmi Jesusqa nirqan: “¿Imapaqtaq maskhamuwarqankichis? ¿Manachu yacharqankichis Yayaypa ruwanankunapi kanayta?” nispa (Lucas 2:45-50).

¿Allintachu Jesús ruwasharqan chhaynata kutichispa?... Tayta-mamanqa yacharqankun Jesusqa Diospa wasinman riy munasqanta (Salmo 122:1). Jesuspas  yuyaykurqanchá tayta-mamanqa chaypi ñawpaqta maskhanankuta, ¿ima ninkin chaymanta?... Mariaqa yuyashallarqanpunin Jesuspa chhayna nisqanta.

Chay qhepamanri, ¿kasukuqllachu kanman karqan Jesús?... Biblian nin: “Paykunawan uraykuspataq Jesusqa Nazaret llaqtaman kutipuspa, paykunata kasukuspa tiyarqan”, nispa (Lucas 2:51, 52). ¿Imatan chaymanta yachawaq?... Allinpunin chay nisqayki, chhaynaqa qanpas kasukunaykin tayta-mamaykitaqa.

Kaypi yachasqanchis hina, Jesusqa kasukuqpunin karqan tayta-mamanta hanaq pacha Taytantapas, mayninpi sasaña kaqtinpas.

Jehová Diosmi Jesusta kamachirqan llapa runakunarayku wañunanpaq. Chayta kasukuyqa sasapunin karqan, chaymi manaraq wañushaspa Taytanta nirqan atikuqtinqa chay kamachikuyninta cambiananpaq (Lucas 22:42). Ichaqa manan Taytanqa cambiarqanchu. Chhaynaña kaqtinpas kasukurqanpunin. Chayraykun Biblia Jesusmanta nin: “Muchusqanwan[mi] kasukuyta yacharqan”, nispa (Hebreos 5:8). Ñoqanchispas ¿atisunmanchu pay hina kayta? Sasaña kaqtinpas, ¿kasukuqchu kasun?...